2 Krunikas.
26.
Ne ka insubal te langun ne keet-etawan ki Amasiyas isip Hari iyan ka anak din ne si Usiyas, ne sapulu wey hen‑em pad (16) ka idad. 
Te timpu te peghari din, imbalbalawan din wey inggawi din ka lungsud te Ilut wey impasakup din te Huda. Inggimu rin seeye te migpatey e ka amey rin. 
Sapulu wey hen‑em (16) ka idad ni Usiyas te neyimu sikandin ne Hari, wey mighari sikandin te Hirusalim te lalimma ne pulu wey daruwa (52) ne leg‑un. Si Hikuliyas ne matig-Hirusalim ka iney rin. 
Meupiya ka hinimuwan din diye te tangkaan te Magbebaye ne Manama iling te inggimu te amey rin ne si Amasiyas. 
Migpangananey sikandin te Manama te timpu ni Sakariyas. Si Sakariyas ka migpanulu kandin ne egkaaldek te Manama. Ne immatubung sikandin te Magbebaye su migmatinumanen ma sikandin te Manama. 
Inlusuran ni Usiyas ka me Pilistihanen wey impangguhus din ka me matikang wey makepal ne alad ne batu te Gat, te Habni wey te Asdud. Ne migpasasindeg sikandin te iyam ne me siyudad diye te me inged ne sakup te Asdud wey te inged ne sakup ded te Pilistiya. 
Imbulihan sikandin te Manama te pegpakiggira din te me Pilistihanen, me Miyunihanen, wey te me matig-Arabya ne mig-ugpe te Gur-Baal. 
Migbayad kandin te buhis ka me Amunihanen wey nekeempet ka kabantug din taman diye te eletanan te Ihiptu su migmaresen ma sikandin. 
Ne migpasasindeg te me matikang ne baley si Usiyas diye te Hirusalim diye te Gumawan te Pikungan, diye te Gumawan te Napu, wey diye te Tupuanan te Alad wey in-alad din seeye te matikang wey makepal ne batu. 
Migpasasindeg man‑e sikandin te me matikang ne baley diye te inged ne ware mig-ugpe wey migpeyimu sikandin te me belun diye te lenlen te me bubungan te Huda su masulug ma ka ayam din diye wey diye te napu. Ne due me sakup din ne impatanggu te kamet din wey te pinamulaan din te paras diye te me bubungan wey te napu su amana ma sikandin egkeupian ne egbasuk. 
Ne due degma me sundalu ni Usiyas ne nenabbasbas ne egpakiggira ne impunduk-punduk din. Inteil sikandan ni Hiil ne sikritari wey ni Maasiyas ne upisyal. Ne si Hiil wey Maasiyas nasakup ni Hananiyas ne upisyal te Hari. 
Ka me pangulu te me kabuhalan ne me mabbulut ne me bahani, migginguma te daruwa ne libu wey hen‑em ne gatus (2, 600) langun. 
Ne due sakup dan ne 307,500 ne nenabbasbas ne egpakiggira ne me bahani. Andam sikandan ne egbulig te Hari ke due me kuntere din. 
Ne impamehayan sikandan ni Usiyas te me kalasag, me deldeg, me kalu ne putew, me putew ne igdingding te kumeng, me piet wey me batu ne para te lambuyug. 
Migpeyimu si Usiyas te mekina diye te mangngateu ne trabahanti rin ne iyan eggamiten te egpabesut te me tunud wey egdegpak te me batu puun te matikang ne me baley wey te me pikungan te me alad. Migmabantug sikandin minsan hendei su amana sikandin bulihi te Magbebaye wey neyimu sikandin ne malig‑en amana. 
Piru te dereseni e si Usiyas, migpaambug e sikandin. Ne sika ka nakarereet kandin. Kenad e ne matinumanen sikandin te Magbebaye, ne Manama rin. Migseled sikandin diye te timplu te Magbebaye wey sikandin e ka migtutung te insinsu diye te altar. 
Ne migsinundul kandin si Asariyas ne Labew ne Talagpanubad duma te walu ne pulu (80) ne mabbulut ne me talagpanubad te Magbebaye. 
Ne insaparan dan sikandin. Migkahi sikandan, “Usiyas, ware katenged nu ne egtutung te insinsu para te Magbebaye. Talagpanubad de ne kabuhalan ni Aarun ka egkaayun ne eggimu rue. Sikandan ka in-alam ne egtutung te insinsu. Lihawang ka te timplu su nakasale ka te Magbebaye ne Manama wey kene kad e nikandin egbantuhen.” 
Ne nabelu-belu amana si Usiyas te me talagpanubad. Ne taheed te migsasindeg sikandin diye te dangdang te altar ne egtutungan te insinsu wey diye te tangkaan te me talagpanubad ne diye te timplu te Magbebaye ne migmambibitbit te me tahuanan te insinsu, intubuan e te ibung ka buked din. 
Te pegkakita ni Asariyas wey te me duma rin ne me talagpanubad ne due migtubu ne ibung diye te buked ni Usiyas, in-iyal-iyal ran e sikandin ipalihawang. Ne mig-iyal-iyal en iya degma si Usiyas miglihawang su indusaan man e sikandin te Magbebaye. 
Ne warad neulii ka ibung ni Hari Usiyas taman te migpatey sikandin. Ne impasuwey e sikandin ipeugpe wey warad tuhuti ne egseled te timplu. Purisu si Hutam e ne anak din ka impiyalan din te palasyu rin wey ka migpangulu te keet-etawan te Huda. 
Ne ka duma pad ne guhuren meyitenged te peghari ni Usiyas puun te an-anayan taman te katamanan, nasulat diye te baseen ni prupita Isayas ne anak ni Amus. 
Ne migpatey e si Usiyas wey ware dan sikandin isabal diye te sabalanan te me Hari su in-ibung ma sikandin. Ne si Hutam e ne anak din ka migsubal kandin mighari.