1 Hari.
17.
Due sabeka ne prupita ne egngaranan ki Ilyas ne matig-Tisbi ne sakup te Gilyad. Ne ingkahiyan din si Hari Ahab, “Igsaad ku keykew te ngaran te Magbebaye, ka manekal ne Manama te Israil ne impamakey ku, ne ware demmug wey ke uran naa ne egginguma te tatelu ne leg‑un angin e ke egpeuranen ku.” 
Ne impanengneng si Ilyas te Magbebaye ne Manama, 
“Awe kad e kayi wey hendiye kad te igsile. Heles ka diye te beuhan te Kirit, dapit te igsile te Hurdan. 
Ne diye ka angey te eg-inumen nu te beuhan wey egsuhuen ku ka me uwak eyew egdulung keykew te pegkeen diye.” 
Ne intuman en iya ni Ilyas ka inlalag kandin te Magbebaye ne Manama. Miggendiyad e sikandin te beuhan te Kirit, wey diyad e sikandin mig-ugpe. 
Ne ka me uwak ka egdulung kandin te paan wey ngalap tagse maselem wey maapun. Ne diyad iya sikandin mig-inum te beuhan. 
Nataman, neetiyan e ka beuhan su ware man e mig-uran. 
Ne impanengneng te Magbebaye ne Manama si Ilyas, 
“Hendiye ka te inged te Saripat ne marani te Sidun, wey diye ka ugpe. Duen e insuhu ku ne balu ne mig-ugpe diye eyew egbehey keykew te pegkeen.” 
Ne miggendiyad en iya si Ilyas te Saripat. Te egpalinggume e sikandin diye te gumawan te siyudad, nakakita sikandin te balu ne egpangayu. Ne in-umew e ni Ilyas ka balu te migkahi, “Uyani e pa ubag te deisek ne weyig eyew egpekeinum a.” 
Te eg-angey e ka balu te weyig, in-umew e man‑e sikandin ni Ilyas, “Lagkesi nu ubag te deisek ne paan.” 
Ne migtabak ka balu, “Nakanengneng ka manekal ne Magbebaye ne Manama nu ne wara a nekeyilutu te paan. Duen naan de ubag senge-kemkem ne harina ku diye te banga, wey deisek ne mentika te ulibu diye te gerepun. Sikan naa ka migpangayu a eyew eggilutuen ku seini para kanami te talaanak, eyew egpakakeen key te kene key pad egpatey.” 
Ne ingkahiyan sikandin ni Ilyas, “Kene ka kalaggew, hendiye kad e wey himuwa nud ka inlalag nu. Piru hilutui e pa ubag hun-eyi te deisek ne paan wey uyana nu kayi, wey hilutua nud e ka same para kaniyu. 
Su seini ka inlalag te Magbebaye ne Manama, ka Manama te Israil, ‘Kene egkaaminan te harina wey mentika ka me tahuanan nu taman te aldew ne egpeuranan kud e man‑e ka kalibutan, wey egpanubu e man‑e ka me pinamula.’” 
Ne miggipanew e ka balu wey inggimu rin e ka inlalag ni Ilyas. Ne mananey iya naamini te egkakeen si Ilyas, ka balu wey ka anak din. 
Ne iling iya te inlalag te Magbebaye ne Manama ki Ilyas, ware iya naamin ka harina wey ka mentika diye te me tahuanan. 
Ne peglihad te pila ne aldew, migderalu ka anak te balu wey masumpit naan de iya ka bate, wey migpatey en iya. 
Ne ingkahiyan te balu si Ilyas, “Etew te Manama, mania te inggimu nu seini keddi? Iyan nu bes inggendini eyew igpasuman-suman keddiey ka me sale ku, wey eyew eggimatayan ka anak ku?” 
Ne ingkahiyan e ni Ilyas ka balu te egkuen din ka lawa te bate. Ne ingkuwa rin en iya seini puun te iney, wey in-uyan din e diye te sinabeng ne in-ugpaan din diye te dibabew, wey impeyibat din e diye te hibatanan din. 
Ne migsinehew si Ilyas diye te Magbebaye ne Manama te migkahi, “He Magbebaye ne Manama ku, mania te impeuyanan nu pad te karereetan seini se balu ne impamaneyikan ku, pinaahi te peggimatey nu te anak din?” 
Ne inlangkeban din ka bate te katatelu, wey migsinehew sikandin diye te Magbebaye ne Manama te migkahi, “He Magbebaye ne Manama ku, uyaha nu ubag ka seini ne bate!” 
Ne intabak te Magbebaye ne Manama ka peg-ampu ni Ilyas, wey neuyag en iya man‑e ka bate. 
Ne in-enew e ni Ilyas ka bate, wey in-uyan din e seini te egpamaneug te haheran palibed diye te iney rin, wey inggkahiyan din e ka iney, “Pitawa nu, neuyag e ka anak nu!” 
Ne migkahiyan te balu si Ilyas, “Nanengnengan kud e kuntee ne etew ka iya te Manama, wey malehet iya ka impalalag keykew te Magbebaye ne Manama!”