1 Hari.
2.
Te mahaan e egpatey si Dabid, impanpanayan din e ka anak din ne si Sulumun te migkahi, 
“Te kene egkaluhey ne egpatey ad e. Pakannekal ka wey malayata nu ka suman-suman nu. 
Himuwa nu ka igsuhu te Magbebaye ne Manama nu. Ikula nu ka igkeupii rin wey tumana nu ka langun ne balaud din, me suhu, wey me tulumanen din ne nakasulat te Balaud ni Muwisis, eyew eglampus ka te langun ne eggimuwen nu, wey meupiya ka egpabulusan nu. 
Ne emun ke eggimuwen nu sika, egtumanen te Magbebaye ne Manama ka inlalag din keddi ne miggenendue, ‘Kene egkataman ka kabuhalan nu ne eghari te Israil ke eg-ugpe sikandan ne matareng, wey ke egmatinumanen sikandan keddi te intiru ne pusung wey gimukud dan.’ 
“Nakanengneng ka degma te inggimu keddiey ni Huwab ne anak ni Siruya. Inggimatayan din ka daruwa ne pangulu te me sundalu te Israil ne si Abnir ne anak ni Nir, wey si Amasa ne anak ni Hitir. Inggimatayan din sikandan minsan kene ne eleg su ware perem samuk. Ne kuntee sikeddiey e ka nabayungan wey ka narakeselan te inggimu rin. 
Himuwa nu ke nekey ka eleg ne eggimuwen nu kandin, piru kene nud tahari ne egkabuyag pad sikandin human egpatey. 
“Piru tumpisi nu ka me anak ni Barsilay ne matig-Gilyad. Ipalagpu nu sikandan layun keykew te egkeen su in-ay-ayaran a nikandan te timpu ne migpallahuy a puun te suled nu ne si Absalum. 
“Kene nu degma kalingawi si Simii ne anak ni Gira wey sakup te kabuhalan ni Binhamin ne matig-Bahurim, su indilus a tamtamani nikandin te peggendiye ku te Mahanaim. Piru te pegtupang din te Weyig ne Hurdan eyew egpakigkita keddiey, migsaad a kandin te ngaran te Magbebaye ne Manama ne kene ku sikandin eggimatayan. 
Ne kuntee, kene nu sikandin balahara ne kene egkalegparan. Matagseb ka ne etew wey nakanengneng ka ke nekey ka eggimuwen nu kandin. Keilangan ne egpeyimatayan nu sikandin.” 
Nataman, migpatey e si Dabid wey nekegdume e sikandan te me kaap-apuan din, wey diye sikandin isabal te Hirusalim ne siyudad din. 
Mighari sikandin te Israil te hep‑at ne pulu (40) ne leg‑un; pitu ne leg‑un diye te Hibrun, wey tatelu ne pulu wey tatelu (33) ne leg‑un diye te Hirusalim. 
Ne si Sulumun e ka mighari subal te amey rin ne si Dabid, wey amana ne maresen ka peghari din. 
Sabeka ne aldew, miggendiye te ki Batsiba ne iney ni Sulumun, si Aduniyas ne anak ni Hagit. Ne mig-insaan sikandin ni Batsiba, “Keupianan ka innendini nu?” Ne migtabak si Aduniyas, “Uya.” 
Ne migkahi e man‑e sikandin, “Due perem iglalag ku keykew.” Ne mig-inse si Batsiba, “Nekey‑a?” 
Ne migpabulus si Aduniyas, “Minsan sikeykew, nakanengneng ne sikeddi perem ka eghari, wey ka langun ne matig-Israil migpallateng due. Piru ware seini neyitabu su igkeupii te Magbebaye ne Manama ne ka hari ku iya ka eghari. 
Ne kuntee, due ighangyu ku keykew, ne kena a ubag balibari.” Ne mig-insaan e sikandin ni Batsiba, “Nekey‑a?” 
Ne migkahi si Aduniyas, “Kahii nu si Hari Sulumun ne ke egkaayun, igpaasawa rin e keddi si Abisag ne matig-Sunam. Nakanengneng a ne kene ka nikandin egbalibaran.” 
Ne migkahi si Batsiba, “Uya, eglalahan ku ka Hari.” 
Ne miggendiyad e si Batsiba te ki Hari Sulumun eyew eglalahan din meyitenged te inlalag ni Aduniyas kandin. Migsasindeg ka Hari eyew eg-elit-elit kandin wey mig-usengul diye te tangkaan din. Ne miglibed e sikandin migpinnuu diye te trunu rin. Impaangayan din degma te pinnuuwan ka iney rin, wey impapinnuu rin e dapit te kakawanan din. 
Ne migkahi e si Batsiba, “Due ubag deisek ne ighangyu ku keykew wey kene e ma ubag balibari.” Ne migtabak ka Hari te iney rin, “Nekey‑a sika Ine? Kene ku sikeykew egbalibaran.” 
Ne migkahi e man‑e si Batsiba, “Ipaasawa nud te kakey nu ne si Aduniyas si Abisag ne matig-Sunam.” 
Ne migtabak si Hari Sulumun, “Mania te igkeupii nu ne igpaasawa ku si Abisag ki Aduniyas? Kema ke igkeupii nu man‑e ne igbehey kud kandin ka migharian su kakey ku ma sikandin, wey egpangabangan sikandin ni Abiyatar ne talagpanubad wey ni Huwab ne anak ni Siruya!” 
Ne migsaad wey migpahunlibet e si Hari Sulumun te ngaran te Magbebaye ne Manama ne egtamtamanan sikandin eglegpari te Manama ke kene din eggimatayan si Aduniyas puun te inhangyu din. 
