2 Samwil.
17.
Ne ingkahiyan ni Ahitupil si Absalum, “Paalama a nikeykew te sapulu wey daruwa ne libu (12,000) ne etew ne egpatalukunen ki Dabid te seini ne karusileman. 
Eglusuran ku sikandin taheed te nabeley sikandin wey migmahuye se geyinawa. Egginaalreken ku sikandin wey egmakapallahuy iya ka langun ne me duma rin. Ne si Dabid de ka eggimatayan ku. 
Ne igpalibed ku diye te keykew ka langun ne me etew rin iling te asawa ne miglibed diye te iglukes din. Sabeka re ne etew ka igkeupii nu te eggimatey, wey egmalinawen e ka langun ne etew.” 
Ne nakapahale ka tambag ni Ahitupil ki Absalum wey te langun ne igbuyag te Israil. 
Piru migkahi si Absalum, “Umawa nu degma si Husay, ka Arkihanen su eyew egpakarineg ki ke nekey ka igkalalag din.” 
Te pegginguma ni Husay, impanugtulan e sikandin ni Absalum te intambag ni Ahitupil. Ne migkahi si Absalum, “Eggimuwen te naa ka intambag din? Ne emun ke kene, nekey naa ka igkalalag nu?” 
Ne ingkahiyan ni Husay si Absalum, “Te seini ne timpu, kene ne meupiya ka tambag ni Ahitupil. 
Nakanengneng ka te bahani ka amey nu wey ka me etew rin, wey nabelu-belu sikandan iling te mahintalunan ne usu ne natakawan te me anak. Ne kene ne sikan de, su ka amey nu mangngateu ne bahani wey kene iya sikandin eglipereng duma te me etew. 
Minsan kuntee, diye sikandin te sabeka ne sulung wey ke diye naa te lein ne inged. Ke egkewun‑aan ka nikandin te eglusud wey due egpatey te me etew nu, egkahi ka minsan hentew ne egpakarineg kayi te natalu e ka me etew nu. 
Ne minsan pad ka bubuluti ne sundalu ne egpekeiling te liyun ne ware liyas, eggingumaan te liyas su nakanengneng ka intiru ne Israil te bahani ka amey nu wey mabbulut ka me etew rin. 
Purisu seini ka igpakatambag ku keykew. Sabekaa nu ka langun ne matig-Israil puun te Dan peendiye te Birsiba ne egpekeiling kasulug te pantad diye te ilis te dahat wey sikeykew mismu ka egpangulu kandan diye te giraanan. 
Kene sikandin egpekeeles kanta. Ne iling te demmug ne egkeulug minsan hendei, eglusuran ta degma sikandin minsan hendei ta sikandin egkakita. Ne egkapatey iya sikandin wey ka langun ne etew rin. 
Ke egpallahuy sikandin diye te sabeka ne siyudad, egguhusen ta ka sika ne siyudad taman te warad egkasame ne batu minsan sabeka.” 
Ne migkahi si Absalum wey ka langun ne matig-Israil, “Meupiya ka tambag ni Husay ne Arkihanen du te tambag ni Ahitupil.” Pegbuut te Magbebaye ne Manama ne kene eg-ikulen ni Absalum ka meupiya ne tambag ni Ahitupil su eyew egpakasalerep sikandin te karereetan. 
Ne innangenan ni Husay ka me talagpanubad ne ensi Saduk wey Abiyatar meyitenged te tambag ni Ahitupil ki Absalum wey te me matig-Israil, wey innangenan din degma sikandan te tambag din. 
Ne innangenan din sikandan, “Dagdahew kew suhu te etew wey pakahii niyu si Dabid te kenad sikandan egpeyireheen diye te weyig ne lapasanan peendiye te disirtu. Palapasa nud sikandan paragdahawa, su ke kene, egkareetan iya ka Hari wey ka langun ne etew ne duma rin.” 
Te seini ne timpu, diye migtetahad te sebseb te Inruhil si Diyunatan wey si Ahimaas su keilangan ne kene sikandan egkakita ne egseled diye te siyudad. Ne due suluhuanen ne malitan ne talagnangen engki Diyunatan wey ki Ahimaas ke nekey e ka neyitabu wey sikandan e degma ka egnangen ki Dabid. 
Piru due sabeka ne kanakan ne nakakita kandan wey impanugtulan din e si Absalum meyitenged dutu. Sikan naa ka migdagdahew e mig-awe si Diyunatan wey si Ahimaas wey miggendiyad e te baley te sabeka ne etew diye te Bahurim. Ka seini ne etew due belun diye te lama rin wey migpamaneug e sikandan dutu eyew eggeles. 
Insupaan te asawa te etew ka be‑be te belun wey indampilan din e te trigu ka insupe din kayi. Ne ware minsan hentew ne nakanengneng ne miggeles sikandan dutu. 
Te pegginguma te me etew ni Absalum diye te baley, in-insaan dan e ka malitan, “Hendei naan e si Ahimaas wey si Diyunatan?” Ne migtabak ka malitan, “Miglapas e sikandan te weyig.” Ne impamitew ran e si Ahimaas wey si Diyunatan piru ware dan sikandan nakita. Sikan naa ka miglibed e sikandan diye te Hirusalim. 
Te warad e ka me etew ne egpamitew kandan, mig-awe e sikandan puun te belun wey miggipanew e sikandan ka egnangen ki Hari Dabid meyitenged te tambag ni Ahitupil. Ne ingkahiyan dan e ensi Dabid, “Apas kew lapas te weyig.” 
Ne miglapas e te Weyig ne Hurdan ensi Dabid wey ka langun ne etew ne migduma kandin. Te egkaliwaswas e, nakalapas e sikandan langun. 
Te pegkanengnengi ni Ahitupil te ware ikula ka tambag din, insakangan din e ka asnu rin wey mig-uli e sikandin diye te lungsud din. Ne migpanaha-taha sikandin te pamilya rin wey mig-ehet-ehet e sikandin ne migbibitin. Sikan naa ka migpatey e sikandin wey diye sikandin ilebeng te inlebengan te amey rin. 
Ne nekeume e si Dabid diye te Mahanaim, taheed te eglapas pad si Absalum te Hurdan duma te langun ne sundalu te Israil. 
In-alam ni Absalum si Amasa ne pangulu te me sundalu subal ki Huwab. Si Amasa anak ni Itra ne sabeka ne Ismailita. Si Abigil ka iney rin ne anak ni Nahas, wey atebey ni Siruya. Ne si Siruya, iney ni Huwab. 
Ne migkekampu ka me matig-Israil wey si Absalum diye te Gilyad. 
Te pegginguma ni Dabid diye te Mahanaim, insinug-ung e sikandin ni Subi ne anak ne lukes ni Nahas ne egpuun te Raba diye te Amun, wey ni Makir ne anak ne lukes ni Amiyil ne egpuun te Lu-Dibar, wey ni Barsilay ne egpuun te Ruhilim diye te Gilyad. 
Ne nanguyan sikandan te me hibatanan, me pelenggana, me kendiru, trigu, sibada, harina, sinandag ne keenen, me gulay, 
teneb, me karniru, wey te egkakeen ne inggimu puun te gatas te baka, wey puun te gatas te karniru. Imbehey ran seini ki Dabid wey te me etew rin su nakanengneng sikandan ne miggutasan sikandan, nabbeley, wey namadmaraan te peggipanew ran puun te disirtu.