2 Hari.
18.
Te igkatatelu ne leg‑un te peghari ni Husiyas ne anak ni Ila diye te Israil, migbunsud e degma mighari diye te Huda si Isikiyas ne anak ni Ahas. 
Daruwa ne pulu wey lalimma (25) ka idad ni Isikiyas te neyimu sikandin ne Hari, wey mighari sikandin diye te Hirusalim te daruwa ne pulu wey siyam (29) ne leg‑un. Si Abiha ne anak ni Sakariyas ka iney rin. 
Meupiya ka hinimuwan ni Isikiyas diye te tangkaan te Magbebaye ne Manama iling te hinimuwan te kaap-apuan din ne si Dabid. 
Impangguhus din ka me panubaran diye te me bubungan, impanlupet din ka me pes-ek ne batu, wey impanempug din ka me sungkaleg ne larawan ni Asira. Inlupet din degma ka burunsi ne uled ne inggimu ni Muwisis, su mighalad man ded kayi ka me etew taman te seeye ne timpu wey ingngaranan dan seini te Nihustan. 
Migsalig si Isikiyas te Magbebaye, ka Manama te Israil. Sikan naa ka ware egpekeiling kandin ne Hari diye te Huda, nekewun‑a ma kandin ne Hari wey ke namewuri naa. 
Matinumanen amana si Isikiyas te Magbebaye, wey ware sikandin mig-engked ka egsinundul kandin. Intuman din ka me suhu ne impanengneng te Magbebaye ki Muwisis. 
Ne indumaan sikandin te Magbebaye wey miglampus sikandin te langun ne inggimu rin. Migribildi sikandin te Hari te Asirya wey warad migparuma-ruma kandin. 
Natalu rin ka me Pilistihanen taman te Gasa lagkes ka me inged ne sakup kayi, minsan ka dereisek ne bariyu wey ka derakel ne me siyudad. 
Te igkeep‑at ne leg‑un te peghari ni Isikiyas, wey igkapitu degma ne leg‑un te peghari ni Husiyas te Israil, inlusuran ni Salmanisir ne Hari te Asirya ka Samarya wey inlingutan dan seini. 
Nataman, miglihad ka tatelu ne leg‑un, te mighen‑em e ne leg‑un si Isikiyas ne mighari wey migsiyam e degma ne leg‑un si Husiyas ne mighari, naahew e ni Salmanisir ka Samarya. 
Ne impandakep e te Hari te Asirya ka me matig-Israil wey impanguyan e diye te Asirya, wey diyad ipeugpe te siyudad te Hala, diye te me inged ne marani te weyig ne Habur ne diye te Gusan wey diye te me siyudad te Midiyan. 
Natalu ka me matig-Samarya su ware ma sikandan mig-ikul te suhu te Magbebaye ne Manama ran wey insupak dan ka kasabutan ne inggimu rin duma kandan. Ne minsan ka insuhu kandan ni Muwisis ne suluhuanen te Magbebaye, ware dan pammineha wey tumana. 
Te igkasapulu wey hep‑at (14) ne leg‑un te peghari ni Isikiyas diye te Huda, inlusuran te Hari te Asirya ne si Sinakirib ka langun ne siyudad te Huda ne in-alad te matikang wey makepal ne batu, wey naahew rin seini langun. 
Purisu migpeuyan si Isikiyas ne Hari te Huda te seini ne lalag diye te Hari te Asirya ne diye te Lakis, “Nakasala a keykew. Piru igbehey ku keykew ka minsan nekey ne egbuyuen nu eyew eg-awe kad e kayi.” Sikan naa ka migbuyu ka Hari te Asirya te sapulu ne libu (10,000) ne kilu ne pelata wey sabeka ne libu (1,000) ne kilu ne bulawan. 
Ne imbehey ni Isikiyas kandin ka langun ne pelata ne diye te timplu te Magbebaye wey ka diye te tinesanan te karatuan te palasyu. 
Insu-su din ka bulawan ne impareket te gumawan te timplu wey ka me bulawan ne impareket diye te egtangenan te gumawan, wey imbehey rin e te Hari te Asirya. 
Ne taheed te diye te Lakis si Sinakirib ne Hari te Asirya, insuhu din ka tatelu ne pangulu te me sundalu rin duma te masulug ne me sundalu eyew egpakigkita ki Hari Isikiyas. Te diyad e sikandan te lihawangan te Hirusalim, migsanggel e sikandan diye te lenged te tubu te weyig ne egpeendiye te limuranan te weyig diye te dibabew. Marani seeye te dalan peendiye te pi‑pianan te egmamelegye te manggad. 
Ne impeumew ran si Hari Isikiyas piru iyan de impeendiye te Hari ka anak ni Hilkiyas ne si Ilyakim ne sinalihan te palasyu, si Sibna ne sikritari, wey si Huwas ne talagsulat ne anak ni Asap. 
