1 Hari.
11.
Amana ne masulug ka lapu ne me malitan ne inggeyinawaan ni Sulumun. Intimulan din pad man‑e ka asawa rin ne anak te Hari te Ihiptu te me malitan ne matig-Muwab, matig-Amun, matig-Idum, matig-Sidun, wey me matig-Hiti. 
Sika ka me inged ne tapey e ipaney-paney te Magbebaye ne Manama diye te me Israilita te migkahi, “Kene kew egkaayun ne egpangasawa kandan wey kene degma sikandan egkaayun ne egpangasawa kaniyu, su egkeinniyat kew iya nikandan ne egsimba te me diyus-diyus dan.” Piru inggeyinawaan ded iya ni Sulumun ka me malitan. 
Ne pitu ne gatus (700) ka me asawa ni Sulumun ne me anak te me Hari, wey tatelu ne gatus (300) ka me duwey rin. Ne ka me asawa rin iya ka nakapeinniyug kandin te Manama. 
Te nabuyag e si Sulumun, napanulu e sikandin te me asawa rin ne egsimba te me diyus-diyus dan. Warad nasabeka ka pusung din diye te Magbebaye ne Manama rin; kene ne iling te amey rin ne si Dabid. 
Migsimbe e sikandin ki Astarut, ka diyus-diyus te me Sidunihanen, wey ki Milkum, ka subla ne malindit ne diyus-diyus te me matig-Amun. 
Mareet naan de iya ka inggimu ni Sulumun diye te Magbebaye ne Manama, wey ware sikandin migmatinumanen te Manama. Ware sikandin mig-iling te amey rin ne si Dabid. 
Ne diye te bubungan dapit te igsile te Hirusalim, miggimu si Sulumun te panubaran para ki Kimus, ka subla ne malindit ne diyus-diyus te me matig-Muwab, wey ki Muluk, ka subla ne malindit ne diyus-diyus te me matig-Amun. 
Ne inggimuwan din degma te me panubaran ka langun ne lapu ne me asawa rin, eyew diye sikandan egpanutung te insinsu wey egpanubad te me diyus-diyus dan. 
Purisu, nabelu e ka Magbebaye ne Manama ki Sulumun su mig-inniyuhan din man e ka Manama te Israil ne migpakita kandin te kararuwa, 
wey migpaney-paney kandin ne kene egsimba te me diyus-diyus. Ware tumana ni Sulumun ka insuhu kandin te Magbebaye ne Manama. 
Sikan naa ka ingkahiyan e si Sulumun te Magbebaye ne Manama, “Puun su migsuman-suman ka ne kene egtuman te kasabutan ku keykew, wey ware nu tumana ka me balaud ku ne igpatuman ku keykew, eggawien kud ka migharian puun keykew wey igbehey kud seini te upisyal nu. 
Piru tenged ki Dabid ne amey nu, kene ku seini eggimuwen taheed te manekal ke pad. Wey kud seini eggimuwa ke iyan e eghari ka anak nu. 
Piru kene ku eggawien ka intiru ne migharian puun kandin, su egbehayan ku red sikandin te sabeka ne kabuhalan ne egpuun te me anak ni Hakub tenged te suluhuanen ku ne si Dabid wey tenged te Hirusalim, ka siyudad ne in-alam ku.” 
Ne impakuntere e te Magbebaye ne Manama si Sulumun ki Hadad ne Idumihanen. Kabuhalan sikandin te Hari te Idum. 
Su dengan te timpu ne migpakiggira si Dabid te me matig-Idum, migtakereg si Huwab ne pangulu te me sundalu eyew eglebeng te migpatey ne me sundalu. Ne te seeye ne timpu, impeyimatayan e ni Dabid ka langun ne lukes diye te Idum. 
Su mig-uugpe mem pad si Huwab diye duma te me Israilita te hen‑em ne bulan, taman te naamin dan e neyimatayi ka langun ne lukes diye te Idum. 
Ware neyimatayi si Hadad su migpallahuy sikandin diye te Ihiptu duma te me Idumihanen ne upisyal te amey rin. Deisek pad si Hadad te seeye ne timpu. 
Te nekeume e sikandan diye te Midiyan puun te Idum, migleus e sikandan diye te Paran. Ne migdurume e sikandan te me etew puun te Paran peendiye te Paraun ne Hari te Ihiptu, wey imbehayan e sikandan te baley, egkakeen, wey tane. 
Amana ikeupii te Paraun si Hadad. Purisu impaasawaan e sikandin te Paraun te ipag din ne hari ni Rayna Tapinis. 
Nataman, naberes e ka asawa ni Hadad, wey inlesutan e te lukes ne ingngaranan ki Ginubat. Ne ka rayna ka miglitan kandin diye te palasyu te Paraun. Ne diyad en iya mig-ugpe si Ginubat duma te me anak te Paraun. 
Nataman, duen e guhuren ne migpatey e si Dabid wey nekegdume e sikandin te me kaap-apuan din, wey si Huwab ne pangulu te me sundalu. Ne ingkahiyan e ni Hadad ka Paraun, “Peulia ad ubag diye te inged ku.” 
Piru ingkahiyan sikandin te Paraun, “Mania? Due ware ku ikabehey keykew—sikan naa ka eg-uli kad e diye te inged nu?” Ne migtabak si Hadad te Paraun, “Ware. Piru ipeuli e re iya nikeykew.” 
Ne impakuntere e degma te Magbebaye ne Manama si Sulumun ki Risun ne anak ni Ilyada. Migpallahuy si Risun puun te ahalen din ne si Hadadisir ne Hari te Suba. 
