Nihimiyas.
7.
Te nabalbalawan e ka batu ne alad te siyudad, wey te nenakatangen e ka me gumawan, mig-alam ad te me etew ne egbantey te me gumawan te siyudad, wey me mangngulahing, wey me Libita. 
Imbehey ku ka katenged te pegbantey te Hirusalim diye te suled ku ne si Hanani wey ki Hananiyas ne pangulu te me talagbantey te alad te siyudad, su egkasalihan ma si Hananiyas wey dakel ka pegkaaldek din te Manama du te me duma rin. 
Ingkahiyan ku sikandan, “Kene niyu palukati ka me gumawan te siyudad te Hirusalim te kene pad egsile ka aldew wey palekebi niyu seini te kene pad eglineb ka aldew. Ne minsan pad ke due egbantey te gumawan, egpalekeban de due seini wey egpapagulan. Alam kew te mahinged te Hirusalim ne egpabantayen niyu kayi te siyudad wey pegsuwaya niyu sikandan. Ka duma diye egbantey te eg-ugpaan te me talagbantey, wey ka duma diye te tangkaan te me baley ran.” 
Maluag wey dakel ka siyudad te Hirusalim piru deisek de ka mig-ugpe, wey ware pad neyimu ne iyam ne me baley. 
Ne imbanasalan a te Manama ne igpalibulung ka me talahuren ne me etew wey me upisyal, wey ka me etew eyew egrihistruwen sumale te kaap-apuan dan. Ne nakita ku ka listaan te me etew ne nekewun‑a nekeuli te siyudad. 
Seini ka listaan te keet-etawan te prubinsya te Huda ne nekeuli puun te pegkarakep. Impandakep dengan ni Hari Nibukadnisar ka me pamilya ran wey impanguyan diye te Babilunya. Ne kuntee nekeuli e diye te Hirusalim wey diye te me lungsud dan ne sakup te Huda. 
Iyan dan pangulu ensi Sirubabil, si Huswi, si Nihimiyas, si Asariyas, si Raamiyas, si Nahamani, si Murdikay, si Bilsan, si Mispirit, si Bigbay, si Nihum, wey si Baana. 
Seini ka kasuluhan te me lukes ne me Israilita ne nekeuli puun te pegkarakep: 2,172 ka me kabuhalan ni Parus; 372 ka me kabuhalan ni Sipatiyas; 652 ka me kabuhalan ni Ara; 2,818 ka me kabuhalan ni Pahat-Muwab ne kabuhalan ni Huswi wey ni Huwab; 1,254 ka me kabuhalan ni Ilam; 845 ka me kabuhalan ni Satu; 760 ka me kabuhalan ni Sakay; 648 ka me kabuhalan ni Binuy; 628 ka me kabuhalan ni Bibay; 2,322 ka me kabuhalan ni Asgad; 667 ka me kabuhalan ni Adunikam; 2,067 ka me kabuhalan ni Bigbay; 655 ka me kabuhalan ni Adin; siyam ne pulu wey walu (98) ka me kabuhalan ni Atir (ne ingngaranan degma ki Hisikiyas); 328 ka me kabuhalan ni Hasum; 324 ka me kabuhalan ni Bisay; 112 ka me kabuhalan ni Harip; wey siyam ne pulu wey lalimma (95) ka me kabuhalan ni Gibyun. 
Seini ka kasuluhan te me etew ne ka kaap-apuan dan diye nangugpe te seini ne me lungsud: 188 te Bitlihim wey Nitupa; 128 te Anatut; hep‑at ne pulu wey daruwa (42) te Bit-Asmabit; 743 te Kiryat-Hiyarim, Sipira, wey Biirut; 621 te Rama wey Giba; 122 te Mikmas; 123 te Bitil, wey Ay; lalimma ne pulu wey daruwa (52) diye te sabeka ne Nibu; 1,254 te sabeka ne Ilam; 320 te Harim; 345 te Hiriku; 721 te Lud, Hadid, wey Unu; 3,930 te Sinaa. 
Seini ka me kabuhalan te me talagpanubad ne nekeuli puun te pegkarakep: 973 ka me kabuhalan ni Hidayas ne kabuhalan ni Huswi; 1,052 ka me kabuhalan ni Imir; 1,247 ka me kabuhalan ni Pasur; 1,017 ka me kabuhalan ni Harim. 
