1 Krunikas.
19.
Nataman, migpatey e ka Hari te me Amunihanen ne si Nahas. Ne iyan migsubal kandin mighari ka anak din ne si Hanun. 
Ne migkahi si Dabid, “Eg-upianan ku si Hanun ne anak ni Nahas su meupiya ma ka amey rin keddi.” Ne migsuhu sikandin te me etew rin eyew igpataha ne miglungku sikandin te pegpatey te amey ni Hanun. Piru te pegginguma te me upisyal ni Dabid diye ki Hanun diye te tane te Amunihanen, 
migkahiyan e te me upisyal te Amunihanen si Hanun, “Kahiyen nu buwa ne intahud ni Dabid ka amey nu pinaahi te pegsuhu te me suluhuanen din te pegliwang keykew? Kema ke impeendini rin sikandan eyew te pegnengneng wey te peg-iipat te inged ta, ne egkataman, egdereetan dan e seini.” 
Purisu imparakep ni Hanun ka me suluhuanen ni Dabid wey impakahisan din ka me sumpe dan. Impatempuhan din degma ka mallayat ne me kumbale dan taman te liwaraan wey impeuli din e sikandan. 
Ne nanguli sikandan ne amana neyilew. Te nahuhuran e si Dabid meyitenged kayi, impasinug-ung din sikandan wey impakahiyan te diye pad sikandan egpeuugpaa te Hiriku taman te egtubu e man‑e ka me sumpe dan. 
Te pegkanengnengi te me Amunihanen ne amana nabelu si Dabid tenged te inggimu ran, migpeuyan si Hanun wey ka me Amunihanen, te sabeka ne libu (1,000) ne buuk ne pelata eyew igsuul te me karwahi wey te egmangudde puun te Misuputamya, te Aram-Maaka, wey te Suba. 
Migsuul sikandan te tatelu ne pulu wey daruwa ne libu (32,000) ne karwahi. Ne miglapig man‑e kandan ka Hari te Maaka wey ka me sundalu rin. Migkekampu sikandan diye te marani te Midiba. Ne miglibulung degma ka me Amunihanen diye te me siyudad dan, wey migmanlihawang eyew egpakiggira. 
Te pegkarineg dutu ni Dabid, insuhu din e si Huwab duma te langun ne mabbulut ne me bahani eyew te pegpakiggira. 
Ne miglihawang e ka me Amunihanen wey migpangandam e diye te gumawan te siyudad eyew te pegpakiggira, wey ka me Hari ne miglapig te Amunihanen diyad e te kannapuan. 
Te pegpitew ni Huwab te due me kuntere diye te katangkaan din wey diye te peka rin, mig-alam sikandin te amana egkateu ne me bahani te Israil wey impaandam din e sikandan eyew te pegpakiggira te me matig-Sirya. 
Ne impepanguluwan din ka duma ne me sundalu rin ki Abisay ne suled din, wey impaandam din e sikandan eyew te pegpakiggira te me Amunihanen. 
Ne ingkahiyan ni Huwab si Abisay, “Bulihi key naa ke egkakita nu ne egkatalu key e te me matig-Sirya. Ne egbulihan ku re degma sikaniyu ke egkatalu kew e te me Amunihanen. 
Egnekal-nekal ki. Egbulut-bulut ki ne egpakig-ehet para te keet-etawan ta wey te siyudad te Manama ta. Ne iyan e balahad ka Magbebaye ne Manama ne eggimu ke nekey ka meupiya ne insuman-suman din.” 
Purisu miglusud e si Huwab duma te me etew rin wey nenakapallahuy ka me matig-Sirya. 
Te pegkakita te me Amunihanen te namallahuy e ka me matig-Sirya, namallahuy e degma sikandan ka migpariyu ki Abisay wey migseled e sikandan te siyudad dan. Ne mig-uli e si Huwab diye te Hirusalim puun te pegpakiggira. 
Te nakamaan-maan e ka me matig-Sirya ne natalu e sikandan te me matig-Israil, migsuhu e sikandan te me suluhuanen peendiye te matig-Sirya ne diye nangugpe te talipag te Weyig ne Iyupratis eyew egpabulig kandan. Si Supak ne pangulu te me sundalu ni Hadadisir ka migpangulu te me matig-Sirya. 
Te nahuhuran e si Dabid dutu, inlibulung din e ka langun ne matig-Israil. Miglapas sikandan te Hurdan wey migpangandam e diye te egkatangkaan te matig-Sirya wey migpahiggireey e sikandan. 
Piru nakapallahuy ka me matig-Sirya wey nakapatey si Dabid te pitu ne libu (7,000) ne etew ne migmanguntud te me karwahi wey hep‑at ne pulu ne libu (40,000) ne sundalu ne nangipanew re. Neyimatayan dan degma si Supak ne pangulu te me sundalu. 
Te nakamaan-maan e ka langun ne Hari ne sakup ni Hadadisir te natalu e sikandan te me matig-Israil, migpakiggusey e sikandan ki Dabid wey migpasakup e sikandan kandin. Purisu puun dutu, warad e migbulig ka matig-Sirya te me Amunihanen.