2 Samwil.
23.
Si Dabid ne anak ni Hisi ka etew ne imbantug te Manama. In-alam sikandin ne Hari te Manama ni Hakub, wey sikandin ka talaggimu te meupiya ne me ulahingen diye te Israil. Seini ka katammanan ne me lalag ni Dabid: 
“Ka Panisingan te Manama migpakiglalag pinaahi keddi wey impanulu a nikandin ke nekey ka eglalahen ku. 
Ne migkahiyan a te Manama te Israil ne iyan ded ka aputanan te Israil, ‘Ke egmandu ka sabeka ne etew duma te katareng wey kaaldek te Manama, 
eglayag sikandin iling te pegsile te aldew, iling te maselem ne ware gapun, wey iling te uran ne egpakapatubu te me hilamunen.’ 
“Ne iling due ka pegpanalangin te Manama te pamilya ku tenged su miggimu sikandin te kasabutan ne ware egtamanan duma keddi. Ka sika ne kasabutan, naay-ayaran te eggimu wey kene egkabalbalawan. Ne egpangabangan a nikandin layun wey igbehey rin ka langun ne eg-im-imanen ku. 
Piru ka ware karuan ne me etew, egpekeiling te me duhi ne igdegpak de, su kene seini egkahen-genan. 
Ne ka etew ne eggen-gen kayi, keilangan ne eggamit te putew wey ke subeng naa te kalawit, wey egkasilaban iya seini diye te natahuan kayi.” 
Seini ka me ngaran te me bahani ni Dabid: si Husi-Basibit ne sabeka ne Takunihanen ne pangulu te Tatelu ne Bahani. Nakapatey sikandin te walu ne gatus (800) ne me etew pinaahi te kalawit te sabeka re ne gira. 
Ka ikarangeb kandin si Ilyasar ne anak ni Dudu ne kabuhalan ni Ahu. Sabeka sikandin te tatelu ne me bahani ne migduma ki Dabid te pegganggat te me Pilistihanen ne miglibulung eyew te pegpakiggira. Ne nenakapallahuy ka me sundalu ne me matig-Israil, 
piru migpalunggehaat mule sikandin wey migpakig-ehet te me Pilistihanen taman te napu-pu e ka belad din wey hendue te kene din e egkalekaan ka kampilan din. Ne impepanalu sikandin te Magbebaye ne Manama wey nahule ka me kuntere te seeye ne aldew. Ne migmanlibed ka namallahuy ne me sundalu ne matig-Israil eyew te pegpanguwa naan de te me kasangkapan te me minatey. 
Ne ka igkatelu, si Sama ne anak ni Agi ne matig-Harar. Sabeka ne timpu, miglibulung ka me Pilistihanen diye te Lihi wey inlusuran dan ka me matig-Israil diye te due kamet ne neempet te bengag. Ne namallahuy ka me matig-Israil eyew te pegpanalliya te me Pilistihanen. 
Piru migpalunggehaat mule si Sama diye te taliware te kamet. Ne migpakig-ehet sikandin te me Pilistihanen wey neneyimatayan din sikandan. Ne impepanalu sikandin te Magbebaye ne Manama te dakel ne kapanaluwan te sika ne aldew. 
Te timpu te tinggaani, miggendiye ki Dabid diye te sulung te Adulam ka tatelu te seeye se tatelu ne pulu (30) ne me pangulu, taheed te diyad migkekampu te napu diye te Ripaim ka punduk te me Pilistihanen. 
Te sika ne timpu, diye si Dabid te malig‑en ne inged, wey diyad te Bitlihim ka kampu te me Pilistihanen. 
Ne nammaraan si Dabid wey migkahi, “Meupiya ubag perem ke due sabeka ne egsakug te weyig diye te belun ne marani te gumawan te Bitlihim!” 
