Nihimiyas.
10.
Ka an-anayan ne migtahu te silyu rin iyan ka gubirnadur ne si Nihimiyas ne anak ni Hakaliyas, wey si Sidikiyas. 
Ne ka me talagpanubad ne migtahu te silyu ran iyan ensi: Sirayas, si Asariyas, si Hirimiyas, si Pasur, si Amariyas, si Malkiyas, si Hatus, si Sibaniyas, si Maluk, si Harim, si Mirimut, si Ubadiyas, si Danyil, si Ginitun, si Baruk, si Misulam, si Abiyas, si Mihamin, si Maasiyas, si Bilgay, wey si Simaya. 
Ne ka me Libita ne migtahu te silyu ran iyan ensi: Huswi ne anak ni Asaniyas, si Binuy ne migpuun te kabuhalan ni Hinadad, si Kadmiil wey ka me suled dan ne ensi Sibaniyas, si Hudiyas, si Kilita, si Pilayas, si Hanan, si Mika, si Rihub, si Hasabiyas, si Sakur, si Siribiyas, si Sibaniyas, si Hudiyas, si Bani, wey si Bininu. 
Ne ka me pangulu ne migtahu te silyu ran iyan ensi: Parus, si Pahat-Muwab, si Ilam, si Satu, si Bani, si Buni, si Asgad, si Bibay, si Aduniyas, si Bigbay, si Adin, si Atir, si Isikiyas, si Asur, si Hudiyas, si Hasum, si Bisay, si Harip, si Anatut, si Nibay, si Magpiyas, si Misulam, si Hisir, si Misisabil, si Saduk, si Haduwa, si Pilatiyas, si Hanan, si Anayas, si Husiyas, si Hananiyas, si Hasub, si Haluhis, si Pilha, si Subik, si Rihum, si Hasabna, si Maasiyas, si Ahiyas, si Hanan, si Anan, si Maluk, si Harim, wey si Baana. 
Ka duma ne me etew, ka me talagpanubad, ka me Libita, ka me talagbantey te gumawan te timplu, ka me mangngulahing, ka me suluhuanen diye te timplu, wey ka langun ne etew ne migsuwey puun te me lapu eyew te pegtuman te Balaud te Manama, duma te me asawa ran, me anak dan ne me lukes wey me malitan, wey te langun ne bate ne egtulik e, 
migpanaad, duma te me talahuren ne me etew: “Egtumanen ney ka Balaud te Manama ne imbehey rin te suluhuanen din ne si Muwisis. Egsaad key ne egtumanen ney ka langun ne insuhu te Magbebaye ne Manama ney wey ka me tulumanen, wey me balaud ne imbehey rin. Egdawaten ney ka dilus ke kene ney egkatuman ka saad ney. 
“Egsaad key ne kene ney e egpepangasaween ka me anak ney ne me lukes wey ke igpaasawa ney naa ka me anak ney ne me malitan, te me lapu ne nangugpe te inged ney. 
“Egpanaad key man‑e ne kene key egbebeli ke egpamelegye ka me lapu te minsan nekey wey ke egkakeen naa te Aldew te Peggimeley, wey te me mahal ne aldew. Ne te tagse igkapitu ne leg‑un, kene ney egpamulaan ka tane ney, wey kene ney e egsukuten ka me utang te duma. 
“Ne egpanaad key man‑e ne egbehey key tagse leg‑un te hep‑at ne gramu te pelata eyew igbulig te eggimuwen diye te timplu. 
Igbeli seini te paan ne ighalad, te egkakeen ne ighalad tagse aldew, te igpanubad ne me ayam, te ighalad para te Aldew te Peggimeley, te me igsahakeen te Iyam ne Bulan, wey te duma pad ne me sahakeen. Igbeli man‑e seini te duma ne igpanubad diye te Manama, wey te igpanubad te pegpalangesa eyew te peglinis te sale te Israil, wey te langun ne egkeilanganen para te timplu. 
“Egpintut-pintut key se me talagpanubad, me Libita, wey lagkes ka me etew, eyew egkanengnengan ney ke ken‑u eg-uyan ka tagse pamilya te kayu ne igtemeg diye te altar ne diye te timplu te Magbebaye ne Manama ney te tagse leg‑un sumale te nasulat te Balaud. 
“Egsaad key man‑e ne eg-uyanen ney tagse leg‑un diye te timplu te Magbebaye ne Manama ka an-anayan ne uma te me pinamula ney, wey ka an-anayan ne behas te me kayu ney. 
Eg-uyanen ney degma diye te me talagpanubad ne migtrabahu diye te timplu ka kinakakayan ne anak ney ne me lukes, lagkes ka kinakakayan ne nati te me baka, me karniru, wey me kambing, sumale te nasulat te Balaud. 
“Ne eg-uyanen ney pad man‑e ka subla ne meupiya ne linuyang ne harina, duma pad ne me dasag, langun ne behas te kayu, iyam ne binu, wey mentika te ulibu diye te me talagpanubad diye te sinabeng ne tinesanan diye te timplu. “Ne eg-uyanen ney man‑e diye te me Libita ka igkasapulu te langun ne uma te pinamula ney, su ka me Libita ma ka eglimud te igkasapulu puun te langun ne lungsud ne intrabahuwan ney. 
Ne egdumaan te talagpanubad ne kabuhalan ni Aarun ka me Libita ne egpanlimud te igkasapulu. Ne iyan e eg-uyan te igkasapulu te nalimud dan ka me Libita diye te sinabeng ne tinesanan te timplu. 
Ne ka keet-etawan te Israil, lagkes ka me Libita, keilangan ne egmanguyan te igkabulig ne egkakeen, iyam ne binu wey mentika diye te sinabeng ne intinesan te me kasangkapan te timplu, wey in-ugpaan degma te me talagpanubad ne migpamakey, me talagbantey te me gumawan te timplu, wey me mangngulahing. “Ne kene ney egbalaharen ka timplu.”