Nihimiyas.
9.
Ne miglibulung ka keet-etawan te Israil te igkarangeb ne pulu wey hep‑at (24) ne aldew te sikan ded ne bulan wey migpuasa ne migsaluub te saku, wey migbubukbuk te abu te me ulu ran. 
Ne migsuwey-suwey ka me kabuhalan ni Israil puun te me lapu, taheed te in-ila ran wey impangguhud ka me sale dan, wey ka me sale te kaap-apuan dan. 
Ne migpabulus sikandan ka migsasindeg te tatelu ne uras taheed te imbasa ka baseen te Balaud te Magbebaye ne iyan ka Manama ran. Te tatelu e man‑e ne uras, impangguhud dan ka me sale dan wey migsimba te Magbebaye ne iyan ka Manama ran. 
Ne migsasindeg diye te innaggaheranan ka Libita ne si Huswi, si Bani, si Kadmiil, si Sibaniyas, si Buni, si Siribiyas, si Bani ne lein, wey si Kinani, ne migpanaman-taman mig-ampu diye te Magbebaye ne Manama ran. 
Ne migkahi ka me Libita ne si Huswi, si Kadmiil, si Bani, si Hasabniyas, si Siribiyas, si Hudiyas, si Sibaniyas, wey si Pitaniyas, “Sasindeg kew wey deyraya niyu ka ware egtamanan ne Magbebaye ne Manama niyu!” Ne migkahi sikandan, “Egdayanen ka mabantug ne ngaran nu! Kene egkalepengan ka ngaran nu te pegsaye wey pegdayan ney.” 
Ne migkahi si Isra, “Sikeykew re ka Magbebaye ne Manama ne miggimu te langit wey te langun ne bituen ne diye. Inggimu nu ka tane, ka dahat, wey ka langun ne tahu dutu. Ne imbehayan nu ka langun ne hinimuwan nu te umul, wey migsimba keykew ka me panalihan diye te langit. 
Sikeykew ka Magbebaye ne Manama ka mig-alam ki Abram wey mig-angey kandin puun te Ur ne diye te Babilunya ne in-ugpaan te me Kaldiyanen, wey ingngaranan nu sikandin ki Abraham. 
Ne migsesaad ka kandin tenged su nakita nu ne matinumanen sikandin keykew. Iyan nu kasabutan kandin se igbehey nu te kabuhalan din ka tane te me matig-Kanaan, Hitihanen, Amurihanen, Pirisihanen, Hibusihanen, wey me Girgasihanen. Ne intuman nu iya ka insaad nu su matareng ka. 
“Nakita nu ka keyirapan te me kaap-apuan ney diye te Ihiptu, wey narineg nu ka pegpangananey ran diye te Malalab ne Dahat. 
Ingkuntere nu si Paraun te peggimu nu te me palinneu wey te kein-inuwan, wey te langun ne me suluhuanen din, wey te keet-etawan din, su nanengnengan nu ka pegdeeg-deeg dan te kaap-apuan ney. Ne migmabantug ka ngaran nu taman kuntee. 
Ne imbaad nu ka dahat diye te tangkaan te me etew nu eyew egpakabaye sikandan te mammara ne tane. Piru indegpak nu diye te maralem ka egpanalukun kandan; iling te batu ne intanled diye te pused te dahat. 
Miggun‑a ka kandan iling te sungkaleg ne gapun te timpu te maaldew, wey inteng-awan nu sikandan te sungkaleg ne hapuy te timpu te marusilem. 
Migpamaneug ka diye te Bubungan ne Sinay puun te langit wey migpakiglalag ka kandan. Imbehayan nu sikandan te eleg ne me tulumanen, malehet ne me balaud, wey meupiya ne me suhu. 
Impanulu nu kandan ka matulus te Aldew te Peggimeley, wey imbehayan nu sikandan te me tulumanen, me balaud, wey me suhu pinaahi te suluhuanen nu ne si Muwisis. 
“Te impanggutasan sikandan, imbehayan nu sikandan te egkakeen ne egpuun te langit, wey te nammaraan sikandan, impeinum nu sikandan te weyig ne egpuun te batu. Insuhu nu sikandan ne eg-ahawen dan ka tane ne insaad nu ne igbehey kandan eyew eg-ugpaan dan. 
“Piru me hambuhen sikandan, me makehal se me ulu, wey ware migpalintutuu te me suhu nu. 
Kene sikandan egpammineg keykew, wey inlingawan dan ka me kein-inuwan ne inggimu nu kandan. Makehal se me ulu ran, wey nasi mig-alam te egpangulu kandan eyew eglibed diye te Ihiptu ne nekeuripen kandan. Piru mahaan ka egpasaylu, hiid‑uwen, hiimenawen ka, mananey egkabelu, wey dakel se geyinawa ne kene egkabalbalawan. Sikan naa ka ware nu sikandan engkeri, 
minsan ke miggimu sikandan te larawan te nati ne baka wey migkahi, ‘Seini ka manama ne migluwas kanta puun te Ihiptu.’ Amana ka pegbaley-baley ran keykew. 
Ne tenged te dakel ne hid‑u nu kandan, ware nu sikandan engkeri diye te disirtu. Ne ware mig-engked kandan ka gapun ne egpekeiling te sungkaleg ne tuus kandan te maaldew, wey ka hapuy ne egpekeiling te sungkaleg ne egteng‑ew te egbayaan dan te marusilem. 
