Nihimiyas.
13.
Te nabase e ka baseen te Balaud ni Muwisis te seeye ne aldew, nanengnengan dan ne ware iya ituhut ne eglemung te keet-etawan te Manama ka me Amurihanen wey ke me Muwabihanen naa, 
su ware dan ma behayi ka me Israilita te egkakeen wey egkeinum te diye pad sikandan te disirtu, su nasi mule migsuul ki Balaam eyew te pegdilus kandan. (Piru inggimu mule te Manama ne panalangin ka seeye ne dilus.) 
Te pegkarineg te me Israilita te Balaud, impasuwey ran e ka langun ne lapu. 
Te ware pad seini neyitabu, ka talagpanubad ne si Iliyasib ne karumaan ni Tubiyas, iyan impiyalan te me sinabeng ne tinesanan diye te timplu. 
Sikan naa ka intuhutan din si Tubiyas ne eggamit te dakel ne sinabeng diye te timplu. Ka seini ne sinabeng, tinesanan dengan te me halad ne egkakeen, me meemut ne insinsu, me tahuanan, me igkasapulu te trigu, binu, wey mentika ne sumale te Balaud igpabehey te me Libita, te me mangngulahing, te me talagbantey te gumawan te timplu, wey te me talagpanubad. 
Wara a diye te Hirusalim te seeye ne timpu su miglibed a diye ki Hari Artasirsis te igkatatelu ne pulu wey daruwa (32) ne leg‑un te peghari din te Babilunya. Ne nataman, migpanaha-taha ad e wey intuhutan e red iya nikandin. 
Te pegginguma ku diye te Hirusalim, nanengnengan ku ka mareet ne inggimu ni Iliyasib ne iyan ka pegpeugpe ki Tubiyas te sinabeng ne tinesanan ne diye te timplu te Manama. 
Sikan naa ka nalanglangetan a, wey impandegpak ku ka langun ne kasangkapan ni Tubiyas diye te lihawangan te sinabeng. 
Ne nataman, impalinisan ku ka me sinabeng wey impalibed ku ipatahu diye ka me kasangkapan, egkakeen, wey ka meemut ne insinsu. 
Ne nanengnengan ku man‑e ne ware nabehayi te me baad ka me Libita wey ka me mangngulahing ne migtrabahu diye te timplu, purisu nanlibed e sikandan diye te me kamet dan. 
Purisu indew‑ey ku ka me upisyal te migkahi, “Mania te imbalahad niyu ka timplu?” Ne impalibulung ku ka me Libita wey ka me mangngulahing wey impalibed ku te me himu ran. 
Nataman, in-uyan e te langun ne matig-Huda ka igkasapulu ne baad te trigu, te binu, wey te mentika diye te me tinesanan. 
Ne iyan ku insalihan te me tinesanan si Silimiyas ne talagpanubad, si Saduk ne talagpanulu te Balaud, wey si Pidayas ne Libita. Impabulig ku kandan si Hanan ne anak ni Sakur ne apu ni Mataniyas. In-alam ku sikandan su egkasalihan ma sikandan wey imbehayan ku te katenged ne egpanalad te me duma ran te baad dan. 
Ne mig-ampu a, “He Manama ku, tantanuri a ubag wey kene nu lingawi ka langun ne meupiya ne neyimu ku diye te timplu nu, wey te me himu kayi.” 
Te seeye ne timpu, due nakita ku ne me matig-Huda ne migkeles te behas te paras te Aldew te Peggimeley. Ka duma kandan, migdurulan te me asnu te egkengakeen, te binu, me behas te paras, me iggira, wey duma pad eyew eg-uyanen kayi te Hirusalim eyew igpamelegye. Sikan naa ka insaparan ku sikandan te kene egpamelegye te Aldew te Peggimeley. 
Ne due man‑e me matig-Tiru ne nangugpe te Hirusalim ne mig-uyan te me isda wey te nakalkalasi ne me belegye, wey impamelegye dan seini te keet-etawan te Huda ne diye te Hirusalim te Aldew te Peggimeley. 
