Hub.
38.
Ne puun te balisusu, migtabak ka Magbebaye ne Manama ki Hub, 
“Hentew kaa se migduwa-ruwa te katagseb ku? Ka impanlalag nu migpeila re ne ware hanew nu. 
Na, andama nu ka pegkeetew nu, su due me inse ku keykew, wey keilangan ne egtabaken nu seini. 
Hendei kaa te peggimu ku te pabunsuran te kalibutan? Guhuri a ke dakel ka nanengnengan nu. 
Nakanengneng ke naa ke hentew ka migbuut te karakel te kalibutan? Hentew ka migketeng te igseked kayi? Nakanengneng ke naa kayi langun? 
Nekey naa ka nakapahen te pabunsuran te kalibutan; hentew ka migtahu te me pabunsuranan kayi? 
Taheed te ware pad napawe te seeye ne timpu, nangulahing ka me bituen wey migmanguleyi te kahale ka me panalihan. 
Hentew ka migsubung te dahat eyew kene eglapey diye te tane te timpu ne migbusuwe seini puun te diralem? 
Sikeddiey ka migtel-eb te dahat te gapun, wey imbunbunan ku seini te delem. 
Impanahuan ku te eletanan ka dahat, iling te gumawan ne inlekeban ku. 
Ne ingkahiyan ku ka dahat, ‘Kayi ke re iya taman, wey ka derakel ne bunlud nu.’ 
Na Hub, te intiru ne pegkeetew nu, nakasuhu kad naa te kaliwaswasan ne egkapawe e? 
Nakapasile ke naan e te aldew eyew egkateng-awan te kalayag kayi ka intiru ne kalibutan, eyew egpakapeeneng-eneng e ka maddeet ne eggimuwen te timpu te marusilem? 
Tenged te kalayag te pegsile, egkamelmelehan ka intiru ne kalibutan lagkes ka me bubungan wey me napu, ne iling te nalupi ne manggad wey ke basak naa ne namarkaan te silyu. 
Egpakahewhew te hinimuwan te me makasesale ka kalayag, wey kenad sikandan egpekeyimu te mareet diye te duma. 
Nekeendiye kad naa te me sebseb ne diye te diralem te dahat wey ke nakaleleug kad naa diye te kinariraleman te dahat? 
Duen naan e migpapitew keykew te gumawan te marusilem ne inged te me minatey? 
Nakanengneng ke naa ke mamenu karakel ka kalibutan? Na, tabaka a ke nakanengneng ka te langun. 
Nakanengneng ke naa ke hendei egpuun ka malayag wey ka marusilem? 
Emun ke nakanengneng ka, egkabuutan nu sikandan ke hendei egtaman wey ke hendei eglibed? 
Kema ke nakanengneng ka iya te seini langun su nabuybuyahan kad ma su neetew ke buwad ma te ware ku pad himuwa ka kalibutan? 
“Nakaseled kad naa diye te tinesanan ne impanahuan ku te isnu wey ke apiyew naa? 
Intahahe ku seini para te timpu te karereetan, wey timpu te gira. 
Nakataha ke naa te dalan peendiye te inged ne egpuunan te kilat wey ke diye naa te inged ne egpuunan te kalamag te igsile? 
Hentew naa ka miggimu te bayaanan te dakel ne uran wey te bayaanan te dahing te luhung? 
Hentew naa ka migpeuran diye te inged ne ware nangugpe ne etew, minsan diye te disirtu? 
Hentew naa ka migpaweyig te mammara ne tane ne warad iya minsan nekey eyew egtubuan seini te hilamunen? 
Hentew naa ka migligkatan te uran, demmug, 
wey te apiyew ne egpuun te langit 
ne iyan egpakamakehal te weyig diye te ampew ne baad te dahat, iling te batu? 
“Egpekeyiket ke naa wey ke egpekeekad te punduk te me bituen ne iyan ka Balatik wey Panderawa? 
Egkanangenan nu naa ka me bituen ke ken‑u sikandan eleg ne egsile, wey ke egkeinahak nu naa ka punduk te me bituen ne egngaranan te Dakel wey Deisek ne Usu? 
Nakanengneng ke naa te me balaud diye te langit, wey egpekeyimu ke naa te iling due ne balaud kayi te kalibutan? 
“Egpakasuhu ke naa te gapun eyew egpeuranan ka? 
Egpakasuhu ke naa te kilat eyew eggeteb, wey egtuman naa ke hendei nu seini egpeendiyaa? 
Hentew naa ka migpanulu te gapun ne egkateu ne eg-uran, wey te demmug ne egkateu ne eg-uwang? 
Hentew naa ka matagseb ne egpakaseel te gapun, wey egpakabusbus te uran puun te aw-awangan 
peendiye te tane ne mammara eyew egbebasak seini wey egkataman, egkehal e? 
“Sikeykew naa ka migpanitingen te igpakeen te me liyun, wey te peggibulung te me anak dan 
taheed te egmamulbuluku sikandan diye te me sulung wey ke diye naa te me helesanan dan? 
Hentew naa ka egbehey te egkakeen te me uwak ne egmagguye e ka egmakalibeng-libeng tenged te ware egkakeen ke egbuyu keddi te egkakeen ka me piyak dan?