1 Krunikas.
12.
Ne seini ka me etew ne miggendiye ki Dabid diye te Siklag te timpu ne miggeles-heles sikandin ki Saul ne anak ni Kis. Sikandan ka duma te me bahani ne migbulig ki Dabid te pegpakiggira. 
Neelin sikandan ne due me pane wey mangngateu sikandan ne egpane te kawanan wey ke gibang naa ne belad. Me karumaan sikandan ni Saul ne me kabuhalan ni Binhamin. 
Ne iyan dan me pangulu si Ahisir wey si Huwas, ne me anak ni Sama ne matig-Gibiya. Ne seini ka me sundalu: si Hisil wey si Pilit ne me anak ni Asmabit, si Biraka, si Dihu ne me matig-Anatut, 
si Ismayas ne matig-Gibyun ne mabantug ne bahani wey pangulu te Tatelu ne Pulu, si Hirimiyas, si Diyahasil, si Diyuhanan, wey si Husabad ne matig-Gidira, 
si Ilusay, si Hirimut, si Biyaliya, si Simariyas, wey si Sapatiyas ne matig-Harup, 
si Ilkana, si Isiyas, si Asaril, si Huwisir, wey si Hisbaam ne me kabuhalan ni Kura, 
si Huwila wey si Sibadiyas ne me anak ni Hiruham ne matig-Gidur. 
Ne ka duma ne me kabuhalan ni Gad, migduma degma ki Dabid diye te malig‑en ne inged ne helesanan din diye te disirtu. Me bahani sikandan wey nenabbasbas te pegpakiggira wey egkengateu sikandan ne eggamit te kalasag wey deldeg. Me mabbulut sikandan iling te liyun, wey iling kaagsik-agsik te usa diye te me bubungan. 
Si Isir ka pangulu ran, si Ubadiya ka ikarangeb, wey si Iliyab ka igkatatelu, 
si Mismana ka igkeep‑at, wey si Hirimiyas ka igkalalimma, 
si Atay ka igkeen‑em, si Iliil ka igkapitu, 
si Diyuhanan ka igkawalu, si Ilsabad ka igkasiyam, 
si Hirimiyas ka igkasapulu, wey si Makbanay ka igkasapulu wey sabeka. 
Sikandan ka me kabuhalan ni Gad ne me upisyal te me sundalu. Sabeka ne gatus (100) de ne sundalu ka egkapanguluwan te kene amana ne mabantug wey sabeka ne libu (1,000) ka egkapanguluwan te amana ne mabantug. 
Sikandan ka miglapas te Hurdan te an-anayan ne bulan te migbaggiyu seini, wey impandeldel ran ka nangugpe diye te me bangalug ne diye te igsile wey diye te iglineb. 
Ne due duma ne me kabuhalan ni Binhamin wey ni Huda ne miggendiye ki Dabid diye te malig‑en ne inged din. 
Ne miglihawang si Dabid ka egsinug-ung kandan wey ingkahiyan din sikandan, “Ke miggendini kew eyew egbulig keddi isip alukuy, andam a ne egpakigsabeka kaniyu. Piru ke miggendini kew eyew te peg-akal, minsan ke ware sale ku, ka Manama te kaap-apuan ta ka nakakita kayi wey eggukum kaniyu.” 
Piru in-umaan te Panisingan te Manama si Amasay ne pangulu te Tatelu ne Pulu ne me bahani, wey migkahi, “Sikeykew ka kamuney kanami, He Dabid! Lapig key nikeykew, He anak ni Hisi! Eglampus ka perem! Eglampus perem ka migbulig keykew! Su egbulig ma keykew ka Manama nu!” Purisu indawat sikandan ni Dabid wey inggimu rin e ne me upisyal te me sundalu rin. 
Due degma duma ne me etew ne egpuun te kabuhalan ni Manasis ne migduma ki Dabid te pegduma rin te me Pilistihanen eyew egpakiggira ki Saul. Piru ware nakapabulus si Dabid ne egduma kandan su ware ma migsuhut ka me Pilistihanen ne egduma sikandin kandan wey ka me etew rin, su naaldek sikandan ne ke ma ke eglapig ded si Dabid te ahalen din ne si Saul. Purisu pegkapenga te Pilistihanen te pegpasabutey, impeuli dan e si Dabid diye te Siklag. 
