1 Hari.
14.
Te seeye ne timpu, migderalu si Abiyas ne anak ni Hari Hirubuwam. 
Ne ingkahiyan ni Hirubuwam ka asawa rin, “Hendiye ke pa ubag te Silu ne in-ugpaan ni Ahiyas ne prupita. Sikandin ka migkahi ne sikeddiey ka egkeyimu ne Hari te Israil. Kene ka peila te me etew ne sikeykew ka asawa ku. 
Uyani nu sikandin te sapulu ne timman ne paan, me mamun ne mannipis, wey sabeka ne banga ne teneb. Insei nu naa sikandin ke nekey ka egkeyitabu te anak ta, wey eglalahan ka nikandin.” 
Ne miggendiyad iya ka asawa ni Hirubuwam te baley ni Ahiyas diye te Silu. Kenad e egpakakita si Ahiyas su buyag e amana sikandin. 
Piru ingkahiyan e daan te Magbebaye ne Manama si Ahiyas te egginguma ka asawa ni Hirubuwam eyew eg-inse meyitenged te anak dan ne migderalu. Ne ingkahiyan e te Magbebaye si Ahiyas ke nekey ka iglalag din. Te nekeume e ka asawa ni Hirubuwam, ware sikandin migpeila ke hentew sikandin. 
Piru te pegkarineg ni Ahiyas te dahing te sikalan te asawa ni Hirubuwam te egseled te gumawan, migkahi e sikandin, “Lasud ka. Nakataha a ne sikeykew ka asawa ni Hirubuwam. Mania te kene ka egpeila ne sikeykew sika? Na, due mareet ne igpahuhud te Manama keddi diye te keykew. 
Uli kad e wey kahii nu si Hirubuwam te seini ka inlalag kandin te Magbebaye ne Manama, ka Manama te Israil, ‘In-alam ku sikeykew puun te langun ne etew wey inggimu ku sikeykew ne pangulu te keet-etawan ku ne me Israilita. 
Inggawi ku ka migharian puun te kabuhalan ni Dabid wey imbehey kud seini keykew. Piru kene ka ne iling te suluhuanen ku ne si Dabid ne migtuman te me suhu ku, wey migpalintutuu keddiey te intiru ne pusung din. Iyan din de inggimu layun ka egpakapahale keddiey. 
Subla pad ka sale ne neyimu nu du te sale te nenekewun‑a keykew mighari. Mig-inniyuhan ad e nikeykew, wey migpangimu ke pad iya man‑e te me diyus-diyus wey putew ne me larawan, sikan naa ka nalangetan a keykew. 
Ne puun due, igpasalerep kud te karereetan ka kabuhalan nu wey egpangimatayan kud ka langun ne lukes ne kabuhalan nu, uripen ma wey se kene. Egdereetan kud iya ka kabuhalan nu, iling te egsilaban ne lapek ne ware egkengasame. 
Ne egpangeenen te me asu ka langun ne egpamatey diye te siyudad, wey egpangeenen te me manuk-manuk ka egpamatey diye te unayan, su sikeddiey ka Magbebaye ne Manama ka miglalag kayi.’” 
Ne migpabulus si Ahiyas ka migkahi te asawa ni Hirubuwam, “Ne, uli kad e diye te baley niyu. Ne emun ke egginguma kad e diye te siyudad niyu, egpatey e ka anak nu. 
Ne egdamag kandin ka langun ne etew te igkahibang ne balabahan ne migharian te Israil, wey iglebeng e sikandin. Sikandin de ka kabuhalan ni Hirubuwam ne igpakaayad-ayad iglebeng, su sabsabeka rin de te ingkahale te Magbebaye ne Manama te Israil. 
Timul pad due, egpaharian te Magbebaye ne Manama ka Israil te Hari ne egdereet te peghari te kabuhalan ni Hirubuwam, wey egkeyitabu e sika kuntee. 
