Nihimiyas.
12.
Seini ka listaan te nekeuli ne naddakep ne me talagpanubad wey me Libita ne nakaruma ki Sirubabil ne anak ni Sialtiil, wey ki Huswi ne Labew ne Talagpanubad. 
Ka me talagpanubad iyan ensi: Sirayas, si Hirimiyas, si Isra, si Amariyas, si Maluk, si Hatus, si Sikaniyas, si Rihum, si Mirimut, si Idu, si Ginituy, si Abiyas, si Mihamin, si Maadiyas, si Bilga, si Simaya, si Huwiyarib, si Hidayas, si Salu, si Amuk, si Hilkiyas, wey si Hidayas. Sikandan ka me pangulu te me talagpanubad wey te me karumaan dan te timpu ni Huswi. 
Ka me Libita iyan ensi: Huswi, si Binuy, si Kadmiil, si Siribiyas, si Huda, wey si Mataniyas. Si Mataniyas wey ka me duma rin iyan migpangulu te peg-ulahing te ulahingen te pegpasalamat. 
Ne si Bakbukiyas, si Uni, wey ka me duma ran ne migsasindeg diye te egkatangkaan dan, iyan egpatabaken te me ulahingen. 
Si Huswi ne Labew ne Talagpanubad ka amey ni Huwiyakim. Si Huwiyakim ka amey ni Iliyasib. Si Iliyasib ka amey ni Huwiyada. 
Si Huwiyada ka amey ni Diyunatan. Ne si Diyunatan ka amey ni Haduwa. 
Te timpu ne iyan Labew ne Talagpanubad si Huwiyakim, seini ka me pangulu te me pamilya te me talagpanubad: si Mirayas ka pangulu te pamilya ni Sirayas. Si Hananiyas ka pangulu te pamilya ni Hirimiyas. 
Si Misulam ka pangulu te pamilya ni Isra. Si Diyuhanan ka pangulu te pamilya ni Amariyas. 
Si Diyunatan ka pangulu te pamilya ni Malukay. Si Husi ka pangulu te pamilya ni Sibaniyas. 
Si Adna ka pangulu te pamilya ni Harim. Si Hilkay ka pangulu te pamilya ni Mirayut. 
Si Sakariyas ka pangulu te pamilya ni Idu. Si Misulam ka pangulu te pamilya ni Ginitun. 
Si Sikri ka pangulu te pamilya ni Abiyas. Si Piltay ka pangulu te pamilya ni Miniyamin wey ni Muwadiyas. 
Si Samuwa ka pangulu te pamilya ni Bilga. Si Hihunatan ka pangulu te pamilya ni Simayas. 
Si Matinay ka pangulu te pamilya ni Huwiyarib. Si Usi ka pangulu te pamilya ni Hidayas. 
Si Kalay ka pangulu te pamilya ni Salay. Si Ibir ka pangulu te pamilya ni Amuk. 
Si Hasabiyas ka pangulu te pamilya ni Hilkiyas. Ne si Nitanil ka pangulu te pamilya ni Hidayas. 
Te timpu ne iyan Hari te Pirsya si Daryu, iyan Labew ne Talagpanubad si Iliyasib, si Huwiyada, si Diyuhanan, wey si Haduwa. Ne due listaan te me pangulu te me pamilya te me Libita wey me talagpanubad. 
Ka me pangulu te me pamilya te Libita ne nalista diye te Libru ne Sulatanan te Neneyitabu taman de te timpu ni Diyuhanan ne apu ni Iliyasib. 
Ne seini ka me pangulu te me pamilya te Libita: si Hasabiyas, si Siribiyas, si Hisuwa, si Binuy, si Kadmiil, wey ka me duma ran ne migsasindeg diye te egkatangkaan dan ne migdeyrey wey migpasalamat. Migmatabtabakey sikandan ka mig-ulahing sumale te suhu ni Dabid ne suluhuanen te Manama. 
Ne si Mataniyas, si Bakbukiyas, si Ubadiyas, si Misulam, si Talmun, wey si Akub ne me talagbantey te gumawan te timplu, iyan impiyalan ne egtameng te me tinesanan ne diye te marani te me gumawan. 
Migtrabahu sikandan te timpu ni Huwakim ne anak ni Huswi ne apu ni Husadak, wey te timpu ni Nihimiyas ne gubirnadur wey ni Isra ne talagpanubad wey talagpanulu te Balaud te Manama. 
Te peghalad te batu ne alad te Hirusalim ne matikang wey makepal, impeumew ran ka me Libita diye te me inged ne in-ugpaan dan. Ne igpeendiye sikandan te Hirusalim eyew te pegsahakeen wey peggale-gale te peghalad kayi duma te pegpasalamat wey peg-ulahing ne egbalesen te me putew ne basalan, me alpa, wey me lira. 
Igpeendiye degma ka mangngulahing ne egpuun diye te me inged ne nakalingut te Hirusalim wey ka egpuun diye te me bariyu te Nitupa, 
wey ka egpuun degma te Bit-Gilgal, wey ka egpuun te inged te Giba wey te Asmabit, su migbebariyu ma ka me mangngulahing diye te nakalingut te Hirusalim. 
