2 Krunikas.
21.
Ne migpatey si Hihusapat wey insabal diye te insabalan te me kaap-apuan din diye te Siyudad ni Dabid. Ne si Hihuram e ne anak din ka migsubal kandin mighari. 
Ka me suled ni Hihuram iyan si Asariyas, si Hihil, si Sakariyas, si Asariyas, si Mikail, wey si Sipatiyas. Me anak sikandan langun ni Hihusapat ne Hari te Huda. 
Impandasahan sikandan ni Hihusapat te masulug ne pelata wey bulawan, mahal ne me kasangkapan, wey te me siyudad te Huda ne in-alad te matikang wey makepal ne batu. Piru si Hihuram ka imbehayan din te migharian su sikandin ma ka panganey. 
Te migmalig‑en e ka peghari ni Hihuram diye te migharian te amey rin, impeyimatayan din e ka langun ne me suled din, lagkes ka duma ne me upisyal te Israil. 
Tatelu ne pulu wey daruwa (32) ka idad ni Hihuram te neyimu sikandin ne Hari, wey mighari sikandin diye te Hirusalim te walu ne leg‑un. 
In-ikul rin ka mareet ne me hinimuwan te me Hari te Israil, iling te inggimu te me kabuhalan ni Ahab, tenged su nakaasawa ma sikandin te anak ni Ahab. Mareet ka hinimuwan din diye te tangkaan te Magbebaye ne Manama. 
Piru ware dereeti te Magbebaye ka Huda tenged te kasabutan din ki Dabid ne egpabulus eghari ka me kabuhalan din te ware egtamanan. 
Te timpu te peghari ni Hihuram diye te Huda, migsupak kandin ka me matig-Idum wey mig-alam e te lein ne Hari dan. 
Ne miggendiye si Hihuram te inged ne Idum duma te me upisyal rin wey te langun ne kumandir te talag-uyan te me karwahi rin. Inlingutan sikandan te me matig-Idum, piru impangimatayan din wey te me sundalu rin ka me matig-Idum te pegkamarusilem. 
Taman kuntee migsupak ded te Huda ka me matig-Idum. Te seeye ded ne timpu, migsupak e degma te Huda ka Libna su in-engkeran ma ni Hihuram ka Magbebaye, ka Manama te me kaap-apuan dan. 
Ne miggimu man‑e si Hihuram te me panubaran diye te me bubungan te Huda ne iyan migpuunan ne migsimbe e te me diyus-diyus ka me matig-Hirusalim wey ka me matig-Huda wey nakapariyu e te Manama. 
Ne impeuyanan ni prupita Ilyas si Hihuram te sulat ne miggenendue, “Seini ka ingkahi te Magbebaye, ka Manama te kaapuan nu ne si Dabid, ‘Ware nu ikula ka inggimu te amey nu ne si Hihusapat wey te apu nu ne si Asa ne Hari te Huda. 
Ne iyan nu nasi in-ikul ka inggimu te me Hari te Israil ne iyan migpuunan ne migsimbe e te me diyus-diyus ka me matig-Huda wey me matig-Hirusalim, iling te inggimu te pamilya ni Ahab. Impangimatayan nu man‑e ka me suled nu ne meupiya pad keykew. 
Purisu, egdusaan te Magbebaye ka keet-etawan nu, me anak nu, me asawa nu, wey egdereetan din ka langun ne karatuan nu. Subla ne masumpit ka dusa ne egkasalerep niyu. 
Egkabaybayaran ka te subla ne kasakit te getek nu te tagse aldew ne iyan egpuunan ne eglihawang ka bituka nu.’” 
Ne imbanasalan te Magbebaye ka me Pilistihanen wey me matig-Arabya ne mig-ugpe te marani te me matig-Itiyupiya eyew egkabelu ki Hihuram. 
Ne inlusuran dan ka Huda, wey impanguwa ran e ka me karatuan te palasyu te Hari, lagkes ka me asawa rin wey ka me anak din ne me lukes. Si Ahasiyas de ne kinaariyan ne anak din ka ware neuyan. 
Pegkapenga dutu, impasalerep te Magbebaye si Hihuram te dalu te getek ne kene egkeulian. 
Peglihad te daruwa ne leg‑un, miglihawang ka bituka rin tenged te dalu wey migpatey sikandin ne amana nabaybayari. Ware migduruluk ka keet-etawan din te pegbantug kandin iling te inggimu ran te me kaap-apuan din. 
Tatelu ne pulu wey daruwa (32) ka idad ni Hihuram te neyimu sikandin ne Hari, wey mighari sikandin diye te Hirusalim te walu ne leg‑un. Ne migpatey sikandin ne warad iya miglungku. Ne diye dan ded sikandin isabal te Siyudad ni Dabid, piru kene ne diye te me sabalanan te me Hari.