Eglegparan te Magbebaye ne Manama ka Israil, wey egpekeiling sikandin te egpakalampes-lampes ne lelasangen diye te weyig. Ne egpaaween din e ka me etew puun kayi te matubung ne tane ne imbehey rin te me kaap-apuan dan. Egmegsuwayen din sikandan taman diye te kewun‑aan te Weyig ne Iyupratis, su in-undulan dan ma ka langet te Magbebaye ne Manama te peggimu ran te me sungkaleg te diyus-diyus ne si Asira. 
Eg-inniyuhan e sikandan te Magbebaye ne Manama tenged te me sale ni Hirubuwam ne iyan egpuunan ne nakasale ka me matig-Israil.” 
Ne mig-uli en iya ka asawa ni Hirubuwam diye te Tirsa. Pegginguma rin de iya te gumawan te baley, migpatey e ka bate. 
Ne migdamag ka langun ne Israilita kandin, wey inlebeng dan e sikandin. Ne iling iya rue ka inlalag te Manama ki Ahiyas, ka prupita ne suluhuanen din. 
Ne ka duma pad ne neyimu ni Hirubuwam meyitenged te pegpakiggira rin wey te peghari din, nakasulat diye te Sulatanan te me Guhuren te me Hari te Israil. 
Daruwa ne pulu wey daruwa (22) ne leg‑un ka peghari ni Hirubuwam. Nataman, migpatey e sikandin wey nekegdume e sikandin te kaap-apuan din, wey si Nadab ne anak din ka migsubal kandin mighari. 
Ne mighari degma diye te Huda si Rihubuwam ne anak ni Sulumun. Hep‑at ne pulu wey sabeka (41) ka idad din te neyimu sikandin ne Hari te Huda. Mighari sikandin te sapulu wey pitu (17) ne leg‑un diye te Hirusalim, ka siyudad ne in-alam te Magbebaye ne Manama puun te langun ne kabuhalan ne egpuun te me anak ni Hakub eyew egsimbaan kandin. Egngaranan ki Naama ka iney rin ne Amunihanen. 
Ne mareet naan de iya ka inggimu te keet-etawan te Huda diye te Magbebaye ne Manama, wey subla pad ka inggimu ran du te inggimu te me kaap-apuan dan ne nakapeyibelu te Magbebaye ne Manama. 
Migpangimu man‑e sikandan te me panubaran diye te me bubungan, wey migpasasindeg sikandan te me pes-ek ne batu wey me sungkaleg te diyus-diyus ne si Asira diye te me bubungan wey diye te diralem te me kayu eyew egsimbeen dan. 
Ne timul pad due, duen pad man‑e me lukes ne egmamelegye te lawa diye te tane. Inggimu te me matig-Huda ka lilinditi naan de iya ne me himu iling te inggimu te keet-etawan ne imparelrel te Magbebaye ne Manama te me Israilita puun te tane dan eyew egpekeugpe kayi ka me Israilita. 
Te igkalalimma ne leg‑un te peghari ni Rihubuwam, inlusuran e ni Sisak ne Hari te Ihiptu ka Hirusalim. 
Impanguwa rin ka me karatuan te timplu te Magbebaye, wey te palasyu te Hari. Impanguwa rin ka langun, lagkes ka langun ne me kalasag ne bulawan ne impeyimu ni Sulumun. 
Purisu, migpeyimu e man‑e si Hari Rihubuwam te kalasag ne burunsi eyew igliwan te me kalasag, wey imbehey rin seini te me upisyal te me talagtameng te gumawan te palasyu. 
Ne tagse eggendiye ka Hari te timplu te Magbebaye, eg-uyanen te me talagbantey rin ka me kalasag wey iglibed dan ded ka kalasag diye te malig‑en ne tinesanan kayi. 
Ne ka duma pad ne neyimu ni Hari Rihubuwam, nasulat diye te Sulatanan te me Guhuren te me Hari te Huda. 
Te intiru ne timpu te peghari ni Rihubuwam, layun de sikandan egpahiggireey ki Hirubuwam. 
Ne migpatey e si Rihubuwam wey nekegdume e sikandin te me kaap-apuan din, wey insabal sikandin diye te Siyudad ni Dabid. Si Naama ka ngaran te iney rin ne Amunihanen. Ne si Abiyas ne anak din ka migsubal kandin mighari.