1 Krunikas.
2.
Ne ka me anak ni Hakub ne me lukes iyan si Rubin, si Simyun, si Libi, si Huda, si Isakar, si Sabulun, 
si Dan, si Husi, si Binhamin, si Naptali, si Gad, wey si Asir. 
Ne ka me anak ni Huda ne me lukes iyan si Ir, si Unan, wey si Sila. Seini se tatelu, anak dan ki Batsuwa ne Kanaanen. Si Ir ne kinakakayan ne anak ni Huda, mareet se hinimuwan diye te tangkaan te Magbebaye ne Manama, purisu innimatayan sikandin te Manama. 
Duen pad man‑e daruwa ne anak ni Huda ne me lukes ki Tamar ne ambey rin ne iyan si Piris wey si Sira. Lalimma langun ka anak din ne me lukes. 
Ne due daruwa ne anak ni Piris ne me lukes ne iyan si Hisrun wey si Hamul. 
Ne ka anak ni Sira ne me lukes iyan si Simri, si Itan, si Himan, si Kalkul, wey si Dara. Lalimma langun ka anak din ne me lukes. 
Ne sabeka te me kabuhalan ni Sira ne iyan si Karmi, due anak ne lukes ne iyan si Akan, ne nekeyimu te kahubut te Israil pinaahi te pegpanakew rin te kasangkapan ne imbehey e diye te Manama. 
Ne ka anak ni Itan ne lukes iyan si Asariyas. 
Ne ka anak ni Hisrun ne me lukes iyan si Hiramil, si Ram, wey si Kalib. 
Si Ram ka amey ni Aminadab, wey si Aminadab ka amey ni Naasun, ne pangulu te keet-etawan te Huda. 
Si Naasun ka amey ni Salmun, wey si Salmun ka amey ni Buas. 
Si Buas ka amey ni Ubid, wey si Ubid ka amey ni Hisi. 
Ne due pitu ne anak ni Hisi ne me lukes: si Iliyab ka kinakakayan, si Aminadab ka igkarangeb, si Simiya ka igkatelu, 
si Nitanil ka igkeep‑at, si Raday ka igkalimma, 
si Usim ka igkeen‑em, wey si Dabid ka igkapitu. 
Ne due degma daruwa ne anak ni Hisi ne me malitan ne iyan si Siruya wey si Abigail. Ne si Siruya due tatelu ne anak ne me lukes ne iyan si Abisay, si Huwab, wey si Asahil. 
Ne si Abigail due anak din ne lukes ne iyan si Amasa, si Hitir ka amey rin ne sabeka ne Ismailita. 
Ne si Kalib ne anak ni Hisrun, migpangasawa ki Asuba ne egngaranan ded ki Hiriyut. Ne ka me anak dan ne me lukes iyan si Hisir, si Subab, wey si Ardun. 
Te migpatey e si Asuba, mig-asawe e man‑e si Kalib ki Iprata wey nakaanak sikandan ki Hur. 
Ne si Hur ka amey ni Uri, wey si Uri ka amey ni Bisalil. 
Te hen‑em ne pulu (60) e ka idad ni Hisrun, impangasawa rin e ka anak ni Makir ka an-anayan ne mahinged te Gilyad. Ne nakaanak sikandan te lukes ne iyan si Sigub. 
Ne si Sigub ka amey ni Hair. Ne si Hair ka migmandu te daruwa ne pulu wey tatelu (23) ne me siyudad ne sakup te Gilyad. 
Piru in-ahew ni Gisur wey ni Aram ka me lungsud ne immanduan ni Hair lagkes ka Kinat, wey ka hen‑em ne pulu (60) ne me bariyu ne nakalingut kayi. Me kabuhalan langun ni Makir ne amey ni Gilyad ka nangugpe te seini ne me lungsud wey me bariyu. 
Te migpatey e si Hisrun, si Kalib ne anak din miggilabet ki Iprata ne balu te amey rin, wey nakaanak si Iprata ki Asur ne amey ni Tikuwa. 
Ne si Hiramil, ne kinakakayan ne anak ni Hisrun, due lalimma ne anak ne me lukes: si Ram ka kinakakayan, si Buna ka igkarangeb, si Urin ka igkatelu, si Usin ka igkeep‑at, wey si Ahiyas ka igkalimma. 
Ne duen pad man‑e lein ne asawa ni Hiramil ne egngaranan ki Atara ne iney ni Unam. 
Ne si Ram ne kinakakayan ne anak ni Hiramil, due anak ne me lukes ne iyan si Maas, si Hamin, wey si Ikir. 