Ne imbehey nu kandan ka meupiya ne Panisingan nu eyew egpanulu kandan. Ne ware ka migpeeneng-eneng ka migbehey kandan te mana ne egkakeen wey te weyig eyew kene sikandan egkengammaraan. 
Intanggu nu sikandan diye te disirtu te hep‑at ne pulu (40) ne leg‑un ne warad egpamitawen. Ware nalledak ka me kumbale dan wey ware nallupangi ka me paa ran. 
“Ne imbulihan nu ka me kaap-apuan ney te pegtalu te me migharian wey te me nasud, wey imbehey nu kandan ka tane dan. Ne sikandan e ka kamuney te tane ni Sihun ne Hari te Hisbun wey te tane ni Ug ne Hari te Basan. 
Impamasalig nu ka me kabuhalan dan iling te me bituen ne diye te langit wey in-uyan nu sikandan diye te tane ne insaad nu te me kaap-apuan dan eyew eg-ugpaan dan. 
Sikan naa ka inggendiyaan dan e seeye ne tane wey iyan e egpakakamuney sikandan. Impatalu nu kandan ka me Kanaanen ne mahinged te seeye ne tane. Imbehey nu kandan ka me Kanaanen lagkes ka me Hari dan, eyew egkeyimu ran ka igkeupii ran ne eggimuwen te Kanaanen. 
Naahew ran ka me siyudad ne in-alad te matikang wey makepal ne batu wey ka meupiya ne tane; naangken dan ka me baley ne napenu-penu te memeupiya ne kasangkapan. Naahew ran degma ka me belun, me parasan, me kayu ne ulibu, wey me kayu ne masulug se behas. Purisu nangeen sikandan wey nabbulung; miglambeg sikandan wey nahale-gale tenged te egkasublaan ne keupiya nu. 
“Piru migsupak sikandan wey migribildi keykew, wey imbalahad dan ka balaud nu. Impangimatayan dan ka me prupita nu ne iyan migpaney-paney kandan eyew egpakalibed diye te keykew. Ne amana ka pegbaley-baley ran keykew. 
Sikan naa ka imbehey nu sikandan diye te me kuntere dan ne migbayad-bayad kandan. Piru migpangananey sikandan keykew te timpu te nabaybayaran dan e wey migpammineg ka kandan puun te langit. Ne tenged te dakel ne hid‑u nu, impeuyanan nu sikandan te me manluluwas ne migluwas kandan puun te me kuntere dan. 
Piru te migmeupiye e se keugpe dan, miggimu e man‑e sikandan te mareet diye te tangkaan nu. Ne imbehey nud man‑e sikandan te me kuntere dan wey iyan e migmandu kandan. Ne emun ke egpangananey e man‑e sikandan keykew, egpamminehen nu red sikandan due te langit, wey layun nu sikandan luwasa tenged te hid‑u nu. 
Impanpanayan nu sikandan ne igpatuman ka me Balaud nu, piru nasi migpaambug sikandan wey ware migtuman te me suhu nu. Nakasupak sikandan te me tulumanen nu ne egpakabehey te malehet ne umul te seeye se egtuman dutu. Migpanamantaman sikandan migsupak keykew wey migpakehal te me ulu ran wey ware migpammineg keykew. 
Imparumdumaan nu sikandan te malayat ne leg‑un. Impeuyanan nu sikandan te Panisingan nu ne iyan migpaney-paney kandan pinaahi te me prupita nu, piru warad iya sikandan miglinga-linga. Sikan naa ka imbehey nud sikandan te me etew ne mig-ugpe diye te marani ran. 
Piru tenged te dakel ne hid‑u nu, ware nu sikandan gulaa langun wey ware nu sikandan engkeri te ware egkatamanan. Su hiid‑uwen ka wey hiimenawen ne Manama. 
“Sikeykew ka Manama ney—maresen ka, kein-inuwan wey mabantug. Intuman nu ka kasabutan nu, wey impakita nu ka geyinawa nu ne kene egkabalbalawan. Kuntee, kene nu sumsumana ne kene ne mahirap ka langun ne peg-antus ney. Mig-antus key wey ka me Hari ney, me pangulu, me talagpanubad, me prupita, me kaap-apuan ney, wey te langun ne keet-etawan nu puun pad te timpu ne indeeg-deeg key te me Hari te Asirya taman kuntee. 
Piru eleg ka inggimu nu ne peglegpad kanami. Matinumanen ka te saad nu kanami piru makasesale key mule. 
Ware mig-ikul te me Balaud nu ka me Hari ney, ka me pangulu ney, ka me talagpanubad ney, wey ka kaap-apuan ney. Ware miglinga-linga sikandan te me suhu nu wey te me paney-paney nu kandan. 
Ne ware sikandan migpamakey keykew wey ware mig-inniyug te maddeet ne hinimuwan dan, minsan pad due migharian dan wey impakita nu ka dakel ne keupiya nu kandan, wey minsan imbehayan nu sikandan te maluag ne tane ne meupiya. 
“Ne kuntee, neuripen key e kayi te inged ne imbehey nu te kaap-apuan ney, eyew egpakakeen key perem te ig-uma wey egkeuralan te langun ne keupianan kayi, piru nasi key re iya neuripen. 
Tenged te me sale ney, nekeendiyad e ka nahaani ney te me Hari ne impahari nu kanami. Ne sikandan e ka migmandu kanami wey te me ayam ney sumale te igkahale dan. Ne amana key mig-antus.” 
Ne tenged kayi langun, miggimu key te mapahetpet ne kasabutan wey insulat ney seini wey intahuan te silyu te me pangulu ney, me Libita, wey te me talagpanubad.