2 Krunikas.
32.
Te neimpusan e ni Isikiyas ka meupiya ne inggimu rin, inlusuran te Hari te Asirya ne si Sinakirib ka Huda. Impalingutan din te me sundalu rin ka me siyudad ne in-alad te matikang wey makepal ne batu su migsuman-suman sikandin ne egkaahew rin seini. 
Te nakasahinda si Isikiyas ne eglusuran ni Sinakirib ka Hirusalim, 
migpanginginse e sikandin te me upisyal rin wey te me bahani rin meyitenged te planu rin ne egsubungen ka me sebseb diye te lihawangan te siyudad. Ne nabennalan sikandan kandin. 
Purisu migpeumew sikandan te masulug ne etew wey impasubung dan e kandan ka me sebseb wey me beuhan ne migtulayas diye te elat-elat te seeye ne tane. Ne migkahi sikandan, “Kene ne meupiya ne egkakita te Hari te Asirya ka dakel ne weyig ke egmangingume e sikandan.” 
Ne migpakannekal si Isikiyas ka mig-ayad-ayad te nareetan ne alad te siyudad ne matikang wey makepal ne batu. Migpasasindeg sikandin te me matikang ne baley ne pantawanan te me talagtameng wey impaakeban din pad man‑e ka alad, wey inlig‑en din ka Milu ne diye te Siyudad ni Dabid. Migpeyimu man‑e sikandin te masulug ne me panganiban wey me kalasag. 
Ne mig-alam sikandin te me upisyal te me sundalu ne egpangulu te keet-etawan, wey impalibulung din diye te plasa ne diye te gumawan te siyudad. Ne imbagget din ka me etew te migkahi, 
“Pakannekal kew wey pakabbulut kew. Kene kew kaaldek wey ke kaliyasi naa te Hari te Asirya wey te masulug ne me sundalu rin su due migduma kanta ne madmaresen pad kandin. 
Karesen de te etew ka insalihan din piru iyan ta mule duma ka Magbebaye ne Manama ta. Egbulig sikandin kanta wey egpakiggira sikandin para kanta.” Nabagget ka me etew te inlalag ni Isikiyas ne Hari te Huda. 
Ne taheed te inlingutan ni Sinakirib ne Hari te Asirya wey te me sundalu rin ka Lakis, migsuhu e sikandin te me upisyal rin peendiye te Hirusalim eyew egpakahiyan si Isikiyas ne Hari te Huda wey ka keet-etawan te Huda diye te Hirusalim: 
“Seini ka ingkahi ni Sinakirib ne Hari te Asirya, ‘Nekey bes ka amana niyu salihi? Mania te eg-uugpe kew pad due te nalingutan ney man e ka Hirusalim? 
In-ubatan kew re ni Isikiyas ne egluwasen kew te Magbebaye ne Manama niyu puun te Hari te Asirya eyew egkapatey kew te gutas wey egkammaraan.’ 
Ne keilangan ne egkanengnengan niyu ne sikandin ded ka migpangawe te me panubaran diye te me bubungan wey migsuhu te keet-etawan te Huda wey te Hirusalim ne sabeka re ne altar ka egsimbaan niyu wey ka egtutungan niyu te igmanubad niyu. 
Nanengnengan niyu ka inggimu ku wey ka inggimu te kaap-apuan ku te keet-etawan te duma ne me nasud. Duen naa me manama ne nakaluwas kandan puun te geem ku? 
Hentew‑a te me manama te me nasud ne indereetan te me kaap-apuan ku ka nakaluwas te keet-etawan din? Egkaluwas kew naa mule te Manama niyu? 
Purisu, kene kew palimbung wey ke paakal naa ki Isikiyas. Kene kew palintutuu kandin su ware manama te me nasud wey ke migharian naa ne nakaluwas te keet-etawan din puun keddi wey ke me kaap-apuan ku naa. Purisu kene kew degma egkaluwas te Manama niyu.” 
Ne masulug pad ka impanlalag ne mareet te me suluhuanen ni Sinakirib meyitenged te Magbebaye ne Manama te Israil wey te suluhuanen din ne si Isikiyas. 
