2 Krunikas.
30.
Ne impanengneng ni Hari Isikiyas ka intiru ne Israil wey Huda, wey insulatan din degma ka me kabuhalan ni Ipraim wey ni Manasis ne keilangan ne eggendiye sikandan te timplu te Magbebaye ne Manama diye te Hirusalim eyew egsahakeen te Sahakeen te Peglihad te Panalihan te Magbebaye, ne Manama te Israil. 
Su ka Hari wey ka me upisyal rin, wey ka langun ne keet-etawan te Hirusalim, nekeg-uyun ne egsahakeen te Sahakeen te Peglihad te Panalihan te igkarangeb ne bulan. 
Su ware ma nekeyimu sikandan te Sahakeen te Peglihad te Panalihan te an-anayan ne bulan ne iyan ka timpu te pegsahakeen, tenged su ware pad nakalinis ka me talagpanubad te pegkeetew ran, wey ware pad nalibulung ka keet-etawan te Hirusalim. 
Ne ingkeupii te Hari wey te langun ne keet-etawan ka seeye ne planu. 
Purisu, impanengneng dan ka intiru ne Israil, puun te Birsiba peendiye te Dan, ne keilangan ne eggendiye sikandan te Hirusalim eyew eggimu te Sahakeen te Peglihad te Panalihan te Magbebaye, ka Manama te Israil. Te miglihad ne me sahakeen, pila-pila re ka migmanambung, piru kahi te balaud ne keilangan ne egtambung ka langun. 
Ne impandulung te me talagdulung diye te intiru ne Israil wey te Huda ka me sulat ne egpuun te Hari wey te me upisyal rin. Seini ka tahu te sulat: “Sikaniyu se me matig-Israil ne nakapallahuy puun te me Hari te Asirya, libed kew e te Magbebaye, ne Manama ni Abraham, ni Isaak wey ni Hakub, eyew eglibed sikandin kaniyu. 
Kene niyu ilingi ka me kaap-apuan niyu wey ka me suled niyu ne ware migmatinumanen te Magbebaye ne Manama ran, sikan naa ka imparereetan din sikandan sumale te nakita niyu kuntee. 
Kene niyu pakehala ka me ulu niyu iling te me kabuybuyahan niyu, peiluk-iluk kew te Magbebaye. Hendiye kew te timplu te Magbebaye ne immatulus din te ware egtamanan. Pamakey kew kandin eyew egkaawe ka migpangebel-ebel ne langet din kaniyu. 
Su ke eglibed kew te Magbebaye, ka karumaan niyu wey ka me anak niyu ne naddakep, igkeyid‑u e te nakarakep kandan wey igpalibed sikandan te seini ne tane. Su hiid‑uwen wey hiimenawen sikandin wey kene sikandin eg-engked kaniyu ke eglibed kew kandin.” 
Purisu immangendiyaan te me talagdulung te sulat ka me siyudad te intiru ne Ipraim wey Manasis taman te Sabulun piru migngingisiyan de iya sikandan wey miglelemetan. 
Piru duen ded me etew ne egpuun te Asir, Manasis wey Sabulun ne migpariralem te pegkeetew ran ne migmangendiye te Hirusalim. 
Ne insabeka te Manama ka langun ne matig-Huda pinaahi te pegtuman te suhu ni Hari Isikiyas wey te me upisyal rin. Ka seeye ne suhu, egpuun ded te Magbebaye. 
Purisu te igkarangeb ne bulan, masulug ne me etew ka migmangendiye te Hirusalim eyew te peggimu te Sahakeen te Paan ne Ware Patulin. 
Ne migbunsud sikandan pinaahi te pegpangawe te me altar te me diyus-diyus diye te Hirusalim lagkes seeye se me altar ne tutunganan te insinsu, wey immandegpak dan diye te Napu te Kidrun. 
Te igkasapulu wey hep‑at (14) ne aldew te igkarangeb ne bulan, immanggilang e mule te keet-etawan ka me nati te karniru ne para te Sahakeen te Peglihad te Panalihan wey neneyilew e ka me talagpanubad wey ka me Libita. Sikan naa ka nakalinis sikandan te pegkeetew ran wey egkaayun e sikandan ne egpanubad te egtutungen ne igpanubad diye te timplu. 
Ne migsasindeg sikandan diye te egsesasindehan dan sumale te balaud ni Muwisis ne suluhuanen te Manama. Ne insawig te me talagpanubad diye te altar ka langesa ne indulung te me Libita. 
Tenged te masulug ka me etew ne ware nakalinis te pegkeetew ran, ka me Libite e ka miggilang te me karniru ne para te Sahakeen te Peglihad te Panalihan para te seeye se ware nakalinis te pegkeetew eyew egkeyimu sikandan ne malinis. Ne inlinisan te me Libita ka me nati te karniru para te Magbebaye. 
Ne masulug ka miggendiye ne me matig-Ipraim, me matig-Manasis, me matig-Isakar wey me matig-Sabulun ne ware nakalinis te pegkeetew ran. Piru nakakeen ded sikandan te impanubad ne para te Sahakeen te Peglihad te Panalihan minsan ke supak te balaud, su mig-ampu ma si Hari Isikiyas para kandan. Migkahi sikandin, “Magbebaye, pasayluwa nu ka tagse sabeka ne etew 
ne nakasakat ne egpangananey te intiru ne pusung dan keykew te Manama te me kabuybuyahan dan minsan pad ke kene ne malinis sikandan sumale te balaud te timplu.” 
Ne narineg te Magbebaye si Isikiyas wey impasaylu rin sikandan. 
Migsahakeen te Paan ne Ware Patulin te pitu ne aldew ka me matig-Israil ne diye te Hirusalim, duma te dakel ne kahale. Tagse aldew, migdayan te Magbebaye ka me Libita wey ka me talagpanubad. Egkahale-gale sikandan ka egmangulahing diye te Magbebaye duma te meemen amana ne me instrumintu. 
Ne indayan ni Hari Isikiyas ka me Libita tenged te impakita ran ne katuenan te pegpamakey te Magbebaye. Purisu, migpabulus ka pegsahakeen te pitu ne aldew. Migpanubad sikandan te me dasag para te keupianan wey migpasalamat sikandan diye te Magbebaye, ka Manama te me kaap-apuan dan. 
Ne nekegsabut ka keet-etawan ne egsumpulan dan ka sahakeen te lein pad ne pitu ne aldew. Purisu migsahakeen sikandan te lein pad man‑e ne pitu ne aldew ne nahale-gale. 
Ne si Isikiyas ne Hari te Huda, migbehey diye te keet-etawan te sabeka ne libu (1,000) ne turu ne baka wey pitu ne libu (7,000) ne karniru wey kambing. Ne migbehey degma ka me upisyal te sabeka ne libu (1,000) ne turu ne baka wey sapulu ne libu (10,000) ne karniru wey kambing. Ne masulug pad ka me talagpanubad ne miglinis te pegkeetew ran. 
Miggale-gale ka langun ne keet-etawan te Huda wey ka me talagpanubad, me Libita, wey ka langun ne egpuun te Israil, wey ka me lapu ne egpuun te Israil wey te Huda. 
Purisu, due kahalaan diye te Hirusalim, su te timpu te anak ni Dabid ne si Sulumun ne Hari te Israil, ware ma neyitabu ne iling dutu. 
Ne migsasindeg ka me talagpanubad wey me Libita eyew egpanalangin te keet-etawan. Ne narineg sikandan te Manama, su ka peg-ampu dan nekeuma ma te langit, ka matulus ne ugpaan din.