Salmu.
12.
Ka ulahingen ni Dabid para te pangulu te mangngulahing. Bulihi a Magbebaye ne Manama, su warad nasame ne mig-ikul keykew, su ka me etew ne matinumanen, naawe e. 
Migpeub-ubatey e ka talagduma, wey migpewulhuluey sikandan ka egpalimbungey. 
Peen-enenga nud perem Magbebaye ka egmanghulu te duma, wey ipasanggel nud ka mapegpegasal ne me etew, 
ne egkahi, “Egkakuwa ney ka langun ne igkeupii ney su egkateu key ne egpangasak. Iglalag ney ka igkeupii ney wey ware egpakabalabag kanami.” 
Piru migkahi ka Magbebaye ne Manama, “Egbulihan ku ka egkengaayu-ayu su inleig-leig sikandan wey egmakareg-uy e. Egpangabangan ku ka me mekeyid‑u-hid‑u wey egbulihan ku sikandan su mig-iman-iman sikandan due.” 
Malehet iya ka insaad te Magbebaye ne Manama. Malehet ka inlalag din iling te malehet ne pelata ne kapapitu lalaba te hapuy. 
Bantayi key Magbebaye. Ipariyu key te me etew ne mareet se hinimuwan te langun ne timpu. 
Su nalingutan key te talagdereet ne me etew, wey egkarayan de iya ka talaggimu te mareet.