Hub.
11.
Ne migtabak si Supar ne matig-Naama, 
“Keilangan ne egkatabak sika se susuluhi ne impanlalag nu. Kene egkapamalehetan ne ware sale nu pinaahi re te pegpangasak nu. 
Kahiyen nu buwa ne kene ney egtabaken ka impanlalag nu ne ware karuan? Kahiyen nu buwa ne ware egsapad keykew te egpanampele te duma? 
Migkahi ka te malehet ne pegpanulu ka impalintutuuwan nu wey ware neyimu nu ne mareet diye te tangkaan te Manama. 
Meupiya perem ke egtabaken ka te Manama mismu eyew egdew‑ey keykew, 
su eyew egkatahaan nu ne due nekeeles ne me paahi rin, wey due maddalem ne me kein-inuwan ne kene egkasabut te etew. Egkanengnengan nu ne kulang de ka parusa te Manama keykew te eleg perem te neyimu nu ne kene ne meupiya. 
“Kene nu iya egkanengnengan ka minsan nekey meyitenged te Maresen ne Manama ne maggirap ne egsabuten te me etew, wey ka subla ne maralem ne kamalehetan meyitenged te katagseb din. 
Matikang pad te langit ka katagseb te Manama, wey maralem pad te inged te me minatey. Dakel pad seini te kalibutan wey maluag pad te dahat. Ne kene nu iya seini egkeumaan te egsuman-suman. 
Ke egdakepen ka te Manama wey eg-uyanen ka diye te hukumanan, ware iya egpakabalabag kandin. 
Neilaan te Manama ka me etew ne ware karuan, wey nakita rin ka maddeet ne hinimuwan dan wey egtantanuran din seini. 
Mahirap e ne egkeyitabu ne egmatagseb pad ka etew ne egkeungel, iling te mahintalunan ne asnu, ne mahirap ne egkeyitabu ne egpakaanak te etew. 
“Hub, ke egmatarengen nu re ka pusung nu, egkakayew nu ka belad nu diye te kandin te me peg-ampu. 
Kene kad himu te sale, wey kene nud tuhuti ne egpakasale pad ka pamilya nu. 
Ne puun due, kene kad e egkeyilew, wey eg-ugpe kad e ne malig‑en, wey ware igkaaldek. 
Ne egkalingawan nu ka keyirapan nu, iling te baggiyu ne miglihad de. 
Ne egmalayag pad ka peg-ugpe nu, du te layag te aldew te meudtu, wey ka marusilem, egpekeiling e te kalayag te maselem. 
Ne warad igkaaldek nu wey due egkapallateng nu, wey eggimeley ka ne warad igkabantali su egbantayan ke ma te Manama. 
Eggibat-hibat ka ne ware egginaaldek keykew, wey masulug ka egpangananey keykew ne egpabulig. 
Piru ka me makasesale egkaruruhu de iya mule, wey ware egkaaputan dan minsan hendei sikandan egbaye, wey iyan dan de iya egkapallateng ka kamatayen.”