Salmu.
16.
Ka ulahingen ni Dabid. Pangabangi a Manama su mig-aput a keykew. 
Migkahiyan ku ka Magbebaye ne Manama, “Magbebaye ka, ka langun ne narawat ku ne meupiya, duen iya te keykew egpuun.” 
Ka keet-etawan nu ne impeugpe nu te tane, mateles sikandan wey amana ku igkahale. 
Piru seeye se mig-aput diye te me diyus-diyus, nasi de iya egkatimulan se peg-antus. Kena a eg-alak te peghalad dan te langesa, wey kene ku egdawiten ka me ngaran dan. 
Magbebaye, sikeykew naan de ka keilangan ku. Imbehey nu ka langun ne keilangan ku. Sikeykew ka miggen-gen te egpangkusan ku. 
Amana ne mateles ka imbehey nu keddiey ne inged. Uya, mateles iya ka narawat ku ne karatuan puun keykew. 
Egdayanen ku sikeykew Magbebaye su impanulu a nikeykew. Timpu te marusilem, egpanuluen a te geyinawa ku. 
Layun a egpalemlem keykew Magbebaye. Puun su duma ku layun sikeykew, kena a iya egkaweil. 
Purisu egkahale-gala a wey meupiya se peggeram-geram, wey eg-uugpa a ne warad igkabantali. 
Su imbantayan a nikeykew puun te geem te kamatayen, wara a balahara nikeykew diye te inged te me minatey. 
Impanulu a nikeykew ke egmenuwen ne meupiya se peg-ugpe. Dakel ka kahalaan ku due te keykew, wey kene egkataman ka keupianan puun keykew Magbebaye.