1 Krunikas.
24.
Ne seini ka pegbaad-baad te me kabuhalan ni Aarun. Due hep‑at ne anak ni Aarun ne me lukes ne iyan si Nadab, si Abihu, si Iliyasar, wey si Itamar. 
Piru hun‑a ne nammatey si Nadab wey si Abihu du te amey ran, wey ware me anak dan. Purisu iyan de neneyimu ne me talagpanubad si Iliyasar wey si Itamar. 
Ne imbaad-baad ni Dabid ka me kabuhalan ni Aarun sumale te me katungdanan ne igpeyimu kandan. Imbulihan sikandin ni Saduk ne kabuhalan ni Iliyasar, wey ni Ahimilik ne kabuhalan ni Itamar. 
Ne imbaad-baad te sapulu wey hen‑em (16) ne punduk ka me kabuhalan ni Iliyasar tenged su nakita ne masmasulug ka me lukes ne pangulu te pamilya rin du te kabuhalan ni Itamar. Sikan naa ka imbaad-baad de te walu ne punduk ka pamilya ni Itamar. 
Ne imbaad-baad sikandan ni Dabid pinaahi te pegpintut-pintut tenged su duen ma me upisyal te timplu wey me suluhuanen te Manama ne egpuun te kabuhalan ni Iliyasar wey ni Itamar. 
Ne si Simaya ne anak ni Nitanil ne Libita iyan ka sikritari. Impanlista rin ka me ngaran te me talagpanubad diye te tangkaan te Hari wey te me upisyal rin, ni Saduk ne talagpanubad, ni Abimilik ne anak ni Abiyatar, wey te me pangulu te me pamilya te me talagpanubad wey te me Libita. Impegsinsinundul te egpintut-pintut ka me kabuhalan ni Iliyasar wey ni Itamar. 
Ka an-anayan ne napintutan si Hihuyarib, ka igkarangeb si Hidayas, 
ka igkatelu si Harim, ka igkeep‑at si Siyurim, 
ka igkakalimma si Malkiyas, ka igkeen‑em si Mihamin, 
ka igkapitu si Hakus, ka igkawalu si Abiyas, 
ka igkasiyam si Hiswa, ka igkasapulu si Sikaniyas, 
ka igkasapulu wey sabeka (11) si Iliyasib, ka igkasapulu wey daruwa (12) si Hakim, 
ka igkasapulu wey tatelu (13) si Hupa, ka igkasapulu wey hep‑at (14) si Isbab, 
ka igkasapulu wey lalimma (15) si Bilga, ka igkasapulu wey hen‑em (16) si Imir, 
ka igkasapulu wey pitu (17) si Hisir, ka igkasapulu wey walu (18) si Hapisis, 
ka igkasapulu wey siyam (19) si Pitahiyas, ka igkararuwa ne pulu (20) si Hihiskil, 
ka igkararuwa ne pulu wey sabeka (21) si Hakin, ka igkararuwa ne pulu wey daruwa (22) si Gamul, 
ka igkararuwa ne pulu wey tatelu (23) si Dilayas, ka igkararuwa ne pulu wey hep‑at (24) si Maasiyas. 
Ne inggimu te tagse punduk ka me himu ran diye te timplu te Magbebaye ne Manama sumale te me balaud ne imbehey te kaapuan dan ne si Aarun ne egpuun te Magbebaye ne Manama, ka Manama te Israil. 
Ne seini ka duma ne me pangulu te me kabuhalan ni Libi: si Hidiyas ne kabuhalan ni Sibuwil, ne egpuun te kabuhalan ni Amram; 
si Isiyas, ne egpuun te kabuhalan ni Rihabiyas; 
si Diyahat ne kabuhalan ni Salamit, ne egpuun te kabuhalan ni Isar; 
si Hiriyas ka labew ne pangulu, si Amariyas ka igkarangeb, si Diyahasil ka ikatatelu, wey si Hikamiyam ka igkeep‑at, ne egpuun te kabuhalan ni Hibrun; 
si Samir ne kabuhalan ni Mika, ne egpuun te kabuhalan ni Usil; 
si Sakariyas, ne egpuun te kabuhalan ni Isiyas ne suled ni Mika ne kabuhalan ni Usil; 
si Mali wey si Musi ne me kabuhalan ni Mirari; si Binu, ne egpuun te kabuhalan ni Haasiyas; 
si Binu, si Sumam, si Sakur, wey Ibri, ne egpuun te kabuhalan ni Mirari; 
si Iliyasar ne ware anak ne lukes, ne egpuun te kabuhalan ni Mali; 
si Hiramil, ne egpuun te kabuhalan ni Kis; 
si Mali, si Idir, wey si Hirimut, ne egpuun te kabuhalan ni Musi. Seeye ka me kabuhalan ni Libi ne nalista sumale te pamilya ran. 
Ne migpintut-pintut degma sikandan eyew te pegbaad-baad te me himu ran iling te inggimu te me karumaan dan ne me kabuhalan ni Aarun diye te tangkaan ni Hari Dabid, ni Saduk, ni Ahimilik, wey te me pangulu te me pamilya, te me talagpanubad, wey te me Libita. Migpintut-pintut ka me pangulu minsan ka me bate-bate pad.