1 Krunikas.
11.
Ne miggendiye ki Dabid diye te Hibrun ka langun ne matig-Israil wey migkahi, “Amana key pad iya nikeykew ne karumaan. 
Te miglihad ne me timpu, minsan te si Saul pad ka Hari, sikeykew e ka migpangulu te Israil te pegpakiggira. Ne ingkahiyan ka te Magbebaye ne Manama nu, ‘Sikeykew ka egtanggu te keet-etawan ku ne me Israilita wey egkeyimu ka ne pangulu ran.’” 
Purisu te pegginguma te langun ne igbuyag te Israil diye te Hibrun, miggimu e si Dabid te kasabutan duma kandan, diye te tangkaan te Magbebaye ne Manama. Ne in-alam dan si Dabid isip Hari te Israil, sumale te insaad te Magbebaye ne Manama pinaahi ki Samwil. 
Ne inlusuran ni Dabid duma te langun ne sundalu te Israil, ka Hirusalim ne egngaranan pad te Hibus, wey me Hibusihanen pad ka nangugpe. 
Ne migkahiyan si Dabid te me Hibusihanen, “Kene kew egpakaseled kayi.” Ne ingkahiyan ni Dabid ka me etew rin, “Hentew seeye se hun‑a ne egpakalusud te me Hibusihanen, eggimuwen ku ne pangulu te me sundalu.” Ne si Huwab ne anak ni Siruya ka hun‑a ne miglusud, ne neyimu iya sikandin ne pangulu. Purisu naahew iya enni Dabid ka malig‑en ne inged ne Hirusalim, ne nataman ingngaranan e seini te Siyudad ni Dabid 
su diye mig-ugpe si Dabid te sika ne inged ne malig‑en. 
Ne imparakelan din pad ka siyudad puun diye te imbunelan te tane taman te nakalingut ne me inged, wey si Huwab degma ka mig-ayad-ayad te duma ne baad te siyudad. 
Ne nanasnasian pad ka karesen ni Dabid su migduma ma kandin ka Amana ne Maresen ne Magbebaye. 
Seini ka me pangulu te me bahani ni Dabid. Sikandan wey ka langun ne matig-Israil ka migbulig kandin ne egkeyimu ne Hari sumale te insaad te Magbebaye ne Manama. 
Seini ka listaan te me bahani: si Hisbaam ne Hakmunihanen iyan ka pangulu te tatelu ne me bahani. Nakapatey sikandin te tatelu ne gatus (300) ne me bahani pinaahi te deldeg te sabeka re ne gira. 
Ne iyan igkarangeb si Iliyasar ne anak ni Dudu ne Ahuwahanen. Sabeka si Iliyasar te tatelu ne me bahani. 
Migduma sikandin ki Dabid diye te Pisdumin taheed te miglibulung diye ka me Pilistihanen eyew te pegpakiggira. Ne diye sikandan migpahiggireey te due kamet ne neempet te sibada. Ne nenakapallahuy ka me matig-Israil, 
piru ware mule mig-awe si Iliyasar wey si Dabid diye te taliware te kamet wey natalu ran iya ka me Pilistihanen. Impepanalu sikandan te Magbebaye ne Manama. 
Sabeka ne aldew, miggendiye ki Dabid diye te sulung te Adulam ka tatelu ne sundalu rin. Seini se tatelu nalagkes te Tatelu ne Pulu ne me mabbulut ne sundalu rin. Te seeye ne timpu migkekampu ka me sundalu te me Pilistihanen diye te Bangalug te Ripaim, 
wey te Bitlihim. Ne si Dabid diye te malig‑en ne inged din. 
Ne nammaraan si Dabid wey migkahi, “Meupiya ubag perem ke due sabeka ne egsakug te weyig diye te belun ne marani te gumawan te Bitlihim, eyew eg-inumen ku!” 
Sikan naa ka miggeles-heles miggendiye ka tatelu ne bahani te kampu te Pilistihanen wey migsakug te weyig diye te belun ne marani te gumawan te Bitlihim. Ne in-uyan dan e ka weyig diye ki Dabid piru ware din seini inuma. Nasi din seini itisa diye te tangkaan te Magbebaye ne Manama isip halad. 
