Nihimiyas.
2.
Sabeka ne aldew, in-andaman e si Hari Artasirsis te binu, wey insendaran kud sikandin. Bulan seeye ne egngaranan te Nisan, te igkarangeb ne pulu (20) ne leg‑un te peghari din. Ne seeye pad iya ka timpu ne miglungku a diye te tangkaan te Hari. 
Sikan naa ka nekeinse sikandin keddi, “Mania te hendue te eglungku ka, ne kene ke ma perem egderalu? Nekey ka inlungku nu?” Ne naaldek a amana dutu. 
Ne intabak ku ka Hari, “Mahal ne Hari, egkeuyag ka te ware egtamanan! Mania te kene e naa eglungku te nalundus man e ka siyudad ne inlebengan te me kaap-apuan ku, wey nenasilaban e ka me gumawan dutu.” 
Ne mig-insaan a te Hari, “Nekey naa ka igkeupii nu?” Ne mig-ampu a diye te Manama. 
Ne intabak ku ka Hari, “Ke egkabennalan ke red mahal ne Hari, wey ke igkeupii e red nikeykew, tuhuti a ne eggendiye te Huda te siyudad ne inlebengan te me kaap-apuan ku eyew egbalbalawan ku seini te egpasasindeg.” 
Ne mig-inse e man‑e keddi ka Hari taheed te migpinnuu diye te kakiliran din ka Rayna, “Egkapilaan kaa diye wey ken‑u kaa eglibed?” Ne migkekerew a kandin ke ken‑u a eglibed wey impeyipanew ad nikandin. 
Ne migkahiyan ku man‑e ka Hari, “Ke egkabennalan ke red Mahal ne Hari, behayi a te me sulat para te me gubirnadur ne diye te prubinsya ne talipag te Weyig ne Iyupratis, su eyew egpaliharen a nikandan peendiye te Huda. 
Ne sulati nu ubag si Asap ka migbantey te puwalasan nu eyew egbehayan a nikandin te me kayu. Iggumawan seini te malig‑en ne baley ne matikang ne marani te timplu, ig-alad te siyudad, wey te igbebaley te eg-ugpaan ku.” Ne nabennalan ka Hari te inhangyu ku kandin su intantanuran e ma te Manama ku. 
Te peggipanew kud, imparumaan a te Hari te me upisyal te me sundalu wey te migmangudde. Te pegginguma ku diye te prubinsya ne talipag te Weyig ne Iyupratis, imbehey kud e te me gubirnadur ka me sulat te Hari. 
Piru nanengnengan ni Sanbalat ne Hurunihanen wey ni Tubiyas ne sabeka ne upisyal ne Amunihanen ne migginguma a eyew egbulihan ka me matig-Israil, wey neepes-epes sikandan. 
Ne miggendiya ad te Hirusalim wey natateluwan a diye. 
Te igkatelu ne marusilem, miggipanew a duma te pila ne me etew. Ne warad iya innangenan ku te igkeupii te Manama ne igpeyimu keddi te Hirusalim. Ne ware degma duma ne ayam ne in-uyan ney angin e te asnu ne in-unturan ku. 
Ne diya a miglihawang te Gumawan te Napu ne egpeendiye te Belun te Salimbaweng wey diye te Gumawan te Basuraan. Ne impitew ku ka me batu ne alad te siyudad ne newugnak pad, wey nenasilaban ka me gumawan kayi. 
Inggendiyaan ku degma ka Gumawan te Sebseb wey ka Lanew te Hari piru ware egkabayaan te asnu ne in-unturan ku. 
Purisu, migpabulus e naan de diye te Napu te Kidrun, wey impitew ku ka me batu ne alad te siyudad diye. Nataman, miglibed ad te imbaye ku ne Gumawan te Napu. 
Ne ware nakanengneng ka me pangulu ke hendei a egpuun wey ke nekey ka inggimu ku. Su ware mem pad Hudiyu ne ingguhuran ku meyitenged te me planu ku, minsan ka me talagpanubad, talahuren ne me etew, me upisyal, wey te duma pad ne egpakabulig te himu. 
Nataman, ingkahiyan ku sikandan, “Nakita niyu ka mareet ne neula-ula ta. Nareetan ka batu ne alad te Hirusalim ne matikang wey makepal, wey nasilaban ka me gumawan kayi. Purisu, egbalbalawan ta ka me alad te siyudad eyew kene kid e egkeyilawan.” 
Ne impangguhuran ku sikandan te intantanuran a te Manama ku wey ke nekey ka ingkahi te Hari keddi. Ne migkahi sikandan, “Uya, egbalbalawan ta ka me alad.” Purisu, migpangandam e sikandan eyew te pegbunsud te himu. 
Piru te nanengnengan seini ni Sanbalat ne Hurunihanen wey ni Tubiyas ne sabeka ne upisyal ne Amunihanen, wey ni Gisim ne Arabihanen, ingngisiyan key e nikandan wey imbaley-baley. Ne migkahi sikandan, “Nekey‑a seini se eggimuwen niyu? Migsuman-suman kew bes ne egkuntere te Hari?” 
Ne migtabak a, “Eglampus key pinaahi te bulig te Magbebaye ne Manama te langit. Ne sikanami se me suluhuanen din, igpabulus ney ka pegbalew-balew te matikang wey makepal ne alad ne batu. Piru sikaniyu, ware mule baad niyu kayi, wey ke katenged naa, wey ke itulan naa kayi te Hirusalim.”