Ne seini ka me etew ne egpuun te kabuhalan ni Manasis ne miglapig ki Dabid te peggendiye din te Siklag: si Adna, si Husabad, si Hidiyail, si Maykil, si Husabad, si Ilihu, wey si Silitay. Ne ka tagse sabeka kandan migpangulu te tigsenge-libu ne me sundalu te kabuhalan ni Manasis. 
Migbulig sikandan ki Dabid te egsukul te me kuntere ne egmanlusud, su me bahani ma sikandan wey me pangulu te me sundalu. 
Ne aldew-aldew ka me etew ne egmangendiye ki Dabid eyew eglapig kandin, taman te migmasalig e amana ka me sundalu rin. 
Seini ka kasuluhan te me sundalu ne miggendiye ki Dabid diye te Hibrun eyew igbehey kandin ka migharian ni Saul sumale te insaad te Magbebaye ne Manama: 
Puun te kabuhalan ni Huda: due hen‑em ne libu wey walu ne gatus (6,800) ne me sundalu ne nasangkap te me kalasag wey me deldeg. 
Puun te kabuhalan ni Simyun: due pitu ne libu wey sabeka ne gatus (7,100) ne me sundalu. 
Puun te kabuhalan ni Libi: due hep‑at ne libu wey hen‑em ne gatus (4,600) ne me sundalu, 
lagkes e kayi ka pangulu te pamilya ni Aarun ne si Hihuyada ne due tatelu ne libu wey pitu ne gatus (3,700) ne sakup, 
wey si Saduk ne sabeka ne kanakan ne bahani, duma te daruwa ne pulu wey daruwa (22) ne me upisyal ne egpuun te pamilya rin. 
Puun te kabuhalan ni Binhamin ne me karumaan ni Saul: due tatelu ne libu (3,000) ne me bahani. Ne ka kasuluhan kandan ware mig-engked ki Saul taman te seeye ne timpu. 
Puun te kabuhalan ni Ipraim: due daruwa ne pulu ne libu wey walu ne gatus (20,800) ne me sundalu ne me talahuren amana te pamilya ran. 
Puun te katenge te kabuhalan ni Husi ne iyan ka me kabuhalan ni Manasis: due sapulu wey walu ne libu (18,000) ne me sundalu ne naalam ne eggendiye ki Dabid eyew eggimu kandin ne Hari. 
Puun te kabuhalan ni Isakar: due daruwa ne gatus (200) ne me pangulu ne egpakasabut te me palinneu te timpu wey ke nekey ka eleg ne eggimuwen te Israil. Sikandan ka migmandu te me karumaan dan. 
Puun te kabuhalan ni Sabulun: due lalimma ne pulu ne libu (50,000) ne me bahani ne andam ne egmambubunu, ne nasangkap te langun ne klasi te me panganiban wey andam ne eg-unung ki Dabid. 
Puun te kabuhalan ni Naptali: due sabeka ne libu (1,000) ne upisyal wey tatelu ne pulu wey pitu ne libu (37,000) ne me sundalu ne nasangkap te me kalasag wey me deldeg. 
Puun te kabuhalan ni Dan: due daruwa ne pulu wey walu ne libu wey hen‑em ne gatus (28,600) ne me bahani ne andam ne egmambubunu. 
Puun te kabuhalan ni Asir: due hep‑at ne pulu ne libu (40,000) ne nenabbasbas ne me sundalu ne andam ne egmambubunu. 
Puun te talipag te Hurdan, te me kabuhalan ni Rubin, ni Gad, wey te katenge te kabuhalan ni Manasis: due sabeka ne gatus wey daruwa ne pulu ne libu (120,000) ne etew ne nasangkap te langun ne klasi te me panganiban. 
Ka sika langun ne sundalu ne andam ne egpakiggira, nangendiye ki Dabid diye te Hibrun eyew eggimu kandin ne Hari te intiru ne Israil. Ne migsabeka degma ka duma ne keet-etawan te Israil eyew eggimuwen dan si Dabid ne Hari. 
Ne seled te tatelu ne aldew duma ran si Dabid te nangekeen wey nangiinum su in-andaman ma sikandan te me karumaan dan. 
Ne ka me karumaan dan degma diye te maddiyu ne inged te Isakar, te Sabulun, wey te Naptali, nanginguma ne nanguyan te egkengakeen ne immandulan te me asnu, kamil, me mula, wey baka. Dakel amana ka impamehey ne harina, egkengakeen ne inggimu puun te behas te iggira ne indampil, binu, mentika, me baka, wey karniru. Nahale amana ka langun ne matig-Israil.