Ne si Unam due daruwa ne anak ne me lukes ne iyan si Samay wey si Hada. Ne si Samay due degma daruwa ne anak ne me lukes ne iyan si Nadab wey si Abisur. 
Ne ka ngaran te asawa ni Abisur iyan si Abihail. Ne due anak dan ne me lukes ne iyan si Aban wey si Mulid. 
Ne si Nadab due daruwa ne anak ne me lukes ne iyan si Silid wey si Apayim. Ne migpatey re due si Silid ne ware anak. 
Ne ka anak ni Apayim ne lukes iyan si Ishi. Ne si Ishi ka amey ni Sisan wey si Sisan ka amey ni Alay. 
Ne si Hada ne suled ni Samay due daruwa ne anak ne me lukes ne iyan si Hitir wey si Diyunatan. Ne migpatey re due si Hitir ne ware anak. 
Ne si Diyunatan due daruwa ne anak ne me lukes ne iyan si Pilit wey si Sasa. Sikandan langun ka me kabuhalan ni Hiramil. 
Ne si Sisan ware anak ne me lukes, su me malitan de. Piru due uripen din ne lukes ne matig-Ihiptu ne egngaranan ki Harha. 
Purisu, impaasawa rin ki Harha ne uripen din ka sabeka te me anak din ne malitan wey nakaanak sikandan ki Atay. 
Ne si Atay ka amey ni Natan, wey si Natan ka amey ni Sabad. 
Ne si Sabad ka amey ni Iplal, wey si Iplal ka amey ni Ubid. 
Ne si Ubid ka amey ni Dihu, wey si Dihu ka amey ni Asariyas. 
Ne si Asariyas ka amey ni Hilis, wey si Hilis ka amey ni Ilasa. 
Ne si Ilasa ka amey ni Sismay, wey si Sismay ka amey ni Salum. 
Ne si Salum ka amey ni Hikamiyas, wey si Hikamiyas ka amey ni Ilisama. 
Ne ka me lukes ne anak te suled ni Hiramil ne si Kalib, iyan si Misa ka panganey, ne amey ni Sip, wey si Marisa ka igkarangeb, ne amey ni Hibrun. 
Ne ka me anak ni Hibrun ne me lukes iyan si Kura, si Tapuwa, si Rikim, wey si Sima. 
Ne si Sima ka amey ni Raham, wey si Raham ka amey ni Hurkiyam. Ne si Rikim ka amey ni Samay, 
si Samay ka amey ni Maun, wey si Maun ka amey ni Bitsur. 
Ne due duwey ni Kalib ne egngaranan ki Ipa ne nakaanak engki Haran, ki Musa, wey ki Gasis. Ne si Haran due anak ne lukes ne egngaranan degma ki Gasis. 
Ne si Haday due anak ne me lukes ne iyan si Rigim, si Hutam, si Gisan, si Pilit, si Ipa, wey si Saap. 
Ne duen pad man‑e lein ne duwey ni Kalib ne iyan si Maaka, ne nakaanak ki Sabir wey ki Tirhana. 
Ne nakaanak pad man‑e si Maaka te daruwa ne me lukes ne si Saap ne amey ni Madmana, wey si Siba ne amey ni Makbina wey ni Gibiya. Ne due man‑e anak ni Kalib ne malitan ne iyan si Aksa. 
Ne seini pad man‑e ka me kabuhalan ni Kalib: si Hur ne kinakakayan ne anak ni Kalib ki Iprata, due anak ne me lukes ne iyan si Subal ne iyan migpasasindeg te siyudad ne Kiryat-Hiyarim, 
si Salma ne iyan migpasasindeg te siyudad ne Bitlihim, wey si Harip iyan migpasasindeg te Bitgadir. 
Ne si Subal ka migpasasindeg siyudad te Kiryat-Hiyarim. Ka me kabuhalan din iyan ka me matig-Haruwi wey ka katenge te me matig-Minuhut. 
Ne ka me kabuhalan ne nangugpe diye te Kiryat-Hiyarim iyan ka me Itrahanen, me Puthanen, me Sumatnen, wey ka me Misrahanen—me kabuybuyahan te me Suruhanen wey me Istaulnen. 
Ne ka me kabuhalan ni Salma iyan ka me matig-Bitlihim, me matig-Nitupa, me matig-Astrubitihuwab, wey ka katenge te me matig-Manahat wey me matig-Suri. 
Ne ka me kabuhalan te me mangngateu ne egsulat wey eg-iling te me sinulat, diye mig-ugpe te Habis. Sikandan ka me Tiratihanen, me Simiyatihanen, wey me Sukatihanen. Sikandan ka me Kinihanen ne migpuun ki Hamat ne amey ni Rikab.