Ne migkahi sikandin, “Ka manekal ne Magbebaye ne Manama ka miggimu keddi ne Hari subal te amey ku. Intuman din ka saad din ne egpuun te kabuhalan ku ka egkengeyimu ne Hari te Israil. Igsaad ku ne te seini ne aldew, egpatey iya si Aduniyas!” 
Ne insuhu e ni Hari Sulumun si Binayas eyew eggimatayan si Aduniyas, wey miggimatayan din en iya sikandin. 
Ne migkahiyan e te Hari ka talagpanubad ne si Abiyatar, “Uli kad e diye te inged nu diye te Anatut. Likes ka perem degma ne eggimatayan piru kene ku pad sikeykew egpeyimatayan kuntee, su sikeykew ka mig-uyan te Tahuanan te Kasabutan te Magbebaye ne Manama te duen pad ka amey ku, wey mig-unungan nu sikandin te me peg-antus din.” 
Ne impaawe e iya ni Sulumun si Abiyatar te katungdanan din isip talagpanubad te Magbebaye ne Manama, wey natuman e ka ingkahi te Manama diye te Silu meyitenged te me kabuhalan ni Ili ne talagpanubad. 
Te pegkanengnengi ni Huwab te neyitabu, miggendiyad sikandin te Balungbalung te Magbebaye ne Manama, wey miggen-gen diye te me sungey-sungey te altar. (Migbulig si Huwab ki Aduniyas ne egkeyimu ne Hari, piru ware din bulihi si Absalum.) 
Te nanangenan e degma si Hari Sulumun te miggendiye si Huwab te Balungbalung wey migparani diye te altar, insuhu din e si Binayas te migkahi, “Hendiyei nu si Huwab wey himatayi nud e sikandin.” 
Ne miggendiyad e si Binayas te Balungbalung wey migkahiyan din si Huwab, “Huwab, igpalihawang ka te Hari!” Ne migtabak si Huwab, “Kena a eglihawang. Kayi e re iya egpatey!” Ne miglibed e si Binayas diye te Hari wey inlalahan din e sikandin te ingkahi ni Huwab. 
Ne migkahiyan e si Binayas te Hari, “Himatayi nud iya si Huwab diye su sikan ma ka igkeupii rin. Ne ilebeng nud sikandin eyew egkaawe e ka sale te me kabuhalan te amey ku puun te peggimatey rin te me etew ne ware sale. 
Eglegparan sikandin te Magbebaye ne Manama te peggimatey rin te anak ni Nir ne si Abnir ne pangulu te me sundalu te Israil, wey te anak ni Hitir ne si Amasa ne pangulu te me sundalu te Huda. Impangimatayan din ka daruwa ne matareng pad kandin, wey inggimu rin seini ne ware kalintahaan te amey ku ne si Dabid. 
Ka legpad te hinimuwan ni Huwab eglibed diye te kandin wey te kabuhalan din te ware egtamanan. Piru egbehayan mule te Magbebaye ne Manama te keupianan ka kabuhalan ni Dabid wey ka peghari din te ware egtamanan.” 
Ne miglibed e si Binayas diye te Balungbalung wey inggimatayan din en iya si Huwab. Ne inlebeng dan e sikandin diye te ugpaan din diye te disirtu. 
Ne inggimu e te Hari ne pangulu te me sundalu si Binayas subal ki Huwab, wey si Saduk ne talagpanubad ka impasubal rin ki Abiyatar. 
Ne impeumew e te Hari si Simii wey ingkahiyan din, “Himu ka te baley kayi te Hirusalim ne eg-ugpaan nu, wey kene ka awe kayi te siyudad. Kene ka hendiye te lein ne inged. 
Emun ke eggipanew ka wey ke eglapas ka te weyig te Kidrun, egpatey ka iya, wey sikeykew red ka egkasenditan ke egpatey ka.” 
Ne migtabak si Simii, “Meupiya sika ahalen, eggimuwen ku ka inlalag nu keddiey.” Ne naluhey sikandin ka mig-ugpe diye te Hirusalim. 
Piru te peglihad te tatelu ne leg‑un, namallahuy ka daruwa ne uripen ni Simii wey migmangendiye te Hari te Gat ne si Akis ne anak ni Maaka. Te nanengnengan din e ne diye sikandan te Gat, 
migtaggel e sikandin wey mig-untud e te kudde din, wey migpeendiyad e sikandin ki Hari Akis diye te Gat eyew egpamitew te me uripen din. Nakita rin sikandan wey induma rin e te eglibed diye te Hirusalim. 
Te pegkanengnengi ni Sulumun ne nakalibed e si Simii ka miggendiye te Gat, 
impeumew rin e sikandin wey migkahiyan, “Impasaad ku sikeykew te ngaran te Magbebaye ne Manama ne kene ka egkaayun ne eg-awe te Hirusalim wey ke eggendiye naa te lein ne inged. Impanpanayan ku sikeykew ne emun ke eggimuwen nu sika egpatey ka iya. Migpalintutuu ka keddiey wey migkahi ka ne egtumanen a nikeykew. 
Na, mania te ware nu tumana ka insaad nu te Magbebaye ne Manama wey ka insuhu ku keykew? 
Nakataha ka te langun ne mareet ne inggimu nu diye te amey ku ne si Dabid. Eglegparan ka te Magbebaye te hinimuwan nu. 
Piru egpanalanginan a nikandin, wey eggimuwen din ne maresen te ware egtamanan ka migharian te amey ku.” 
Ne insuhu e te Hari si Binayas eyew egpeyimatayan si Simii. Ne migmaresen pad iya ka peg-uyan ni Sulumun te migharian din.