Ne migkahi sikandin, “Manama, kene ku iya seini eg-inumen. Su ke eg-inumen ku seini, iling de te in-inum ku ka langesa te me etew ne ware mig-ulung-ulung ne migsakug te weyig.” Purisu, ware din seeye inuma. Seeye ka inggimu te tatelu ne bahani. 
Ne si Abisay ne suled ni Huwab ka pangulu te Tatelu ne Pulu ne me bahani. Nakapatey sikandin te tatelu ne gatus (300) ne etew ne iyan din inggamit ka deldeg din, wey migbantug degma sikandin iling te tatelu ne me bahani. 
Sikandin ka amana ne mabantug te Tatelu ne Pulu wey neyimu sikandin ne pangulu ran, piru ware sikandin nakalagkes te seeye se tatelu. 
Ne duen pad man‑e mabulut ne etew ne si Binayas ne matig-Kabsiil ne anak ni Huyada. Masulug ka neyimu rin ne mabantug ne himu. Nakapatey sikandin te daruwa ne mabbantug ne me bahani ne matig-Muwab. Te timpu te tingmaagsil, migseled sikandin diye te lungag wey nekeyimatey man‑e sikandin te liyun. 
Ne nakapatey pad man‑e sikandin te Ihiptuhanen ne pitu wey tenge ne palapala se kalayat. Miggehen-gen ka Ihiptuhanen te kalawit ne mabehat wey makepal. Piru migparani mule si Binayas ne mig-uyan de te tuked, wey in-ahew rin e ka kalawit te Ihiptuhanen, wey in-uney rin himatayi te kalawit din ded. 
Seeye ka inggimu ni Binayas ne anak ni Huyada. Ne neyimu e sikandin ne iling kabantug te tatelu ne me bahani. 
Sikandin ka subla ne mabantug du te Tatelu ne Pulu ne me duma rin, piru ware sikandin nakalagkes kandan. Ne inggimu sikandin ni Dabid ne pangulu te me talagbantey rin. 
Ne seini ka duma ne me bahani: si Asahil ne suled ni Huwab, si Ilhanan ne anak ni Dudu ne matig-Bitlihim, 
si Samut ne matig-Harud, si Hilis ne matig-Pilun, 
si Ira ne anak ni Ikkis ne matig-Tikuwa, si Abisir ne matig-Anatut, 
si Sibikay ne matig-Husa, si Ilay ne matig-Ahu, 
si Maharay ne matig-Nitupa, si Hilid ne anak ni Baana ne matig-Nitupa, 
si Itay ne anak ni Ribay ne matig-Gibiya, ne sakup te kabuhalan ni Binhamin, si Binayas ne matig-Piratun, 
si Huray ne mig-ugpe diye te marani te me bangalug te Gaas, si Abil ne matig-Arba, 
si Asmabit ne matig-Baharum, si Iliyaba ne matig-Saalbun, 
si Hasim ne matig-Gisun, si Diyunatan ne anak ni Sagi ne matig-Harar, 
si Ahiyam ne anak ni Sakar ne matig-Harar, si Ilipal ne anak ni Ur, 
si Hipir ne matig-Misira, si Ahiyas ne matig-Pilun, 
si Hisru ne matig-Karmil, si Naaray ne anak ni Isbay, 
si Huwil ne suled ni Natan, si Mibhar ne anak ni Hagri, 
si Silik ne matig-Amun, si Naaray ne matig-Biirut ne talag-uyan te panganiban ni Huwab ne anak ni Siruya, 
si Ira wey si Garib ne matig-Hatir, 
si Uriyas ne Hitihanen, si Sabad ne anak ni Alay, 
si Adina ne anak ni Sisa ne pangulu te kabuhalan ni Rubin ne due Tatelu ne Pulu ne me sakup, 
si Hanan ne anak ni Maaka, si Husapat ne matig-Mitan, 
si Usiyas ne matig-Astarut, si Sama wey si Hiil ne me anak ni Hutam ne matig-Aruwir, 
si Hidiyail wey si Huha ne me anak ni Simri ne matig-Tis, 
si Iliil ne matig-Mahaba, si Hiribay wey si Husabiyas ne me anak ni Ilnaim, si Itma ne matig-Muwab, 
si Iliil, si Ubid wey si Hasil ne matig-Masuba.