2 Krunikas.
29.
Daruwa ne pulu wey lalimma (25) ka idad ni Isikiyas te neyimu sikandin ne Hari, wey mighari sikandin diye te Hirusalim te daruwa ne pulu wey siyam (29) ne leg‑un. Si Abiha ne anak ni Sakariyas ka iney rin. 
Meupiya ka hinimuwan din diye te tangkaan te Magbebaye ne Manama iling te hinimuwan te kaapuan din ne si Dabid. 
Te an-anayan ne bulan te an-anayan ne leg‑un te peghari din, impalukatan din e man‑e ka timplu te Magbebaye wey impaay-ayaran din seini. 
Inlibulung din ka me talagpanubad wey ka me Libita diye te lama te timplu ne diye dapit te igsile. 
Ne migkahiyan din sikandan, “Pammineg kew keddi, me Libita! Linisi niyu ka pegkeetew niyu wey ka timplu te Magbebaye, ka Manama te me kaap-apuan niyu. Awaa niyu ka langun ne malindit diye te timplu. 
Su warad migmatinumanen ka me kaapuan ta. Mareet ka hinimuwan dan diye te tangkaan te Magbebaye wey in-engkeran dan sikandin. In-engkeran dan ka timplu te Magbebaye wey mig-inniyuhan dan sikandin. 
Impanlekeban dan ka me gumawan diye te likansu te timplu wey impangebukan dan ka me sulu. Warad e sikandan migtutung te insinsu wey ke migpanubad naa te igpanubad ne egtutungen diye te matulus ne inged te Manama te Israil. 
Purisu, nalangetan ka Magbebaye te keet-etawan te Huda wey te Hirusalim. Ne indusaan din sikandan te amana ne makaliyas-liyas, egpakataneng, wey egpakabenga-benga te me etew. Nanengnengan niyud seini amana. 
Tenged kayi, migpangimatayan ka me kaapuan ta wey impandakep ka me anak ta, wey ka me asawa ta. 
“Ne kuntee, eggimu a te kasabutan te Magbebaye, ka Manama te Israil eyew egkaawe ka migpangebel-ebel ne langet din kanta. 
Me anak ku, kene kew e lengkay-lengkay, in-alam kew te Magbebaye eyew egsasindeg diye te tangkaan din, eyew egpamakey, eyew egkeyimu ne suluhuanen din, wey eyew te pegtutung te insinsu para kandin.” 
Seini ka me Libita ne migbunsud e migtrabahu te sikan de: Si Mahat ne anak ni Amasiyas wey si Huwil ne anak ni Asariyas ne egpuun te kabuhalan ni Kuhat. Si Kis ne anak ni Abdi wey si Asariyas ne anak ni Hahalalil ne egpuun te kabuhalan ni Mirari. Si Huwas ne anak ni Sima wey si Idin ne anak ni Huwas ne egpuun te kabuhalan ni Hirsun. Si Simri wey si Hihuwil ne egpuun te kabuhalan ni Ilisapan. Si Sakariyas wey si Mataniyas ne egpuun te kabuhalan ni Asap. Si Hihuwil wey si Simii ne egpuun te kabuhalan ni Himan. Si Simayas wey si Usil ne egpuun te kabuhalan ni Hidutun. 
Inlibulung dan ka me duma ran ne Libita wey immatulus dan ka pegkeetew ran. Ne miggendiye sikandan te timplu eyew te peglinis kayi. Intuman dan ka suhu te Hari sumale te lalag te Magbebaye. 
Ne migseled e te timplu ka me talagpanubad eyew te peglinis kayi. Impalihawang dan diye te lama ka me kasangkapan ne malindit ne nakita ran diye te seled. Ne impanguwa seeye te me Libita wey in-uyan diye te Napu te Kidrun. 
Ne migbunsud sikandan migpanlinis te timplu te an-anayan ne aldew te an-anayan ne bulan. Ne te igkawalu ne aldew, neumaan dan e ka likansu te timplu. Te lein e man‑e ne walu ne aldew, nalinisan dan e ka timplu. Purisu neimpusan dan ka langun ne himu te igkasapulu wey hen‑em (16) ne aldew te seeye ded ne bulan. 
Ne miggendiye sikandan ki Hari Isikiyas wey migkahi, “Nalinisan ney e ka intiru ne timplu te Magbebaye, ka altar ne tutunganan te igpanubad wey ka langun ne me kasangkapan kayi, ka lamisa ne eg-unturan te paan ne igpanubad wey ka langun ne me kasangkapan. 
Nalinisan ney e man‑e wey naandam e ka langun ne kasangkapan ne indegpak ni Hari Ahas te me timpu ne warad sikandin migmatinumanen te Manama. Diyad e seini kuntee te tangkaan te altar te Magbebaye wey egkaayun e ne eggamiten.” 
Ne migselem-selem mig-enew si Hari Isikiyas wey inlibulung din ka me upisyal te siyudad, wey miggendiye sikandan te timplu te Magbebaye. 