Ne inlibulung din e ka me etew wey miggimu e sikandin te punduk te me ribildi, wey sikandin ka neyimu ne pangulu. Te natalu e ni Dabid ka me sundalu ni Hadadisir, miggendiyad si Risun te Damasku duma te me etew rin, wey diyad e sikandan mig-ugpe. Ne inggimu e sikandin ne Hari te me etew rin te siyudad te Damasku. 
Neyimu si Risun ne Hari te Sirya, wey neyimu ne kuntere te Israil taman te manekal pad si Sulumun. Ne indereetan din ka Israil wey intimulan din ka pegkuntere ni Hadad kayi. 
Ne duen pad man‑e etew ne migkuntere ki Hari Sulumun ne iyan si Hirubuwam ne sabeka te me upisyal rin. Anak sikandin ni Nibat ne matig-Sirida ne sakup te Ipraim. Nabalu e ka iney rin ne egngaranan ki Siruwa. 
Ne seini ka egpuunan te peg-ehet din te Hari: impeyimu ni Sulumun ka Milu, wey impeupianan din ka matikang wey makepal ne me alad ne batu te Siyudad ni Dabid ne amey rin. 
Amana egkateu ne kanakan si Hirubuwam, wey nakita ni Sulumun ne amana sikandin ne mabasuk. Sikan naa ka impiyalan din e sikandin te langun ne migtrabahu diye te me ugpaan te kabuhalan enni Ipraim wey Manasis ne me anak ni Husi. 
Sabeka ne aldew, miggipanew si Hirubuwam puun te Hirusalim. Ne diye te dalan, nasinug-ung din ka prupita ne matig-Silu ne egngaranan ki Ahiyas. Migsaluub si Ahiyas te iyam ne diyakit, wey sikandan de degma se daruwa diye te deralanen. 
Nataman, inluung e ni Ahiyas ka iyam ne diyakit ne insaluub din wey impanggisi din e seini te sapulu wey daruwa (12) ne gisi. 
Ne ingkahiyan din si Hirubuwam, “Pammineg ka, kua nu ka sapulu ne gisi, su migkahi keykew ka Magbebaye ne Manama te Israil, ‘Mahaan kud eggawia ka migharian puun ki Sulumun, wey igbehey ku keykew ka sapulu ne me kabuhalan ne egpuun te me anak ni Hakub. 
Piru egbehayan ku red te sabeka ne kabuhalan ne egpuun te me anak ni Hakub si Sulumun tenged te suluhuanen ku ne si Dabid, wey tenged te Hirusalim, ka siyudad ne in-alam ku puun te intiru ne inged te Israil. 
Eggimuwen ku seini su mig-inniyuhan ad ma ni Sulumun wey migsimbe e sikandin ki Astarut ne diyus-diyus te me Sidunihanen, ki Kimus ne diyus-diyus te me matig-Muwab, wey ki Milkum ne diyus-diyus te me matig-Amun. Warad e mig-ikul si Sulumun te igkeupii ku—ware miggimu sikandin te igkeele ku wey ware din e tumana ka me balaud ku wey ka me suhu ku. Kene ne iling sikandin te amey rin ne si Dabid. 
Piru kene ku eggawien ka intiru ne migharian puun kandin—igpahari ku red sikandin taman te egpatey e. Eggimuwen ku seini tenged te suluhuanen ku ne si Dabid, ka in-alam ku ne matinumanen te me balaud ku wey te me suhu ku. 
Piru eggawien kud ka dakel ne baad te migharian puun te anak din, wey igbehey ku keykew ka sapulu ne kabuhalan ne egpuun te me anak ni Hakub. 
Piru egbehayan ku red te sabeka ne kabuhalan ne egpuun te me anak ni Hakub ka anak ni Sulumun eyew kene ded egkaawaan te kabuhalan ka suluhuanen ku ne si Dabid ne eghari te Hirusalim, ka siyudad ne in-alam ku eyew egsimbaan keddi. 
Ne sikeykew Hirubuwam, eggimuwen ku sikeykew ne Hari te Israil, wey egmandu ka te langun ne inged ne igkeupii nu ne egmanduan. 
Ne emun ke eg-iling ka ki Dabid ne egtuman te me suhu ku, wey eg-ikul te egkeupii ku, wey eggimu te igkeele ku, egdumaan ku iya sikeykew. Eggimuwen ku sikeykew ne Hari te Israil. Ne iling te inggimu ku ki Dabid, ka me kabuhalan nu iya degma ka eghari subal keykew te malayat ne timpu. 
Ne tenged te sale ni Sulumun, eglegparan ku ka me kabuhalan ni Dabid, piru kene ne taman te ware egtamanan.’” 
Sikan naa ka eggimatayan e perem ni Sulumun si Hirubuwam, piru nakapalahuy sikandin diye ki Hari Sisak diye te Ihiptu, wey diye pad sikandin mig-ugpe taman te migpatey e si Sulumun. 
Ka duma pad ne guhuren ni Sulumun wey ka inggimu rin, wey te katagseb din, nasulat diye te libru ne insulatan te neneyimu ni Sulumun. 
Diye si Sulumun mig-ugpe te Hirusalim te timpu ne mighari sikandin te intiru ne Israil te hep‑at ne pulu (40) ne leg‑un. 
Ne migpatey sikandin wey nekegdume e sikandin te me kaap-apuan din, wey diye isabal te Siyudad ni Dabid ne amey rin. Ne si Rihubuwam ne anak din ka migsubal kandin mighari.