Migpanlinis ka me talagpanubad wey me Libita te pegkeetew ran eyew egmatulus sikandan, inlinisan dan degma ka me etew, ka me gumawan, wey ka batu ne alad te siyudad eyew egmatulus. 
Ne induma ku ka me pangulu te Huda diye te ampew te alad. Ne mig-alam a te daruwa ne punduk te masulug ne mangngulahing eyew eglingut-lingut diye te ampew te alad, te pegpasalamat te Manama. Ka sabeka ne punduk migpeendiye te igkakawanan ne balabahan ne egpakatangke te gumawan ne egngaranan te Basuraan. 
Ne migsinundul kandan si Husayas duma te katenge te me pangulu te Huda. 
Migsinundul degma ka talagpanubad ne ensi Asariyas, si Isra, si Misulam, 
si Huda, si Binhamin, si Simaya, wey si Hirimiyas. 
Ne migparahing ka duma kandan te me trumpita ne iyan ka migsinundul ne si Sakariyas ne anak ni Diyunatan. Si Diyunatan anak ni Simaya. Si Simaya anak ni Mataniyas. Si Mataniyas anak ni Mikayas. Ne si Mikayas anak ni Sakur ne kabuhalan ni Asap. 
Ne ka me suled din ne ensi Asaril, si Simaya, si Milalay, si Gilalay, si Maay, si Nitanil, si Huda wey si Hanani, mig-uyan te me kasangkapan ne igbales te ulahingen iling te inggamit ni Hari Dabid dengan, ka suluhuanen te Manama. Ne si Isra ne talagpanulu te Balaud te Manama ka migpangulu kandan. 
Te pegginguma ran diye te gumawan ne peendiye te Sebseb, migpamaneyik e sikandan te haheran peendiye te Siyudad ni Hari Dabid, diye te haheran te alad. Inliharan dan ka palasyu ni Dabid wey migpabulus diye te gumawan ne egngaranan te Weyig ne egpakatangke te igsile. 
Ka igkarangeb ne punduk te seeye se egpasalamat, migpeendiye te igkahibang ne balabahan. Migsinundul a te seini ne punduk duma te katenge te me etew. Diye key migbaye te batu ne alad ne ampew te Matikang ne Baley ne hilutuanan te paan peendiye te Maluag ne Alad. 
Puun diye, migpeendiye key te ampew te gumawan ni Ipraim, te Tapey ne gumawan wey te gumawan egngaranan te Isda, te Titikangi ne Baley ni Hananil wey te Titikangi ne Baley te Mahatus, taman te gumawan ne egngaranan te Karniru. Ne migtuhun key diye te gumawan te Talagbantey. 
Sikan naa, miggendiyad te timplu ka daruwa ne punduk ne egpasalamat te Manama, wey migsasindeg sikandan diye te egsasindehan dan. Migleus a degma diye duma te katenge te me upisyal ran ne me duma ku. 
Diye degma ka me talagpanubad ne ensi Iliyakim, si Maasiyas, si Mihamin, si Mikayas, si Iliyuwinay, si Sakariyas, wey si Hananiyas ne talagparahing te trumpita ran, 
wey ensi Maasiya, si Simaya, si Ilisar, si Usi, si Hihuhanan, si Malkiyas, si Ilam, wey si Isir. Sikandan ka me mangngulahing ne impanguluwan ni Hisriyas te peg-ulahing. 
Te seeye ne aldew, masulug ka impanubad dan wey miggale-gale amana sikandan su imbehayan sikandan te dakel ne kahalaan te Manama. Miggale-gale degma ka me malitan wey ka me bate. Ne minsan seeye se diye te mariyu te Hirusalim, egpakarineg te kahulub te peggale-gale dan. 
Te seeye ne aldew, naalam ka me lukes ne egpabantayen te sinabeng ne egtinesan te dasag te me etew wey te an-anayan ne behas te me pinamula, wey te me igkasapulu. Sikandan ka eglimud te me halad puun te me kamet te nakalingut ne me lungsud eyew igbehey te me talagpanubad wey te me Libita su sika iya ka nasulat diye te Balaud. Ne ingkatelesi pad iya man‑e te me matig-Huda ka pegtrabahu te me talagpanubad wey te me Libita diye te timplu. 
Su inggimu ran ma ka igpeyimu kandan te Manama ran, wey ka tulumanen te peglinis. Ne inggimu degma te mangngulahing wey te me talagtameng te gumawan ka himu ran sumale te suhu ni Dabid wey te anak din ne si Sulumun. 
Puun pad dengan te timpu ni Hari Dabid wey ni Asap, duen e me pangulu te me mangngulahing, wey duen e me ulahingen te pegdayan wey pegpasalamat te Manama. 
Sikan naa, te timpu e ni Sirubabil wey ni Nihimiyas, migbehey ka langun ne me Israilita te igdasag dan te me mangngulahing wey te me talagtameng te gumawan sumale te ingkeilangan dan. Migteil man‑e sikandan te halad ne igbehey te me Libita, wey intalaran degma te me Libita ka me talagpanubad.