Hub.
16.
Ne migtabak si Hub, 
“Nenarineg kud e sika dengan; meddag naa se egliwangen a nikaniyu ne kinaa te nasi man de iya natimuli ka peg-antus ku. 
Peeneng-eneng kew e ka egpanlalag te ware karuan. Mania te iyan niyud ugpe se egpakig-apul keddi? 
Ke sikaniyu ka seini te neula-ula ku kuntee, egkalalag ku degma ka iling te impanlalag niyu keddi. Egpakalengey-lengey a degma kaniyu. Iyan kud e degma ugpe se egpanlalag kaniyu te meenendue. 
Piru kene ku mule sika eggimuwen. Egpakabagget mule kaniyu ka eglalahen ku, wey egpakaawe mule te masakit ka egguhuren ku. 
“Piru kuntee, migpabulus-bulus iya ka masakit ne naheram ku, minsan nekey pad ka eglalahen ku. Ne minsan degma egpeeneng-eneng a, kene ded iya man‑e egkasalinan ka masakit ne naheram ku. 
“He Manama, inggimu ad iya nikeykew ne mahuye, wey inggule nu ka intiru ne pamilya ku. 
Impamahasa ad nikeykew, wey tul‑anen e naan de iya. Ne in-isip e te me etew ne seini ka migpamalehet ne nakasala a. 
He Manama, tenged te langet nu, inlusuran a nikeykew iling te bubuluti ne mananap ne migbindas-bindas te laplap ku. Impakihetan a nikeykew te ngipen nu wey egliting e ka mata nu te egtetengteng keddi. 
Inlelemetan wey ingngingisiyan ad te me etew. Migsabeka sikandan ka eglusud keddi, wey impanagpi dan ka ulaula ku te pegpeyilew keddi. 
Imbehey ad te Manama diye te ware migpalintutuu kandin, wey in-antug ad diye te maddeet ne etew. 
Meupiya red dengan ka peg-ugpe ku, piru indereetan a nikandin, wey iling te inleklek a nikandin wey inlupet; intumbuk din keddi ka tunud din. 
Ne inlilingutan a te me talagpane din wey impepana a te ware pegkeyid‑u; nasuhat ka iihian ku wey nabusaye e diye te tane ka aperu ku. 
Impalpalian a nikandin, wey iling sikandin te bahani ne migsukeung keddi. 
Ne migsaluub a te saku wey migpinnuu a te tane isip peglungku. 
Ne migmalalab e ka ulaula ku, wey migmanlebag e ka mata ku te mangune-kune ne pegsinehew. 
Ware ma perem neyimu ku ne sale, wey malehet ma perem ka peg-ampu ku. 
“Egpekeiling a te etew ne inggimatayan ne eghangyu ne kene pad egbunbunan te tane ka langesa rin eyew kene egkeengked ka pegpeyimmimenew rin para te eleg ne peggukum. 
Minsan kuntee, diye te langit ka talagpamalehet ku. Sikandin ka egkahi ne ware sale ku. 
Inlelemetan ad e te me alukuy ku, piru migsinehew a ka egpepangabang te Manama. 
Ka talagpamalehet ku, iyan seeye se egpeyid‑u-hid‑u te Manama para keddi, iling te sabeka ne etew ne egpeyid‑u-hid‑u para te alukuy rin, 
su kene egkaluhey, eg-engked ad te seini ne inged, wey kena ad eglibed.”