Hub.
27.
Ne migpabulus-bulus si Hub ka migkahi, 
“Igsaad ku te manekal wey Maresen ne Manama ne ware migbehey keddi te eleg ne peggukum, wey ka migbayad-bayad keddi, 
ne taman te manekal e pad, wey taman te duen pad geyinawa ku ne egpuun te Manama, 
kena ad iya eglalag te mareet, wey kena ad iya eg-uubat. 
Kena ad iya eg-uyun ne eleg kew. Ne taman te egpatey a, igpehet-pehet ku ne ware iya neyimu ku ne mareet. 
Taman te manekal e pad, igpehet-pehet ku ka pegkamatareng ku wey kene ku iya egbalbalawan ka suman-suman ku, su nakanengneng a kayi te pusung ku ne ware iya neyimu ku ne mareet. 
“Egparusaan perem te Manama ka langun ne migpakigkuntere keddi, iling te pegparusa rin te me makasesale. 
Ware egkapallateng te me etew ne ware migpalintutuu te Manama, ke eggawien e te Manama ka umul ran. 
Kene eglinglingeen te Manama ka pegpangananey ran ke egginguma kandan ka me kalised. 
Kene sikandan egkahale ne egsimba te Maresen ne Manama, wey kene egpangumew te Manama te langun ne timpu. 
“Igpapitew ku kaniyu ke mamenu karakel ka geem te Manama, wey igpasabut ku kaniyu ka me planu rin. 
Piru kenad e ne keilangan su sikaniyu mismu, nakakita kew ma kayi. Piru mania te migpanlalag kew pad te ware me karuan? 
Eg-ilingen kayi te egparusa te Maresen ne Manama ka me makasesale wey ka me talagleig-leig: 
Minsan pad egmasulug ka me anak dan, piru egpatey ka duma te gira, wey egpatey ka duma te gutas. 
Ne ka seeye se kene egkapatey te gira, dalu degma ka igpatey. Ne warad iya eglungku kandan minsan pad ka me asawa ran. 
Minsan eglilimud te sesalihi ne me kumbale wey me pelata ka me makasesale, 
piru iyan egpanaluub te me kumbale dan ka me matareng, wey iyan egbaad-baad te me seleppi dan ka kene ne me limbungen. 
Egmambebaley ka me makasesale, piru egmekeiling de seini te me baley te kalawe-lawe wey ke leeb-leeb naa te uripen ne egtetameng te me kamet. 
Me meyaman sikandan te peglipereng dan, piru te peggimata ran, warad ka langun ne karatuan dan. 
Ne eggingumaan sikandan te liyas iling te baggiyu, wey egmanlayap sikandan te balisusu te timpu te marusilem. 
Ne egmanlayap sikandan te kalamag ne egpuun te igsile wey egkengaawe e sikandan puun te me ugpaanan dan. 
Eggiyup kandan ka sika ne kalamag te ware pegkeyid‑u, taheed te egpakannekal sikandan ne egpariyu puun te kakeseg kayi. 
Ne egpekeiling e ka kalamag te etew ne egpegtagpi te belad wey egpamunsuwit ka eglemet kandan taheed te egpamallahuy sikandan puun te kakeseg kayi.”