Isra.
4.
Nanengnengan te me kuntere te me kabuhalan ni Huda wey ni Binhamin ne seeye se nekeuli puun te pegkarakep, egbalew-balew e egpasasindeg te timplu te Magbebaye ne Manama, ka Manama te Israil. 
Purisu, nangendiye sikandan ki Sirubabil wey diye te me pangulu te me pamilya, wey migkahi, “Pabuliha key nikaniyu te pegbalew-balew pegpasasindeg te timplu su migpamakey key ma degma te Manama iling kaniyu wey mighalad key degma kandin puun pad te timpu ni Isarhadun ne Hari te Asirya ne iyan mig-uyan kanami kayi.” 
Piru ingkahiyan sikandan enni Sirubabil, ni Hiswi, wey te duma ne pangulu te me pamilya te Israil, “Ware labet niyu te pegpasasindeg te timplu para te Manama ney. Sikanami re ka egbalew-balew egpasasindeg kayi para te Magbebaye ne Manama, ka Manama te Israil, sumale te insuhu kanami ni Siru ne Hari te Pirsya.” 
Sikan naa ka impakannekalan te me mahinged te seeye ne inged ne egkaawaan te kabagget ka me matig-Huda, wey inninaaldek dan ka me matig-Huda eyew kene egpakapabulus ka egbalew-balew te timplu, 
wey migsuul sikandan te me talagtambag eyew te pegbalabag te planu ran. Inggimu ran seini te langun ne timpu ne si Siru pad ka Hari te Pirsya taman te iyan e Hari si Daryu. 
Peglihad te masulug ne me leg‑un, te pegbunsud te peghari ni Aswiru, migsusulat ka seeye ne me etew te pegbayung meyitenged te keet-etawan te Huda wey te Hirusalim. 
Ne minsan te si Artasirsis e ka Hari te Pirsya, migsusulat ded diye te kandin ensi Bislam, si Mitridatis, si Tabiil, wey ka me duma ran. Nasulat seini te Aramayik ne linalahan wey inluwas seini diye te Hari. 
Ne migsusulat degma meyitenged te Hirusalim si Rihum ne gubirnadur te Samarya, wey si sikritari Simsay te igpeendiye ki Hari Artasirsis: 
“Ka seini ne sulat, egpuun ki gubirnadur Rihum, ki sikritari Simsay wey te me duma ran, me talewukum, te duma ne upisyal, wey te me matig-Irik, me matig-Babilunya, me matig-Susa ne diye te tane te Ilam, 
lagkes ka duma ne keet-etawan ne indeldel te mabantug wey talahuren ne si Asurbanipal, wey diye din e ipeugpe te me siyudad te Samarya, wey diye te duma ne me inged kayi te talipag te Weyig ne Iyupratis.” 
Miggenendue ka sulat ne impeuyan dan: “Mahal ne Hari Artasirsis, egpangemusta key se me suluhuanen nu ne keet-etawan ne nangugpe kayi te prubinsya ne talipag te Weyig ne Iyupratis. 
“Mahal ne Hari, egkeupian key ne egkanengnengan nu ne ka me Hudiyu ne nekeuli kayi, diyad e te Hirusalim. Egbalbalawan dan e man‑e te egpasasindeg seini se masinupaken wey mareet ne siyudad. Mahaan dan e egkeimpusi ka peggimu te alad ne matikang wey makepal su neimpusan dan man e te eg-ayad-ayad ka pabunsuranan kayi. 
Ne mahal ne Hari, emun ke egkeimpusan dan e te egbalew-balew egpasasindeg ka siyudad wey ka me alad ne matikang wey makepal, kenad sikandan egbayad te buhis wey te duma pad ne bayaranen, wey egdeisek e ka seleppi te migharian. 
Ne kuntee, tenged su matinumanen key ma ne me sakup nu, kene key egkeupian ne egtengteng te Hari ne egkeyilawan. Sikan naa, insulatan ney sikeykew eyew egpakanengneng ka kayi, 
su eyew due egkeyimu ne pegsusi te sinulat te me kaap-apuan nu. Te seini ne sinulat, egkanengnengan nu ne amana ne masinupaken ka nangugpe te siyudad ne Hirusalim, nakasamuk te me Hari wey te me prubinsya, wey migribildi puun pad dengan. Sikan naa ka nahuhus ka seini ne siyudad. 
Impataha ney sikeykew ne emun ke egkeimpusan e man‑e te egbalew-balew egpasasindeg ka siyudad wey ka me alad, kene kad e degma egpakamandu te prubinsya ne kayi te talipag te Weyig ne Iyupratis.” 
Ne seini ka tabak te Hari te sulat ne impeuyan dan: “Egpangemusta a ki gubirnadur Rihum, ki sikritari Simsay, wey te duma ran ne matig-Samarya, wey te intiru ne prubinsya ne due te talipag te Weyig ne Iyupratis. 
“Ne kuntee, nabase e naay-ayari ka impeuyan niyu ne sulat wey naluwas seini te linalahan ku. 
Purisu, impasusi kud wey nanengnengan ku ne ka nangugpe te seini ne siyudad, egkuntere te me Hari puun pad dengan, wey nabatasan dan ka pegsupak wey pegsukul. 
Ne nanengnengan ku degma ne due mabantug ne me Hari te Hirusalim ne iyan egsukut te buhis, wey te duma pad ne bayaranen. Sikandan ka migmandu te intiru ne prubinsya ne due te talipag te Weyig ne Iyupratis. 
Sikan naa, himu kew te sabeka ne suhu te pegpasanggel te himu te me etew, eyew kene egpakapabulus ka pegbalew-balew pegpasasindeg te seini ne siyudad taman te egsuhu ad e. 
Kene niyu naa seini balahara su eyew kene egkareetan ka migharian ku.” 
Te nabase e ka sulat ni Hari Artasirsis diye te tangkaan enni gubirnadur Rihum, ni sikritari Simsay, wey te duma ran, miglambunus e sikandan miggendiye te Hirusalim wey impehes dan pasanggela ka me Hudiyu. 
Ne iling te neyitabu dengan, nasanggel degma ka peggimu te timplu te Manama diye te Hirusalim taman te igkarangeb ne leg‑un te peghari ni Daryu te Pirsya.