Salmu.
9.
Ka ulahingen ni Dabid para te pangulu te mangngulahing ne eg-ulahingen iling te peg-ulahing te “Ka Pegpatey te lukes Anak.” Egpasalamatan ku sikeykew, he Magbebaye ne Manama, te intiru ne pusung ku! Igpangguhud ku ka langun ne meupiya ne neyimu nu. 
Egkahala a tenged keykew! Eg-ulahing a te pegdayan te ngaran nu, he Amana ne Mabantug ne Manama. 
Emun ke eg-isues e ka me kuntere ku, egkasaligkat sikandan wey egpatey diye te tangkaan nu. 
Matareng ka wey egkasalihan ne eggukum, wey ka peggukum nu migpamalehet ne eleg iya ka keddi. 
Insaparan nu ka me nasud, wey indereetan nu ka me etew ne mareet se hinimuwan, wey egkalingawan e sikandan te ware egtamanan. 
Nareetan e te ware egtamanan ka me kuntere; indereetan nu ka me siyudad dan, wey warad e minsan hentew ne egpakasuman-suman kandan. 
Piru sikeykew, Magbebaye ne Manama, eghari ka te ware egtamanan; andam e ka trunu nu para te peggukum. 
Eggukuman nu ka kalibutan duma te katareng, eggukuman nu ka me etew te eleg ne peggukum. 
Sikeykew Magbebaye ne Manama ka talagpangabang te egkareeg-deeg; ka malig‑en ne aputanan te timpu te kasamuk. 
Egsalig keykew ka nekeila keykew, su ware nu ma engkeri Magbebaye ne Manama, ka migparani keykew. 
Ulahing kew te pegdayan te Magbebaye ne Manama, ka Hari te Hirusalim. Pangguhuri niyu ka me nasud te neyimu rin. 
Kene egkalingawan te Manama seeye se neneyirapan. Egsagmanen din iya ka migpabulig kandin; egparusaan din ka migleig-leig kandan. 
He Magbebaye ne Manama, pitawa nu ke immenu a te egpaantus te me kuntere ku! Keyid‑u ka keddi wey ipaalihu a nikeykew te gumawan te kamatayen, 
eyew diye te me gumawan te Hirusalim, igpakapangguhud ku ka neneyimu nu keddiey, wey egkahala a tenged te pegluwas nu keddiey. 
Ka me nasud ne ware migpalintutuu te Manama, iyan ded neneulug te me bitu ne immangimu ran, wey iyan ded nanahad te me lit‑ag ne inteen dan te pegsahilut te duma. 
Pinaahi te matareng ne peggukum, impeila te Magbebaye ne Manama ke hentew sikandin. Ka me etew ne mareet se hinimuwan, iyan ded migsahad te mareet ne me hinimuwan dan. 
Ka kamatayen ka egpangkusan te me etew ne mareet se hinimuwan, wey te langun ne migsamsamili te Manama. 
Ne ka ware egkeyimu, kene layun egkabalahad; ka egkapallatengan te egkekaayu-ayu, kene egkaawe. 
He Magbebaye ne Manama, kene nu ituhut ne due egpaalag-alag ne egsukul keykew, wey hukumi nu ka ware migpalintutuu keykew. 
Hinaaldeka nu sikandan, he Magbebaye ne Manama! Ne ipeila nu kandan ne me etew re sikandan.