Sikan naa ka miggeles-heles miggendiye ka tatelu ne bahani te kampu te Pilistihanen wey migsakug te weyig diye te belun ne marani te gumawan te Bitlihim. Ne in-uyan dan e ka weyig diye ki Dabid piru ware din seini inuma. Nasi din seini itisa diye te tangkaan te Magbebaye ne Manama isip halad. 
Ne migkahi sikandin, “Magbebaye ne Manama, kene ku iya seini eg-inumen. Su ke eg-inumen ku seini, iling de te in-inum ku ka langesa te me etew ne ware mig-ulung-ulung ne migsakug te weyig.” Purisu ware din seeye inuma. Seeye ka inggimu te tatelu ne bahani. 
Ne si Abisay ne suled ni Huwab ne anak ni Siruya, iyan pangulu te seeye se tatelu ne pulu (30). Nekeyimatey sikandin te tatelu ne gatus (300) ne etew ne iyan din inggamit ka kalawit din. Sikan naa ka migmabantug degma sikandin iling te tatelu ne me bahani. 
Sikandin ka amana ne talahuren te tatelu ne pulu (30) wey neyimu ne pangulu ran, piru ware sikandin nakalagkes te seeye se tatelu ne mabbulut. 
Ne duen pad man‑e mabulut ne etew ne si Binayas ne matig-Kabsiil ne anak ni Huyada. Masulug ka neyimu rin ne mabantug ne himu. Nakapatey sikandin te daruwa ne mabbantug ne bahani ne matig-Muwab. Te timpu te tingmaagsil, migseled sikandin diye te lungag wey nekeyimatey sikandin te liyun diye. 
Ne nakapatey sikandin te mateles ne lukes ne Ihiptuhanen. Minsan miggehen-gen ka Ihiptuhanen te kalawit piru miggendiyaan sikandin ni Binayas ne mig-uyan de te tuked wey in-ahew rin e ka kalawit, wey in-uney rin e himatayi te kalawit din ded. 
Seeye ka inggimu ni Binayas ne anak ni Huyada. Ne neyimu e sikandin ne iling kabantug te tatelu ne me bahani. 
Sikandin ka subla ne mabantug du te Tatelu ne Pulu ne me duma rin, piru ware sikandin nakalagkes kandan. Ne inggimu sikandin ni Dabid ne pangulu te me talagbantey rin. 
Ne seini ka duma ne me bahani: si Asahil ne suled ni Huwab, si Ilhanan ne anak ni Dudu ne matig-Bitlihim, 
si Sama wey si Ilika ne me matig-Harud, 
si Hilis ne matig-Pilit, si Ira ne anak ni Ikkis ne matig-Tikuwa, 
si Abisir ne matig-Anatut, si Mabunay ne matig-Husa, 
si Salmun ne matig-Ahu, si Maharay ne matig-Nitupa, 
si Hilib ne anak ni Baana ne matig-Nitupa red, si Itay ne anak ni Ribay ne matig-Gibiya diye te Binhamin, 
si Binayas ne matig-Piratun, si Hiday ne diye migpuun te napu ne marani te Gaas, 
si Abi-Albun ne matig-Araba, si Asmabit ne matig-Bahurim, 
si Ilyaba ne matig-Saalbun, wey ka me anak ni Hasin, si Diyunatan, 
si Sama ne matig-Harar, si Ahiyam ne anak ni Sarar ne matig-Harar ded, 
si Ilipilit ne anak ni Ahasbay ne matig-Maaka, si Ilyam ne anak ni Ahitupil ne matig-Gilu, 
si Hisru ne matig-Kamil, si Paaray ne matig-Arba, 
si Igal ne anak ni Natan ne matig-Suba, si Bani ne matig-Gad, 
si Silik ne matig-Amun, si Naharay ne matig-Biirut, ne talag-uyan te panganiban ni Huwab ne anak ni Siruya, 
si Ira wey si Garib ne me matig-Hatir, 
wey si Uriyas ne Hitihanen. Tatelu ne pulu wey pitu (37) sikandan langun.