Salmu.
19.
Ka ulahingen ni Dabid para te pangulu te mangngulahing. Impanengneng te langit ka katelesen nu Manama; impapitew te aw-awangan ka nangimu nu. 
Tagse aldew ne egkarineg ka guhuren keykew, wey tagse marusilem egkakita ka karesen nu. 
Ware laheng ne egkarineg, wey ware iya lalag ne egkarineg, 
piru nanengku-sengku ka guhuren dan te kalibutan, wey nangabbas-abbas te patamanan te kalibutan. Miggimuwan te Manama ka aldew te ugpaan diye te langit. 
Egsile ka aldew te maselem iling te lukes ne egpangasawa ne eglihawang te ugpaan din, iling te eg-apil te eglingkesu ne andam en iya. 
Egsile seini diye te igsile, wey eglineb diye te iglineb. Ne ware egpekeeles te keinit kayi. 
Ware igkarew‑ey te pegpanulu te Magbebaye ne Manama, wey egpakabagget te geyinawa. Melehet ka me pegpanulu te Manama, wey egpakabehey te katuenan te seeye se ware katuenan. 
Eleg ka me suhu te Magbebaye ne Manama, wey egpakapahale te pusung te etew. Meupiya ka me suhu te Manama, wey egpakalayag te suman-suman te etew. 
Meupiya ka pegtahud te Magbebaye ne Manama, wey eleg sika ne eggimuwen te ware egtamanan. Malehet wey eleg ka peggukum te Manama. 
Amana pad seini ne mateles wey impurtanti du te bulawan, me-meemis pad seini du te dalit wey teneb te patiyukan. 
Egpakapanulu degma seini te suluhuanen nu, wey dakel ka unag te seeye se egpakatuman te langun. 
Ware etew ne egpakataha te nakasale bes e sikandin. Manama linisi nu ka me sale ne ware ku nanengnengi. 
Bulihi a degma ne kene egpakasale te tinuyuan, wey kena a egkatuyunan ne eggimu te mareet, eyew ware igkarew‑ey te peg-ugpe ku, eyew ware egkeyimu ku ne dakel ne sale. 
Meupiya perem ne egpakahale keykew, ka langun ne iglalag ku wey ka langun ne egkasuman-suman ku. He Magbebaye, sikeykew ka batu ne alindunganan ku, wey sikeykew ka talagluwas ku.