Seini ka me kabuhalan te me Libita ne nekeuli puun te pegkarakep: pitu ne pulu wey hep‑at (74) ka me kabuhalan ni Huswi wey ni Kadmiil, ne me kabuhalan ni Hudiba; 148 ka me mangngulahing diye te timplu ne me kabuhalan ni Asap; 138 ka me talagbantey te gumawan te timplu ne me kabuhalan ni Salum, ni Atir, ni Talmun, ni Akub, ni Hatita, wey ni Subay. 
Seini ka kabuhalan te me suluhuanen diye te timplu ne nekeuli puun te pegkarakep: me kabuhalan enni Siha, ni Hasupa, wey ni Tabaut; me kabuhalan ni Kirus, ni Siya, wey ni Padun; me kabuhalan ni Libana, ni Hagaba, wey ni Salmay; me kabuhalan ni Hanan, ni Gidil, wey ni Gahar; me kabuhalan ni Riyahas, ni Risin, wey ni Nikuda; me kabuhalan ni Gasam, ni Usa, wey ni Pasiya; me kabuhalan ni Bisay, ni Miyunim, wey ni Nipusisim; me kabuhalan ni Bakbuk, ni Hakupa, wey ni Harhur; me kabuhalan ni Baslit, ni Mihida, wey ni Harsa; me kabuhalan ni Barkus, ni Sisira, wey ni Tima; me kabuhalan ni Nisiya, wey ni Hatipa. 
Seini ka kabuhalan te me suluhuanen ni Sulumun ne nekeuli puun te pegkarakep: me kabuhalan ni Sutay, ni Supirit, wey ni Pirida; me kabuhalan ni Haala, ni Darkun, wey ni Gidil; me kabuhalan ni Sipatiyas, ni Hatil, ni Pukirit-Hasibaim, wey ni Amun. 
Migginguma te 392 ka langun ne me suluhuanen diye te timplu wey ka me kabuhalan te me suluhuanen ni Sulumun. 
Ne due 652 ne kabuhalan enni Dilyas, ni Tubiyas, wey ni Nikuda ne nekeuli puun te me lungsud te Tilmila, te Til-Harsa, te Kirub, te Adan, wey te Imir. Piru kene sikandan egpakapamalehet ke me Israilita naan iya sikandan. 
Due degma me talagpanubad ne me kabuhalan ni Habayas, ni Hakus, wey ni Barsilay ne kene egkapamalehetan ne me kabuhalan sikandan te Israil. Seini se egngaranan ki Barsilay nakaasawa te anak ni Barsilay ne matig-Gilyad, wey puun dutu, iyan din e ngaran ka ngaran te anuhang din. 
Ne impamitew ran ka me ngaran dan diye te listaan te me kaap-apuan dan, piru ware dan seini nakita, sikan naa ka ware sikandan dawata ne talagpanubad wey in-isip sikandan ne mallindit. 
Ingkahiyan sikandan te gubirnadur ne kene egkaayun ne egkeen te inhalad diye te Manama taman te duen e talagpanubad ne egpakahamit te Urim wey Tumim ka egpanginginse te Magbebaye ne Manama. 
Ne ka kasuluhan te me etew ne nekeuli puun te pegkarakep 42,360, ne ware pad nakalagkes te pegseel ka: 7,337 ne suluhuanen ne me lukes wey me malitan 245 ne mangngulahing ne me lukes wey me malitan 736 ne me kudde 245 ne me mula 435 ne me kamil wey 6,720 ne me asnu. 
Due me pangulu te pamilya te me etew ne migbehey te kasangkapan ne eggamiten te pegbalew-balew pegpasasindeg te timplu: ka gubirnadur migbehey te walu (8) ne kilu ne bulawan, lalimma ne pulu (50) ne yahung, wey 530 ne kumbale te me talagpanubad; 
ka duma ne me pangulu te me pamilya migbehey te 168 ne kilu ne bulawan wey 1,250 ne kilu ne pelata; 
ka nasame ne me etew migbehey te 168 ne kilu ne bulawan, 1,200 ne kilu ne pelata, wey hen‑em ne pulu wey pitu (67) ne kumbale te me talagpanubad. 
Ne mig-uli e ka langun ne etew diye te me lungsud dan wey diyad nangugpe minsan ka me talagpanubad, me talagbantey te gumawan te timplu, me mangngulahing, wey me suluhuanen diye te timplu. Ne te igkapitu ne bulan, diyad ka keet-etawan te Israil te me lungsud dan.