Ne indew‑ey ku ka me talahuren ne me etew te Huda te migkahi, “Mania te inggimu niyu seini se mareet; ware niyu isipa ne matulus ka Aldew te Peggimeley! 
Iling ded iya rue ka inggimu te me kabuybuyahan niyu ne iyan egpuunan ne imparusaan ki te Manama wey ka seini ne siyudad. Ne intimulan niyu pad iya man‑e ka langet te Manama te Israil su ware niyu ma isipa ne matulus ka Aldew te Peggimeley.” 
Te pegkasagkup te mahaan e ka Aldew te Peggimeley, migsuhu a ne eglekeban ka me gumawan te Hirusalim wey kene eglukatan taman te kene pad eglihad ka Aldew te Peggimeley. Ne impatamengan ku te duma ne me suluhuanen ku ka me gumawan su eyew ware iya inuyanan ne egkeuyan diye te seled te siyudad te Aldew te Peggimeley. 
Ne kapapila migmanggirehe diye te lihawangan te Hirusalim ka me nigusyanti wey ka egmamelegye te langun-langun. 
Piru impanpanayan ku sikandan te migkahi, “Mania te migmanggirehe kew due te lenged te batu ne alad te siyudad? Ke eg-abayan niyu seini te eggimu igparakep ku sikaniyu.” Ne puun dutu, warad sikandan nanlibed te Aldew te Peggimeley. 
Ne insuhu ku ka me Libita ne eglinis te pegkeetew ran wey egtamengan dan ka me gumawan eyew egmatulusen te me etew ka Aldew te Peggimeley. Ne mig-ampu ad man‑e, “He Manama ku, tantanuri a ubag te seini se inggimu ku wey ipapitew nu ka dakel ne geyinawa nu ne kene egkabalbalawan.” 
Te seeye ded ne timpu, due man‑e nakita ku ne me Hudiyu ne migmangasawa te me malitan ne migpuun te Asdud, Amun, wey te Muwab. 
Liware te me anak dan ka egpakalalag te linalahan te me matig-Asdud wey ke linalahan naa te lein ne me etew, wey kenad iya egpakalalag te linalahan te me matig-Huda. 
Sikan naa ka indew‑ey ku ka me matig-Huda wey indilus ku sikandan. Impanlampesan ku ka duma kandan wey impangginit ka me bulbul. Impepanaad ku sikandan te ngaran te Manama ne kenad sikandan egpangasawa te kene ne me Hudiyu, lagkes ka me anak dan ne me malitan wey me lukes. 
Ne migkahiyan ku sikandan, “Me lapu ne me malitan ka egpuunan ne nakasale si Hari Sulumun. Ware Hari ne iling kandin te langun ne nasud, wey inggeyinawaan sikandin te Manama rin wey inggimu sikandin ne Hari te intiru ne Israil. Piru minsan pad due, nakasale sikandin tenged te me lapu ne me malitan. 
Egbalaharen ney naan de seini se dereeti ne himu wey pegsupak niyu te Manama ta pinaahi te pegpangasawa niyu te me lapu ne me malitan?” 
Sikan naa ka impaawe ku ka sabeka ne anak ni Huwiyada ne mekaamung ni Sanbalat ne Hurunihanen. Si Huwiyada anak te Labew ne Talagpanubad ne si Iliyasib. 
Ne mig-ampu a, “He Manama ku, tantanuri nu ne inlinditan dan ka pegkatalagpanubad dan wey ka me kasabutan dan keykew isip me talagpanubad wey me Libita.” 
Purisu inlinisan ku sikandan puun te minsan nekey ne nakapanulu te me lapu. Ne miggimu a te me balaud ne eg-ikulen te me talagpanubad wey te me Libita eyew egkanengnengan dan ka me himu ran. 
Impegpehetan ku degma ne egkeuyan te eleg ne timpu ka me kayu ne igpanemeg para te pegpanubad, wey ka me an-anayan ne uma. Ne mig-ampu a, “He Manama ku, tantanuri a wey behayi a te keupianan.”