1 Hari.
13.
Ne due sabeka ne prupita ne insuhu te Magbebaye ne Manama puun te Huda peendiye te Bitil. Te pegginguma rin, diye ded iya si Hirubuwam te tangkaan te altar ka migsasindeg ne egtutung te insinsu. 
Insuhu te Magbebaye ne Manama ka prupita eyew egkahi diye te altar: “He altar, altar! Migkahi ka Magbebaye ne Manama: Egkeetew ka kabuhalan ni Dabid ne egngaranan ki Husiyas, wey igmanubad din te seini ne altar ka me talagpanubad ne egpamakey diye te me panubaran ne me bubungan wey egmanutungen din ka me tul‑an te etew kayi ne altar.” 
Ne migpabulus ka prupita ne migkahi, “Ne seini ka palinneu ne ka Magbebaye ne Manama ka migsuhu keddi ne eglalag. Egkahuhus seini ne altar wey egkapayatpat ka me abu.” 
Te narineg ni Hari Hirubuwam ka inlalag te prupita, intinuru din e sikandin wey migkahi, “Dakepa niyu sikandin!” Ne dutu, migkeleg e ka belad te Hari ne intinuru din te prupita wey kene din e seini egkakengkeng. 
Ne miglihad ka me leg‑un, nahuhus en iya ka altar wey napayatpat e ka me abu diye te tane su seeye iya ka palinneu ne impalalag te Magbebaye ne Manama ka prupita. 
Ne ingkahiyan ni Hari Hirubuwam ka prupita, “Iampu a ubag nikeykew diye te Magbebaye ne Manama nu, wey kahii nu sikandin ne egbawian din e ka belad ku!” Sikan naa ka mig-ampu e ka prupita diye te Magbebaye ne Manama, wey neulian e ka belad te Hari. 
Ne migkahi e ka Hari diye te prupita, “Duma ka keddiey diye te baley ku wey keen ke pa, wey egdasahan ku man‑e sikeykew.” 
Ne migtabak ka prupita, “Minsan pad igbehey nu keddiey ka baad te karatuan nu, kena a egduma keykew, wey kena a egkeen wey ke eg-inum naa kayi te seini ne inged. 
Su impanpanayan a te Magbebaye ne Manama ne kena a egpakeenen wey ke egpeinumen naa kayi, wey kena a egpeikulen te dalan ne imbayaan ku te egpeendini.” 
Sikan naa ka warad mig-ikul sikandin diye te dalan ne imbayaan din te peg-uli din—diyad e sikandin migbaye te lein ne dalan. 
Te seeye ne timpu, due buyag ne prupita ne mig-ugpe diye te Bitil. Nataman, miggendiyaan e sikandin te me anak din ne me lukes wey ingguhuran dan e sikandin meyitenged te langun ne inggimu te prupita ne migpuun te Huda diye te Bitil te seeye ne aldew. Ingguhud dan degma ka langun ne inlalag din ki Hari Hirubuwam. 
Ne mig-insaan e sikandan te amey ran, “Hendei sikandin migbaye te miggipanew e sikandin?” Ne impanulu dan e kandin ka dalan ne imbayaan te prupita. 
Ne ingkahiyan te prupita ka me anak din, “Sakangi niyu ka asnu.” Ne insakangan dan en iya ka asnu wey mig-untud e ka amey ran. 
Inlupug din e ka prupita ne matig-Huda, wey diye din neumeyi sikandin te lebut te uk ne kayu ka migpinnuu. Ne mig-insaan din e ka prupita, “Sikeykew iya ka prupita ne matig-Huda?” Ne migtabak sikandin, “Uya, sikeddi iya.” 
Ne migkahi e ka buyag ne prupita kandin, “Duma ka keddi, wey keen ke pa diye te baley.” 
Piru migtabak mule ka prupita ne matig-Huda te migkahi, “Kena a egduma keykew, wey kena a eglagpu keykew egkeen wey ke eg-inum naa te weyig kayi te seini ne inged 
su impanpanayan a te Magbebaye ne Manama ne kene egkeen wey ke eg-inum naa kayi, wey kena a egpeikulen te dalan ne imbayaan ku te egpeendini.” 