Ne migsusulat si Sinakirib eyew te pegdeeg-deeg te Magbebaye ne Manama te Israil. Seini ka sulat din: “Ware nakaluwas ka me manama te duma ne me nasud te keet-etawan din puun keddi, purisu kene degma egpakaluwas ka Manama ni Isikiyas te keet-etawan din.” 
Ne impatamtamanan seeye ilalag te me upisyal ni Sinakirib te Hibruwanen ne linalahan eyew egkengaaldek wey egkengaliyasan ka me mahinged te Hirusalim ne diye te matikang wey makepal ne alad ne batu, wey eyew mahaan dan de egkaahew ka siyudad. 
Ne mareet ka immanlalag dan te Manama te Hirusalim wey in-iling dan de te me manama te keet-etawan te kalibutan ne inggimu re te etew. 
Tenged dutu, mig-ampu te Manama diye te langit si Hari Isikiyas, wey si prupita Isayas ne anak ni Amus. 
Ne migsuhu ka Magbebaye te panalihan ne migdereet te me sundalu, me kumandir, wey me upisyal te kampu te Hari te Asirya. Purisu, mig-uli si Hari Sinakirib ne neyilew-hilew. Te sabeka ne aldew te pegseled din diye te baley te manama rin, indugsuan sikandin te duma ne me anak din te kampilan. 
Seeye ne paahi ka pegluwas te Magbebaye ki Isikiyas wey te keet-etawan te Hirusalim puun ki Sinakirib ne Hari te Asirya wey puun te duma ne me nasud. Purisu warad samuk dan. 
Ne masulug ka me etew ne migmanguyan te me dasag diye te Hirusalim para te Magbebaye, wey in-uyanan dan degma si Isikiyas te me mateles ne me kalasag. Puun dutu intahud amana si Isikiyas te langun ne nasud ne nakalingut kandin. 
Te seeye ne timpu, migderalu si Isikiyas wey egpatey e perem sikandin. Ne mig-ampu sikandin te Magbebaye wey intabak sikandin wey imbehayan te tuus ne egkeulian ded sikandin. 
Piru ware migpasalamat sikandin te keupiya te Magbebaye su migpaambug e sikandin. Purisu, nalangetan ka Magbebaye kandin wey te keet-etawan te Huda wey te Hirusalim. 
Piru migbuyu sikandin te pasaylu wey migpariralem lagkes ka keet-etawan te Hirusalim. Purisu, ware nakasalerep sikandan te langet te Manama taman te duen pad si Isikiyas. 
Naratu amana si Isikiyas wey nabantug. Ne migpeyimu sikandin te me tinesanan ne para te pelata, bulawan, me mahal ne me batu, me leggu, me kalasag wey para te langun ne klasi te mahal ne me kasangkapan. 
Migpeyimu man‑e sikandin te tinesanan ne para te trigu, binu, wey lana. Migpeyimu man‑e sikandin te derakel ne kulungan ne para te langun ne baka wey para te me karniru. 
Migpeyimu sikandin te me siyudad ne eg-ugpaan din, wey masulug ka karniru rin wey baka, su imparatu ma amana sikandin te Manama. 
Si Isikiyas ded ka migpasubung te diraya te sebseb ne Gihun, wey diyad ipabaye te dapit te iglineb te Siyudad ni Dabid. Ne neyimu ni Isikiyas ka langun ne eggimuwen din. 
Piru te peggendiye te me sinalihan te Hari te Babilunya eyew egleuy kandin wey eyew eg-inse meyitenged te kein-inuwan ne neyitabu diye te Huda, imbalahad sikandin te Manama eyew te peg-eleg-eleg kandin, wey eyew te pegnengneng te langun ne diye te pusung din. 
Ka duma pad ne guhuren meyitenged te peghari ni Isikiyas wey ka meupiya ne neyimu rin, nasulat diye te Sulatanan te Impakita te Manama ki prupita Isayas ne anak ni Amus, wey diye te Sulatanan te me Guhuren te me Hari te Huda wey te Israil. 
Ne migpatey e si Isikiyas wey insabal diye te ampew te insabalan ded te me kabuhalan ni Dabid. Ne amana bantuha sikandin te keet-etawan te Huda wey te Hirusalim te pegpatey rin. Ne si Manasis e ne anak din ka migsubal kandin mighari.