2 Samwil.
4.
Te pegkarineg ni Isbusit ne anak ni Saul te inggimatayan si Abnir diye te Hibrun, migmahuye e sikandin wey nalliyasan degma ka langun ne matig-Israil. 
Ne due daruwa ne etew ni Isbusit ne si Baana wey si Rikab ne migpangulu te pegpanlusud te me kuntere dan. Me anak sikandan ni Rimun ne matig-Biirut ne egpuun te me kabuhalan ni Binhamin. (Seini se Biirut in-ile e ne sakup te Binhamin 
tenged su namallahuy ma diye te Gitaim ka tapey ne nangugpe dutu wey diyad e sikandan miglapu taman kuntee.) 
Ne duen pad man‑e kabuhalan ni Saul ne si Mipibusit ne anak ni Diyunatan angin e ki Isbusit. Lalimme e ne leg‑un si Mipibusit te due guhuren puun te Hisril ne neyimatayan e si Saul wey si Diyunatan. Ne tenged dutu, insapipi e sikandin te malitan ne talaggaat kandin wey migpallahuy e, piru nalekaan ka bate te talaggaat tenged te peg-iyal-iyal rin. Ne seeye ka egpuunan ne napungku ka me paa te bate. 
Sabeka ne aldew, miggendiye te baley ni Isbusit si Rikab wey si Baana ne me anak ni Rimun ne matig-Biirut. Nekeuma sikandan diye te nekeuntud e ka aldew taheed te miggimhimeley si Isbusit. 
Te seeye ne timpu, migseled e sikandan te baley ne eglilibat ne egkuwa te trigu. Ne indugsuan dan e si Isbusit diye te getek, te sasangan ne eggibat-hibat sikandin diye te sinabeng din. Inggimatayan dan sikandin wey intamped dan e ka ulu rin wey in-uyan dan e te mig-ayun ne migpallahuy. Ne migsigpawe sikandan ka miggipanew peendiye te inged ne Hurdan. 
Ne in-uyan dan ka ulu ni Isbusit diye ki Dabid diye te Hibrun wey migkahi, “Hari, seini red ka ulu ni Isbusit ne anak ni Saul ne egkuntere keykew wey ka egkeupian ne eggimatey keykew. Ne kuntee ne aldew, migsulian e te Magbebaye ne Manama si Saul wey ka me kabuhalan din tenged te neyimu ran keykew te ahalen ney wey Hari.” 
Piru intabak ni Dabid ka tahasuled ne ensi Rikab wey Baana, “Egpahunlibet a te manekal ne Magbebaye ne Manama ne iyan migpangabang keddi te langun ne me kalasayan! 
Due sabeka ne etew dengan ne migkahi, ‘Migpatey e si Saul,’ wey migsuman-suman sikandin ne meupiya ne guhuren ka impangguhud din keddi. Piru nasi ku re iya sikandin iparakep wey impeyimatayan diye te Siklag. Seeye ka indasag ku kandin te guhuren din. 
Ne wey naan pa iya ka mareet ne me etew ne miggimatey te matareng ne etew diye te hibatanan din diye te baley rin. Egsulian ku kuntee sikaniyu tenged te peggimatey niyu kandin eyew egkengaawe kew e kayi te ampew te tane.” 
Purisu impeyimatayan e ni Dabid te me sundalu rin si Rikab wey si Baana. Impanempug dan ka me belad dan wey me paa ran, wey imbitin dan e ka me lawa ran diye te ilis te inlungag ne limuranan te weyig diye te Hibrun. Ne ingkuwa ran e ka ulu ni Isbusit wey inlebeng dan e diye te inlebengan ki Abnir diye te Hibrun.