Ne migkahi e kandin ka prupita ne matig-Bitil, “Sabeka a degma ne prupita iling keykew, wey due sabeka ne panalihan ne insuhu te Magbebaye ne Manama eyew egkahiyan a te igparuma ka diye te baley ku eyew egpakakeen wey egpekeinum ka.” Kunaleg te mig-uubat bes ka buyag ne prupita kandin. 
Sikan naa ka migdume en iya ka prupita ne matig-Huda te miglibed diye te baley te buyag ne prupita, wey migkeen wey mig-inum e sikandin. 
Ne taheed te egkekeen sikandan, impanengneng te Magbebaye ne Manama ka buyag ne prupita, 
wey miglalahan din e ka prupita ne matig-Huda, “Migkahi ka Magbebaye ne Manama te insupak nu sikandin wey ware nu tumana ka insuhu din keykew. 
Miglibed ka wey migkeen ka kayi te inged ne impaney-paney te Magbebaye ne Manama keykew ne kene egkaayun ne egkeenan nu. Ne puun due, emun ke egpatey kad e, kene ka iglebeng diye te lebenganan te me kaap-apuan nu.” 
Te nekeimpus e sikandan ka migkeen wey mig-inum, insakangan e te buyag ne prupita ka asnu eyew eg-unturan te prupita ne matig-Huda ne ingginggat din. 
Te egpahundalan e sikandin, insinug-ung e sikandin te liyun wey innimatayan e sikandin. Ne diye de iya te dalan nekeyibat ka lawa rin, ne diye de iya degma migsasindeg ka asnu wey ka liyun te dulug te lawa rin. 
Ne due me etew ne miglihad wey nakakita te minatey diye te dalan wey te liyun ne migsasindeg diye te dulug kayi. Migleus e sikandan diye te Bitil, ka inged ne in-ugpaan te buyag ne prupita, wey impangguhud dan e ka nakita ran. 
Te nakatahe e ka buyag ne prupita te neyitabu, migkahi e sikandin, “Sika ka prupita ne migsupak te suhu te Magbebaye ne Manama. Sikan naa ka impalusuran sikandin te Magbebaye te liyun eyew eggimatey kandin su sika iya ka inlalag din kandin.” 
Ne ingkahiyan din e ka me anak din, “Sakangi niyu ka asnu ne eg-unturan ku.” Ne insakangan dan en iya ka asnu. 
Ne miggipanew e sikandin wey nakita rin en iya ka lawa te prupita ne nekeyibat diye te dalan, wey ka asnu wey liyun ne migsasindeg diye te dulug kayi. Ware ma mule keena te liyun ka minatey wey ke inggimatayan naa ka asnu. 
Ne inggenat e te buyag ne prupita ka minatey, indulan din seini te asnu wey in-uyan din e te eglibed diye te Bitil eyew egdamahen dan pad human iglebeng. 
Nataman, inlebeng din e ka minatey diye te lebenganan te kaap-apuan din, wey migsinehew sikandin wey ka me anak din te migkahi, “Keyid‑u naan de iya ki suled!” 
Pegkeimpus te eglebeng, ingkahiyan e te prupita ka me anak din, “Emun ke egpatey ad e, kayi e re nikaniyu ilebeng wey ipewulid niyu ka lawa ku te lawa rin. 
Su egkatuman iya ka me guhuren ne impalalag te Magbebaye ne Manama kandin meyitenged te altar diye te Bitil, wey te langun ne me panubaran diye te me bubungan te inged te Samarya.” 
Ne minsan pad iling e dutu ka neyitabu, ware inniyuhi te Hari te Israil ne si Hirubuwam ka mareet ne me himu rin. Migpabulus-bulus sikandin ka migpangalam te me talagpanubad puun te langun ne etew eyew egpamakey diye te me panubaran ne diye te me bubungan. Eggimuwen din ne talagpanubad ka minsan hentew ne egkeupian ne egkeyimu ne talagpanubad. 
Ne seini ne himu ni Hirubuwam ka egpuunan ne nakasale ka kabuhalan din, wey migpuunan te karereetan wey pegkahuhus te migharian din.