Ne ingkahiyan sikandan te labew ne upisyal, “Kahii niyu si Isikiyas te mig-inse ka mabantug ne Hari te Asirya: Nekey bes ka amana nu salihi? 
Kahiyen nu buwa ne egpanalu ka te pegpakiggira te lalag de, wey kene ne pinaahi te katuenan wey keseg te me sundalu nu? Hentew bes ka insalihan nu? Mania te migribildi ka keddi? 
Migsalig ke buwa te Ihiptu ne iling de te laye ne tuked ne nabagbag ne egpakapali te belad te seeye se eggen-gen kayi? Iling due ka Hari te Ihiptu ke due egsalig kandin. 
Piru ke egkahi kew se me upisyal te Huda te migsalig kew te Magbebaye ne Manama niyu, na, kene naa ne si Isikiyas ded ka migpahuhus te me simbaanan wey me altar te Magbebaye diye te me panubaran diye te bubungan? Ne ingkahiyan din ka nangugpe diye te Hirusalim wey diye te duma ne siyudad te Huda te diye de sikandan egsimba te halaran diye te Hirusalim.” 
Ne migpabulus migkahi ka labew ne upisyal, “Pakigsabut ka te ahalen ku ne iyan ka Hari te Asirya. Egbehayan ku sikeykew te daruwa ne libu (2,000) ne me kudde ke due etew nu ne daruwa ne libu (2,000) ne egmangudde kayi. 
Egmenuwen nu naa te egsukul te seeye se minsan subla ne deisek se katungdanan ne suluhuanen te ahalen ku ke egsalig ke re te me karwahi wey me sundalu ne igbehey keykew te Ihiptu? 
Timul pad due, ka Magbebaye ka migduma keddi te miggendini eyew te pegdereet te seini ne nasud. Ka Magbebaye ka migkahi keddi ne eglusuran ka seini ne nasud wey egdereetan.” 
Ne ingkahiyan enni Ilyakim, Sibna, wey ni Huwas ka labew ne upisyal, “Iyan nu re ubag gamita ka Aramayik ne linalahan su egpakasabut key ma kayi. Kene de ne Hibruwanen su kema ke egpakarineg wey egpakasabut ka me etew ne sika te matikang wey makepal ne batu ne alad te siyudad.” 
Piru migtabak ka labew ne upisyal, “Insuhu a te ahalen ku ne igpanengneng seini te langun ne nangugpe te Hirusalim, kene ne diye de te kaniyu wey te Hari niyu. Egmanggutasan kew langun wey egkammaraan te timpu ne eglusuran ney e sikaniyu. Ne egmangeen kew e te tei niyu wey egmanginum e te ihi niyu.” 
Ne migsasindeg ka labew ne upisyal wey migpanguleyi ne miglalag te Hibruwanen, “Pammineha niyu ka inlalag te maresen ne Hari te Asirya! 
Kene kew paakal ki Isikiyas. Kene sikandin egpakaluwas kaniyu! 
Kene kew patipu kandin ne egsalig te Magbebaye ne egkahi, ‘Egluwasen ki iya te Magbebaye. Kene egkaahew te Hari te Asirya ka seini ne siyudad.’ 
Kene kew pammineg ki Isikiyas! Seini ka ingkahi te Hari te Asirya: Pakiggusey kew e keddi wey hural kew e! Ne egpakakeen kew e langun te behas te paras niyu wey iggira, wey egpekeinum te weyig te me belun niyu. 
Ne egkataman, eg-angayen kud e sikaniyu wey eg-uyanen diye te tane ne iling ded te tane niyu ne masulug se pamulaan te paras, trigu, sibada, ulibu, wey due dakel ne teneb. Te sika ne paahi, kene kew egpatey. Kene kew palimbung ki Isikiyas ke egkahi sikandin ne egluwasen kew te Magbebaye ne Manama niyu. 
Duen naa me manama te minsan hendei ne nasud ne nakaluwas kandan puun te Hari te Asirya? 
Hendei bes ka me manama te siyudad te Hamat, Arpad, Siparbayim, Hina, wey Iba? Naluwas naa te me manama ka siyudad ne Samarya puun te geem ku? 
Hentew‑a te me manama te sika ne me nasud ka nakaluwas te nasud dan puun te geem ku? Purisu, egmenuwen te Magbebaye te egluwas ka Hirusalim puun keddi?” 
Piru migpeeneng-eneng de ka me etew su ingkahiyan ma sikandan ni Hari Isikiyas te kene egpatabaken. 
Ne miggendiye ki Isikiyas ka anak ni Hilkiyas ne si Ilyakim ne sinalihan te palasyu, si Sibna ne sikritari, wey si Huwas ne talagsulat ne anak ni Asap. Ne impanggisi dan ka me kumbale dan tenged te peglungku wey innangenan dan si Isikiyas te impanlalag te labew ne upisyal.