Salmu.
17.
Ka peg-ampu ni Dabid. Pammineha nu, he Magbebaye ne Manama ka pegpangananey ku meyitenged te eleg ne peggukum. Panallingaa nu wey pammineha nu ka malehet ne peg-ampu ku. 
Dapihi a nikeykew te peggukum nu, su nakanengneng ka ke nekey ka eleg. 
In-ugsi-ugsi nu ka pusung ku. Inleuy a nikeykew te marusilem. In-el-elehan a nikeykew wey ware nakita nu ne seyyup. Nasabeke e ka suman-suman ku ne kene eglalag te mareet. 
Wara a mig-iling te mareet ne nangimu te me etew. Intuman ku ka impanulu nu keddi, sikan naa ka wara a nekeikul te peg-ugpe te talagdereet ne me etew. 
Migpaayad-ayad a mig-ikul te dalan nu, wey wara ad iya migsuwey te imbayaan ku. 
He Manama, egpangumew a keykew, su nakanengneng a ne egtabaken a nikeykew. Linglinga nu wey pammineha nu ka peg-ampu ku keykew. 
Ipakita nu te mateles ne me paahi ka geyinawa nu ne kene egkabalbalawan. Talagluwas ka te me etew ne eg-aput keykew, wey impangabangan nu sikandan puun te me kuntere dan. 
Tangguwa a iling te pegtanggu nu te mata nu. Iheeles a ne egpekeiling te me piyak ne egkupkupen te inayan. 
Bantayi a puun te me talagdereet ne eggimatey keddi. Bulihi a puun te me kuntere ku ne miglingut keddiey. 
Kenad iya sikandan egkeyid‑u te duma, wey neelin ne hambug ka egkahuhud dan. 
Inlingutan ad e nikandan, migtetahad sikandan te eleg ne timpu te peggimatey keddiey. 
Egpekeiling sikandan te liyun ne egtetahad keddiey, iling te liyun ne egginihel e ka egdarab te egdawiyen din. 
He Magbebaye, weil kad e, wey pakigkuntere kad kandan wey dereeti nud e sikandan. Kubayan kad te kampilan, wey luwasa a puun te me talagdereet keddiey. 
Te karesen nu, he Magbebaye, luwasa a puun te me etew ne iyan de egsumsumanen ka karatuan kayi te kalibutan. Paruseyi nu sikandan te intahahe nu kandan ne parusa, wey ilagkes nu ka me anak dan wey me apu dan. 
Piru sikeddi, egpakakita a mule keykew, su mig-ugpa a ne matareng. Te peggimata ku, amana ad iya egkahale-gale ne egpakakita keykew.