2 Samwil.
14.
Nasabut ni Huwab ne anak ni Siruya ne naalimengawan e amana ka Hari ki Absalum. 
Sikan naa ka migsuhu si Huwab te etew peendiye te Tikuwa eyew te peg-angey te matagseb ne malitan diye. Te pegginguma te malitan, ingkahiyan e sikandin ni Huwab, “Lilibat ka ne miglungku wey isaluub nu ka kumbale te eglungku. Kene ka pamaluhu te lana wey lilibat ka ne naluhey kad ne miglungku te minatey. 
Ne hendiye ka te Hari wey ilalag nu kandin seini se ignangen ku keykew.” Ne impanulu e ni Huwab ka malitan ke nekey ka iglalag din te Hari. 
Te diyad e te tangkaan te Hari ka malitan ne matig-Tikuwa, mig-usengul sikandin diye te tane eyew te pegtahud kandin, wey migkahi, “Bulihi a ubag nikeykew, Hari!” 
Ne mig-inse ka Hari kandin, “Nekey‑a ka prublima nu?” Ne migtabak ka malitan, “Iyam e pad iya nabalu, 
wey due daruwa ne anak ku ne me lukes. Migpeehetey sikandan diye te kamet wey ware egpakapegnel kandan. Ne inlampesan te sabeka ka dangeb wey namatey e. 
Ne kuntee, ahalen, egkuntereen ad te langun ne me karumaan ku. Migkahi sikandan, ‘Ibehey nu kanami ka miggimatey te suled din su eggimatayan ney degma sikandin. Kene sikandin ne eleg ne egpakakamuney te karatuan te amey rin.’ Te iling kayi ne paahi, eg-awaan a iya nikandan te langun ne nasame kayi te keddi wey egkawe e ka ngaran te iglukes ku kayi te kalibutan.” 
Ne ingkahiyan te Hari ka malitan, “Uli kad e. Iyan ad balahad ne eggusey te prublima nu.” 
Ne ingkahiyan te malitan ne matig-Tikuwa ka Hari, “Mahal ne Hari, ke due egsendit keykew tenged te pegbulig nu keddi, sikeddi wey ka pamilya ku ka egpanabak wey kene ne sikeykew.” 
Migkahi ka Hari, “Ke duen pad egpanlalag keykew te minsan nekey, dumaa nu sikandin kayi te keddi wey kene kud sikandin egtuhutan ne egsamuken ke pad nikandin.” 
Ne migkahi sikandin, “Mahal ne Hari, saad ka ubag keddi pinaahi te Magbebaye ne Manama ne iyan ka Manama nu, ne kene nu egtuhutan ne duen pad egsuli te anak ku. Egkeupian a ne warad egpakalangesa.” Ne migkahi ka Hari, “Igsaad ku te manekal ne Manama ne kene iya egkareetan ka anak nu.” 
Ne mig-inse ka malitan, “Mahal ne Hari, egkaayun ne eg-inse e pad?” Ne migkahi ka Hari, “Ne uya, inse kad iya.” 
Ne dutu, mig-inse e ka malitan, “Kene bu red ne mareet sika se eggimuwen nu diye te keet-etawan te Manama? Ka inlalag nu keddi migpeila sika ne nakasale ka su ware nu ma peulia kayi ka anak nu ne migpallahuy. 
Egpatey ki langun—iling ki te weyig ne in-itis diye te tane ne kenad e egkalimud pad. Minsan ka Manama kene egbugtus te geyinawa te etew, ke kene, nasi sikandin egplanu ne egpekeuli diye te kandin ka etew ne nakapariyu kandin. 
Mahal ne Hari, miggendini a eyew te pegpakiglalag keykew meyitenged kayi su naaldek a te me etew. Migpakiglalag a keykew su kema ke egkabennalan ke red te ighangyu ku keykew. 
Nakanengneng a ne egpammineg ka keddi, wey igpariyu a nikeykew puun te etew ne egdereet kanami te talaanak eyew egkaawe key te tane ne imbehey te Manama kanami. 
