Nihimiyas.
5.
Due me alunggun ne migsagsahukul diye te duma ran ded ne me Hudiyu. 
Migkahi sikandan, “Masulug ka me anak ney wey migkeilangan key te egkeenen ne trigu eyew egkeuyag key.” 
Ne migkahi degma ka duma, “Impamirinda ney e ka me kamet ney, me parasan ney, wey ka me baley ney eyew due egkakeen ney tenged su egkabitil key.” 
Ne due man‑e migkahi, “Nakapanambey key te seleppi para te buhis ne egbuyuen te Hari te me kamet ney wey me parasan ney. 
Ne kuntee, minsan nenekeg-iling ka langesa ney, wey ka anak ney ne me lukes iling ded degma te anak dan ne me lukes, napehes key red ne igpeuripen kandan ka me anak ney. Ne ka malehet, ka duma ne me anak ney ne me malitan impeuripen ney e. Piru ware egkeyimu ney su ka me kamet ney wey ka me parasan ney, naangken man‑e te duma ne etew.” 
Nalanglangetan a te pegkarineg ku te pegsagsahukul ran. 
Ne insuman-suman ku seini paay-ayari wey te naay-ayaran kud seini te egsuman-suman, iyan ku indakeselan te sale ka me talahuren ne me etew wey me upisyal te me etew, wey ingkahiyan ku, “Inleig-leig niyu ka me suled niyu su impaanakan niyu ma ka seleppi ne impasambayan niyu kandan.” Ne impalibulung ku ka keet-etawan. 
Ne ingkahiyan ku sikandan, “Inggimu ta ka langun ne egkeyimu ta eyew te peglekat te me karumaan ta ne me Hudiyu ne nakabelegye diye te duma ne me nasud. Piru tenged te inggimu niyu, napehes e man‑e sikandan ne migbelegye te pegkeetew ran diye mismu te kaniyu. Layun te naan de eglekata sikandan?” Ne nenakapeeneng-eneng de sikandan se nenatanengan. 
Sikan naa ka migpabulus-bulus a, “Kene ne meupiya ka inggimu niyu. Keilangan ne eg-ugpe kew ne due kaaldek te Manama eyew kene ki egdali-dian te me nasud ne me kuntere ta. 
Timul pad, sikeddi wey ka me suled ku ne me lukes, wey ka me suluhuanen ku, migpasambey key degma te seleppi wey te egkakeen kandan. Ne kuntee igpeeneng-eneng tad ka pegpasubla te egsukut te insambayan dan. 
Ne ilibed niyu kuntee ne aldew ka me kamet dan, ka me parasan dan, ka me ulibuwan dan, wey ka me baley ran. Ilibed niyu man‑e ka anak te seleppi ne impasambayan niyu kandan, wey ka egkakeen, wey me binu, wey ka mentika.” 
Ne migtabak sikandan, “Iglibed ney ka me karatuan dan wey kene key e egsukut kandan. Eggimuwen ney e ka ingkahi nu.” Ne impeumew ku ka me talagpanubad, wey impepanaad ku diye te tangkaan dan ka me pangulu wey me upisyal ne egtumanen dan iya ka impanaad dan. 
Ne inggekad ku ka tabed ku wey intepungan ku ka kumbale ku wey migkahi a, “Iling kayi ka eggimuwen te Manama kaniyu, te me baley niyu, wey te me karatuan niyu ke kene niyu egtumanen ka impanaad niyu. Eg-aween din perem ka langun diye te kaniyu.” Ne migkahi ka langun, “Malehet iya!” Ne indeyrey ran ka Magbebaye ne Manama, wey intuman dan ka impanaad dan. 
Neyimu a ne gubirnadur te Huda te sapulu wey daruwa (12) ne leg‑un, bunsud te igkararuwa ne pulu (20) taman te tatelu ne pulu wey daruwa (32) ne leg‑un te peghari ni Artasirsis. Ne minsan pad due, wara ad iya migkeen te egkakeen te egkeyimu ne gubirnadur wey iling ded degma ka me suled ku. 
Piru impeyirapan te me gubirnadur ne nekewun‑a keddi ka me etew, wey impanguwa ka egkakeen dan wey ka me binu ran. Impabehey pad man‑e sikandan te hep‑at ne pulu (40) ne buuk ne pelata. Minsan ka me talagbulig te gubirnadur, mig-ambag-ambag degma migleig-leig te me etew. Piru ware ku himuwa seini su naaldek a te Manama. 
Ne migpakannekal a ka egbalew-balew te batu ne alad te siyudad wey miglibulung diye ka langun ne suluhuanen ku eyew egbulig te himu. Ne wara a iya migkamkamuney te tane. 
Ne timul pad kayi, wara a migbuyu te minsan nekey, minsan sikeddi ka migpakeen te 150 ne me Hudiyu wey te me upisyal ran, ware pad labet te me mahaliyug ne egpuun te minsan hendei ne me nasud. 
Ne tagse aldew, miglapa a te sabeka ne baka wey hen‑em ne mallambeg ne me karniru wey me manuk. Ne tagse sapulu ne aldew, migbehey a man‑e te langun ne klasi te binu. Piru minsan pad iling due ka inggimu ku, wara a migkuwa te minsan nekey. Nakanengneng a ne mabehat amana seini para te me etew, purisu, wara a migkuwa te minsan nekey ne pegkeen ne para te gubirnadur. 
He Manama ku, tantanuri a te langun ne neyimu ku te seini ne me etew.