1 Hari.
6.
Te igkarangeb ne bulan ne egngaranan te Sib, te igkeep‑at e ne leg‑un te peghari ni Sulumun te Israil, te hep‑at e ne gatus wey walu ne pulu (480) ne leg‑un ka miglihad puun te peg-awe te me Israilita te Ihiptu, impabunsuran e ni Sulumun te egpeyimu ka timplu te Magbebaye ne Manama. 
Ne ka timplu ne impeyimu ni Hari Sulumun para te Magbebaye, daruwa ne pulu wey pitu (27) ne mitrus ka kalayat, siyam ne mitrus ka kaluag, wey sapulu wey tatelu wey liware (13.5) ne mitrus ka katikang. 
Ne siyam ne mitrus ka kalayat te likansu diye te tangkaan te timplu, iling te kaluag te timplu, wey hep‑at wey liware ne mitrus ka kaluag te likansu. 
Ne impeyimuwan degma ni Sulumun te me bintana ka timplu ne malig-et diye te lihawangan piru maluag ka diye te seled. 
Ne impeyimuwan din man‑e te me sinabeng ka me kakiliran wey liyu te timplu. Tatelu ne andana seeye ne insumpul te alabat. 
Ne tagse sinabeng te an-anayan ne andana, daruwa wey liware ne mitrus ka kaluag, tatelu ne mitrus ka kaluag te tagse sinabeng te igkarangeb ne andana, wey tatelu ne mitrus wey liware ka kaluag te tagse sinabeng te kinaribabawan ne andana. Impeiling te haheran ka alabat dapit te lihawangan te timplu ne insumpulan te me sinabeng eyew kenad egpakatupu te alabat ka me ketal. 
Ne ka me batu ne inggamit te eggimu te timplu, impanapsapan e daan te diye pad te in-angayan kayi. Purisu, warad e egkarineg ne dahing te buntuk, wasey, wey minsan nekey ne himan ne putew te pegpangimu ran e te timplu. 
Ne diye nakarapit te igkakawanan ne balabahan ka gumawan te an-anayan ne andana, wey innaheranan seini peendiye te igkarangeb wey igkatelu ne andana. 
Te neimpusan e ka timplu, impabengelan e ni Hari Sulumun paakebi te tabla ne sidar ka atep. 
Insumpul red te egbebaley te timplu ka tatelu ne andana ne sinabeng ne iyan ingketal ka geed ne sidar. Daruwa wey liware ne mitrus ka katikang te tagse sinabeng. 
Ne impanengneng te Magbebaye ne Manama si Sulumun, 
“Emun ke egtumanen nu ka me tulumanen ku, me suhu ku, wey ka langun ne balaud ku, egtumanen ku ka insaad ku te amey nu ne si Dabid. 
Eg-ugpa a duma te me Israilita kayi te timplu ne inggimu nu wey kene ku sikandan eg-engkeran.” 
Nataman, neimpusan en iya ka timplu ne impeyimu ni Sulumun. 
Ne impaakeban din te tabla ne sidar ka seled te timplu, puun te seeg taman diye te kisami, wey tabla ne sipris ka impaseeg din. 
Ne migpeyimu sikandin te sinabeng diye te ledled te timplu ne egngaranan te Amana ne Matulus ne Sinabeng ne siyam ne mitrus ka kalayat. In-alabatan seini te tabla ne sidar puun te seeg taman diye te kisami. 
Ne sapulu wey walu (18) ne mitrus ka kalayat te maluag ne libulunganan ne egkatangkaan te Amana ne Matulus ne Sinabeng. 
Ne impangakeban te tabla ne sidar ka me alabat diye te seled te timplu, purisu kene egkakita ka me batu. Impandayan-dayanan man‑e seini te impangulit ne me larawan te upu wey me bulak ne migpamukadkad. 
Ne inteil ni Sulumun ka Amana ne Matulus ne Sinabeng eyew diye din igtahu ka Tahuanan te Kasabutan te Magbebaye ne Manama. 
Siyam ne mitrus ka kalayat, ka kaluag, wey ka katikang te seini ne sinabeng. Ne impepamulitan din te neelin ne bulawan ka me alabat wey ka kisami. Impepamulitan din degma te bulawan ka altar ne neelin ne kayu ne sidar. 
Ne impepamulitan din te bulawan ka seled te timplu, wey migpeyimu man‑e sikandin te bulawan ne keddina ne imbitul diye te bayaanan peendiye te Amana ne Matulus ne Sinabeng. 
Sikan naa, neimpusan din e te egpepamulit te bulawan ka intiru ne seled te timplu wey ka altar ne diye te seled te Amana ne Matulus ne Sinabeng. 
Ne impatahuan ni Sulumun te daruwa ne kirubin ka Amana ne Matulus ne Sinabeng. Me lalimma ne mitrus ka katikang te inggimu ne me kirubin ne neelin ne kayu ne ulibu. 
Daruwa wey liware ne mitrus ka kalayat te tagse pakpak, sikan naa ka lalimma ne mitrus ka kalayat te nekeglimang ne me pakpak. 
Nekeg-iling ka ulaula wey karakel te daruwa ne kirubin, 
ne me lalimma ne mitrus ka katikang te tagse sabeka. 
Diye pegdangdanga ni Sulumun ka daruwa ne kirubin te seled te Amana ne Matulus ne Sinabeng. Nekeuma diye te alabat ka tagse limang te me pakpak dan ne nenabbelat, wey nekegtemu man‑e ka limang ne me pakpak dan diye te taliware. 
Ne impepamulitan din degma te bulawan ka daruwa ne kirubin. 
Ne impandayan-dayanan din ka langun ne alabat te daruwa ne sinabeng te impangulit ne larawan te me kirubin, palmira wey me bulak ne migpamukadkad. 
Ne impepamulitan man‑e ni Sulumun te bulawan ka me seeg te daruwa ne sinabeng. 
Ne impeyimuwan din te daruwa ne lekeb ne neelin ne ulibu ka gumawan te Amana ne Matulus ne Sinabeng, wey insungkalehan seini te me sungkaleg ne lalimma se pikungan. 
Ne imparayan-dayanan din te impangulit ne larawan te me kirubin, palmira, wey me bulak ne migpamukadkad ka daruwa ne lekeb. Impepamulitan din man‑e seini langun te bulawan. 
Impeyimuwan pad man‑e ni Sulumun ka gumawan te timplu te me sungkaleg ne kayu ne ulibu ne hep‑at se pikungan. 
Ne migpeyimu man‑e sikandin te daruwa ne lekeb ne neelin ne kayu ne sipris. Egkalupi-lupi ka tagse sabeka, 
wey impakulitan din degma seini te larawan te me kirubin, palmira, wey me bulak ne migpamukadkad ne in-ay-ayaran pamuliti te bulawan. 
Ne impeyimuwan din man‑e te maluag ne libulunganan diye te egkatangkaan te timplu. In-alad seini te impanapsapan ne me batu ne tigtatelu ne untud ne in-unturan man‑e te me kayu ne sidar. 
Te igkeep‑at ne leg‑un te peghari ni Sulumun, te igkarangeb ne bulan ne egngaranan te Sib, nakasasindeg e ka pabunsuran te timplu te Magbebaye ne Manama. 
Te igkasapulu wey sabeka (11) ne leg‑un te peghari ni Sulumun, te igkawalu ne bulan ne egngaranan te Bul, neimpusan e ka timplu. Ne ka langun ne neyimu nekeiling iya ke immenu seini te egplanu. Migginguma te pitu ne leg‑un human neimpusi ka timplu.