Hub.
21.
Ne migtabak si Hub, 
“Ke egkeupian kew ne egliwang keddi, pammineha a iya nikaniyu ay-ayari. 
Pariralem kew pa ubag taheed te eglalag a. Wey kew e lemet ke egpekeimpus ad ka eglalag. 
Kene ne etew ka egsagsahukulan ku, ke kene, Manama, wey duen iya katarengan ku ke mania te kena a egpakapariralem. 
Pitawa a wey melmelehi a, wey egpakasesagpeng ka iya te be‑be nu ka egkatanengan. 
Ke egsumsumanen ku seini se neyitabu keddi, egpangelkelen a tenged te pegkaaldek ku. 
Mania te intuhutan te Manama ne egkeuyag ka me makasesale? Nasi de iya sikandan egpekeuma te pegkabuyag wey egmaddesen. 
Egkakita ran pad ka pegtulin te me anak dan, wey egpekeuma pad sikandan te me apu dan. 
Ne egmangugpe sikandan te me baley ran wey ware paruseyi te Manama, wey ware ingkangilam dan. 
Egkabuhal ka me ayam dan, su kene ma egkengaawaan ka me baka ran ne egkengaberes. 
Ne igpaleug-leug dan ka me anak dan iling te nati te me karniru ne impaawe; egmangekelag sikandan wey egmanesayew. 
Egmangul-ulahing sikandan ne egbalesen te tamburin wey alpa, wey eggale-gale te dahing te pulendag. 
Matubung ka peg-ugpe dan, wey egkammatey ne malinawen. 
Ingkahiyan dan ka Manama, ‘Pariyu ka kanami! Kene key egkeupian ne egpakanengneng te me paahi nu. 
Hentew ke bes se egkahiyen ne maresen ne keilangan ne egpamakayen ney? Nekey bes ka egkakuwa ney ke eg-ampu key keykew?’ 
“Piru ka malehet, ware migpuun te kandan mismu ne keseg ka katubung dan. Purisu kena a egpammineg te minsan nekey ne igpanulu te me makasesale. 
“Piru pila-pila ka egpatey ne me makasesale. Ne panallimbeka re egginguma kandan ka keyirapan ne igpeuyan te Manama tenged te langet din. 
Ne panallimbeka re degma sikandan egpandeldela, ne iling te lahami wey ke ukaba naa ne eglayap te kalamag. 
“Ne migkahi kew te kene sikandan egparusaan te Manama, su ka me anak dan ka egparusaan. Piru egkahiyan ku sikaniyu te ka nakasale mismu ka egparusaan te Manama, eyew egkanengnengan dan ka sale dan, 
wey egkakita ran mismu ka karereetan dan. Balahara niyu sikandan ka egpakaneem-neem te langet te Maresen ne Manama. 
Emun ke egpatey e sikandan, warad kaligneepan dan ke nekey ka egkengeyitabu te me pamilya ran. 
Kene egkeyimu te etew ne egpanuluen din ka Manama tenged su sikandin ma ka eggukum te seeye se me talahuren. 
“Due me etew ne meupiya re due se lawa taman te egpatey; egpatey sikandan ne malinawen, ware igkalaggew, wey malurung de due se laplap dan iling te bate pad. 
Ne due degma me etew ne egpatey ne mahirap se egkeula-ula, wey warad iya nakaheram te keupianan. 
Piru nenekeg-iling de sikandan ne iglebeng, wey egkekeenen te me liwati. 
Pammineg kew, nakanengneng a te mareet ne suman-suman niyu keddi. 
Migkahi kew, ‘Hendeid naa ka baley te mabantug ne me etew, wey ka me balungbalung te maddeet ne me pangulu?’ 
“Piru inse kew te etew ne egmanlihad, su egguhuran kew nikandan, 
te ka me makasesale, kene egpakalagkes te karereetan tenged te langet te Manama. 
Ware egpakasapad te etew ne mareet se hinimuwan, wey ware iya egsuli kandin. 
Ne emun ke iglebeng e sikandin, egtetamengan pad iya man‑e ka inlebengan kandin. 
Ne susuluhi ka egmanduma diye te eglebengan kandin, wey masulug ka egtahud te lawa rin ke iglebeng e sikandin. Ne minsan ka tane migbehey kandin te himelayanan. 
“Ne egliwangen a ubag nikaniyu pinaahi te me lalag ne ware karuan? Kene ne mallehet ka immanlalag niyu.”