Salmu.
6.
Ka ulahingen ni Dabid te pangulu te mangngulahing ne egbalesen te instrumintu ne walu se tagpes. He Magbebaye, kena a ubag paruseyi ke egkabelu ka, wey kena a legpari ke egkalangetan ka. 
Keyid‑u ka keddi, he Magbebaye ne Manama, su migmahuye ad e; lig‑ena a nikeykew su warad e keseg te me tul‑an ku. 
Amana a nabaybayari, he Magbebaye, wey ken‑u naan pad seini egkataman? 
Luwasa a nikeykew, he Magbebaye ne Manama, wey tenged te geyinawa nu ne kene egkabalbalawan, ipaalihu a nikeykew te kamatayen. 
Su diye te inged te me minatey, warad e egsuman-suman keykew, warad e egdayan keykew diye. 
Migmahuya ad e tenged te amana ne pegkalange, wey tagse marusilem, egkasubid-subid te luwe ka hibatanan ku wey ka ulunan ku. 
Miglebag e ka mata ku, wey kena ad e egpakameleg-meleg tenged te pegsinsinehew ku, tenged te inggimu te me kuntere ku. 
Pariyu kew keddi, sikaniyu se me etew ne mareet se hinimuwan, su narineg te Magbebaye ne Manama ka pegsinehew ku. 
Narineg te Magbebaye ne Manama ka pegpangananey ku kandin, wey indawat din ka me peg-ampu ku. 
Egkekeyilawan ka langun ne kuntere ku, wey amana egkabaybayari; ne sahuhune ne egpariyu tenged su egkeyilew sikandan.