Migsuman-suman a degma ne egpakaliwang keddi ka me lalag nu Hari, su egpekeiling ka te panalihan te Manama ne nakanengneng te meupiya wey mareet. Egdumaan ka perem te Magbebaye ne Manama ne iyan ka Manama nu.” 
Ne ingkahiyan te Hari ka malitan, “Due ig-inse ku keykew wey kene ke naa heeles.” Ne migkahi ka malitan, “Ne uya, Mahal ne Hari.” 
Ne mig-inse e ka Hari, “Si Huwab ka migpanulu keykew kayi te langun?” Ne migtabak ka malitan, “Igpahunlibet ku te umul nu Mahal ne Hari, ne ware igpekeeles ne kamalehetan keykew. Uya, si Huwab ka mignangen keddi te eglalahen ku. 
Inggimu seini ni Huwab eyew egpekeg-uli e ka meupiya ne geyinawa niyu ki Absalum. Piru due katagseb nu Mahal ne Hari iling te katagseb te panalihan te Manama te pegnengneng te langun ne kayi te tane.” 
Sikan naa ka impeumew te Hari si Huwab wey ingkahiyan, “Uya, eg-uyun a kayi. Ne hipanew kad wey dumaa nu kayi ka anak ku ne si Absalum.” 
Mig-usengul si Huwab diye te tane eyew te pegtahud kandin wey migkahi, “Egpanalanginan ka te Manama, Mahal ne Hari! Nakanengneng ad kuntee te ingkahale e red nikeykew su nabennalan ke red te inhangyu ku keykew.” 
Purisu miggendiyad si Huwab te Gisur wey induma rin e si Absalum te miglibed diye te Hirusalim. 
Piru migkahi ka Hari, “Peulia niyud sikandin diye te baley rin. Kena a egkeupian ne egpakakita kandin kayi te palasyu ku.” Purisu diye mig-ugpe si Absalum te baley rin wey ware migpakigkita te Hari. 
Te intiru ne Israil, ware lein ne indeyrey amana tenged te kateles din angin e ki Absalum. Mateles sikandin ne egpitawen puun te pulu din peendiye te palapala rin. 
Makepal amana ka bulbul rin wey egpaalutan din seini te tagse leg‑un ke malayat e seini wey mabehat e. Ne egtimbangen din ka bulbul rin wey me daruwa ne kilu te timbangan te Hari ka kabehat kayi. 
Ne due tatelu ne anak din ne lukes wey sabeka ne malitan ne egngaranan ki Tamar wey amana sikandin ne tetelesi. 
Ne mig-ugpe si Absalum diye te Hirusalim te daruwa ne leg‑un ne ware migpakita te Hari. 
Ne impaangey ni Absalum si Huwab eyew egpeendiyeen din te Hari piru ware miggendiye si Huwab kandin. Ne impaangey rin e man‑e si Huwab piru ware ded iya man‑e sikandin miggendiye te kandin. 
Ne ingkahiyan ni Absalum ka me suluhuanen din, “Hendiyei niyu ka kamet ni Huwab wey silabi niyu ka sibada ne pinamula rin. Diye dapit seini te kamet ku.” Purisu insilaban e te me suluhuanen din ka pinamula ni Huwab. 
Seeye naa ka miggendiye si Huwab ki Absalum diye te baley rin wey mig-inse, “Mania te insilaban te me suluhuanen nu ka kamet ku?” 
Ne migtabak si Absalum, “Tenged su ware ka miggendini te impaangey ku sikeykew. Egkeupian a ne eggendiye ka te Hari eyew te peg-inse kandin ke mania te impaangey a nikandin diye te Gisur. Meupiya pad ke migpalunggehaat e re diye. Purisu ipeendiya a nikeykew te Hari. Ke nakasale e ma, ne egkaayun ne eggimatayan a nikandin.” 
Seeye naa ka miggendiyad si Huwab te Hari eyew ignangen kandin ka ingkahi ni Absalum. Ne impeumew si Absalum te Hari. Purisu miggendiye si Absalum te Hari wey mig-usengul diye te tane diye te tangkaan din. Ne inggarekan sikandin te Hari.