Ne migpanguyan sikandan te pitu ne turu ne me baka, pitu ne lukesan ne me karniru, pitu ne nati te karniru, wey pitu ne lukesan ne kambing ne igpanubad eyew te peglinis te migharian, te timplu, wey te Huda. Ne insuhu ni Hari Isikiyas ka me talagpanubad ne kabuhalan ni Aarun ne igpanubad seeye diye te altar te Magbebaye. 
Purisu inggimatayan te me talagpanubad ka me turu ne baka wey insawig dan ka langesa kayi diye te altar. Ne inggimatayan dan e man‑e ka me lukesan ne karniru wey insawig dan e man‑e ka langesa kayi diye te altar. Ne inggimatayan dan e man‑e ka me nati te karniru wey insawig dan e man‑e ka langesa kayi diye te altar. 
Ne ka me lukesan ne kambing ne igpanubad eyew te peglinis te sale, in-uyan dan diye te Hari wey diye te me etew, wey intel-eb dan ka me belad dan kayi. 
Ne inggimatayan te me talagpanubad ka me kambing wey in-ule dan ka langesa kayi diye te altar eyew igpalangesa eyew te peglinis te sale te langun ne matig-Israil. Su migsuhu ma ka Hari ne para te langun ne matig-Israil seeye se egtutungen ne igpanubad wey ka igpanubad ne para te sale. 
Ne inteil ni Isikiyas ka me Libita diye te timplu te Magbebaye ne mig-uyan te me putew ne basalan, alpa, wey me lira. Intuman din ka langun ne suhu te Magbebaye ne imbehey dengan ki Hari Dabid pinaahi ki Gad ne etew te Manama wey ki prupita Natan. 
Ne migsasindeg ka me Libita ne mig-uyan te me instrumintu ni Hari Dabid dengan wey ka me talagpanubad ne mig-uyan te me trumpita. 
Ne migsuhu si Isikiyas ne egtutungen e diye te altar ka igmanubad. Te egbunsuran e ka pegtutung, imbunsuran e degma ka peg-ulahing para te Magbebaye wey imparahing ka me trumpita, wey duma pad ne me instrumintu ni Dabid ne Hari dengan te Israil. 
Migsimba ka langun ne keet-etawan wey mig-ulahing ka me mangngulahing, wey migparahing ka me talagparahing te trumpita. Migpabulus ka peg-ulahing wey ka pegparahing te trumpita taman te neimpusan e ka pegtutung te igpanubad. 
Te neimpusan e ka pegtutung te igmanubad, migpanimbuel e si Hari Isikiyas wey ka langun ne duma rin wey migsimba te Magbebaye. 
Ne insuhu ni Hari Isikiyas wey te me upisyal rin ka me Libita ne eg-ulahing te pegdayan te Magbebaye pinaahi te ulahingen ne insulat ni Hari Dabid wey ni Asap ne etew te Manama. Mig-ulahing sikandan te pegdayan ne nahale, migpanimbuel, wey migsimba. 
Ne migkahi si Isikiyas, “Kuntee te inhalad niyud ma ka pegkeetew niyu diye te Magbebaye, hendini kew wey uyan kew te igmanubad niyu wey te ighalad para te pegpasalamat diye te timplu te Magbebaye.” Purisu migpanguyan ka keet-etawan te igmanubad wey te igpanubad para te pegpasalamat wey mig-uyan degma te igpanubad ne egtutungen seeye se langun ne egkeupian ne egpanubad. 
Ka langun ne igmanubad ne egtutungen ne in-uyan te keet-etawan, migginguma te pitu ne pulu (70) ka turu ne baka, sabeka ne gatus (100) ka lukesan ne karniru, wey daruwa ne gatus (200) ka nati te karniru. Ne ka sika langun, igmanubad ne egtutungen para te Magbebaye. 
Ne mig-uyan man‑e sikandan te duma ne igmanubad ne hen‑em ne gatus (600) ne turu ne baka wey tatelu ne libu (3,000) ne karniru wey kambing. 
Piru deisek de ka me talagpanubad ne eggilang te me ayam ne igpanubad ne egtutungen, purisu migbulig e ka me karumaan dan ne me Libita taman te neimpusan dan ka himu, wey taman te nakalinis e ka duma ne me talagpanubad te pegkeetew ran. Su matinumanen pad ne eglinis ka me Libita te pegkeetew ran du te me talagpanubad. 
Ne gawas te susuluhi ne igmanubad ne egtutungen, duen pad man‑e tabe te me ayam ne indasag para te keupianan, wey me halad ne inumen duma te igmanubad ne egtutungen. Purisu, nakalibed ka pegpamakey ran te Magbebaye diye te timplu. 
Ne si Isikiyas wey ka keet-etawan, nahale-gale tenged su imbulihan sikandan te Manama ne mahaan egkeimpusi ka himu.