Hub.
3.
Ne nataman, migpanlalag e si Hub te mareet meyitenged te aldew te peglesut din. 
Migkahi sikandin, 
“He Manama, awaa nud ka aldew te peglesut ku, wey ka marusilem ne ingkaberes a. 
Parelema nud seeye ne timpu, wey kene nud tantanuri, wey kene nud pasilei te aldew. 
Himuwa nud seeye ne masumpit ne delem, bunbuni nud te gapun, wey akebi nud te marusilem ka aldew. 
Awaa nud seeye ne karusileman wey egkaliwanan e perem te mangune-kune ne delem wey kene nud ilagkes te egseel te duma ne me aldew. 
Wara ad perem ipekeetew te seeye ne marusilem, wey ware perem peggale-gale te seeye ne timpu. 
Egdilusen e perem ka seeye ne marusilem te me talagdilus ne egpakasuhu te salimbaweng ne egngaranan te Libiyatan. 
Warad perem miglayag ka Buntetale te kaseleman wey warad perem nasi-si ka kaliwaswasan. 
Dilusa nud seeye ne marusilem su ware ma balabahi kayi ka peglesut ku ne iyan nakapasalerep keddi te seini ne kalasayan. 
“Meupiya pad ke migpatey ad te diye e pad te getek te iney ku wey ke nabunggu e naa te peglesut ku. 
Mania te inggiba-hiba wey impasusu e pad iya mule te iney ku? 
Ke dengan e re perem migpatey, migmalinawen ad perem wey hendue te nakalipereng wey miggimeley, 
duma te me Hari wey te me sinalihan ne naluhey re migpatey, wey iyan dengan nangimu te me palasyu ne nagguhus e. 
Nekeyimmeley ad e perem duma te migpatey e ne me pangulu ne nenapenu te me bulawan wey me pelata se me ugpaan. 
Nalanlan e lad perem te ingkaberes e pad, eyew egpekeiling ad e te me bate ne warad nakakita te malayag. 
Diye te inged te me minatey, kenad eggimu te samuk seeye se me etew ne maddeet, wey egpekeyimeley e diye ka nenabbeley. 
Ne diye, kenad e egkabantalan ka langun ne me pinirisu, wey kene dan e egkarineg ka laheng te talagmandu kandan. 
Nekeglemung e diye ka seeye se mabbantug wey seeye se me lerew, wey kenad e egkeyiketan ka uripen te ahalen din. 
“Mania te imbehayan pad iya te kalayag ka etew ke egkabaybayaran de? Mania te imbehayan pad iya sikandin te umul ke egkalasey re? 
Egkengeupian e perem sikandan ne egpatey piru kene sikandan egpatey. Egpamitawen dan ka kamatayen labew pad te pegpamitew ran te nekeeles ne karatuan. 
Amana ran igkahale ke egpatey e sikandan, wey ke igpakalebeng e sikandan. 
Mania te imbehayan pad te umul ka etew, ne ware nakanengneng ke nekey ka egpangkusan din? Pegbuut te Manama ne kene egkanengnengan te etew ka egpangkusan din. 
“Warad keen-keen ku te eglungku, wey warad tamanan te pegdeg-uy ku. 
Su migginguma keddi ka igkaalati ku, wey neyitabu keddi ka igkaliyasi ku. 
Kena ad egkateu-teu wey warad egkapalenlenaan te geyinawa ku; warad himelayan ku te eg-antus.”