Salmu.
22.
Ka ulahingen ni Dabid para te pangulu te mangngulahing ne eg-ulahingen iling te peg-ulahing te “Ka Usa te Egkaliwaswas.” Manama ku, Manama ku, mania te in-engkeran a nikeykew? Mania te subla ka ne mariyu keddi te egpangananey keykew? Mania te kena a egkarineg nikeykew se egdeg-uy? 
Manama ku, tagse aldew ne egpangumew a keykew, piru kena a nikeykew egtabaken. Te timpu te marusilem, migpangananey a keykew, piru ware e red nekeyimmeley. 
Piru matulus ka wey migpinnuu ka trunu nu, ne indayan te me kabuhalan ni Israil. 
Migsalig keykew ka kabuybuyahan ney. Migsalig sikandan keykew wey inluwas nu sikandan. 
Migpangananey sikandan keykew wey inluwas nu. Migsalig sikandan keykew wey ware sikandan naruruhu. 
Piru sikeddi, nekeiling ad e te uled-uled wey kenad ne etew. Inleig-leig a te me etew wey inlelemetan a te tebengenen. 
Egbalbalayen a te langun ne egkita keddi, wey egdali-dian a nikandan te egmanlengey-lengey ne egkahi, 
“Migsalig ke buwa ma iya te Magbebaye, piru mania te ware ka luwasa te Manama? Emun ke ingkahale ka te Magbebaye, egluwasen ka iya nikandin!” 
Piru sikeykew ka migpalihawang keddi puun te aanakan te iney ku. Impariyu a nikeykew te karereetan minsan ke malalab e pad. 
Puun pad te miglesut a, imbehey ad diye te keykew, puun te neetew ad ne sikeykew e ka Manama ku. 
Kene ka ubag pariyu keddiey, su mahaan egginguma ka samuk, wey ware egpakabulig keddiey. 
Miglingutan a te masulug ne me kuntere ku, ne iling te mannekal ne turu ne baka puun te Basan. 
Egpekeiling sikandan te me liyun ne migginganga, wey migginihel e ka egdawi keddi wey egdagmang. 
Naaminan a te keseg ku iling te weyig ne nabusbus, wey nekeg-isu e ka me tul‑an. Mahuye e ka pusung ku, nekeiling e te kendila ne egkaleney. 
Naawe e ka keseg ku, wey migdeket e ka dile ku diye te pelak ku, wey imbalahad ad nikeykew ne egkapatey diye te tane. 
Inlilingutan ad te me talagdereet ne me etew, iling te me asu ne mig-alungut keddiey. Intiyuk dan ka belad ku wey ka paa ku. 
Egkamelmelehan kud ka me tul‑an ku, wey egmemetmetan a nikandan. 
Intalad-talad dan ka me kumbale ku, wey migpintut-pintut pad sikandan ka egbaad-baad te me kumbale ku. 
Piru Magbebaye, kene ka ubag pariyu keddiey. Sikeykew ka kanekal ku wey dagdahawi a ubag te egbulig. 
Luwasa a puun te eggimatey keddiey, wey pangabangi a puun te me etew ne egpekeiling te me asu. 
Luwasa a puun te be‑be te me liyun, bulihi a puun te mabbulut ne me turu ne baka. Tabaka nu ka pegpangananey ku. 
Igpanengneng ku ka ngaran nu diye te me suled ku, wey egdayanen ku sikeykew diye te kalibulungan. 
Sikaniyu se migtahud te Magbebaye ne Manama, sayaa niyu sikandin. Sikaniyu se me kabuhalan ni Hakub, tahud kew langun kandin, wey sikaniyu se me kabuhalan ni Israil, dayana niyu sikandin. 
Su ware din balahara ka peg-antus wey ka kalasayan te egkengaayu-ayu, wey ware din lingawi ka kalasayan te seeye se egkabaybayaran. Ware din engkeri sikandan, su indineg din sikandan te pegpangananey ran. 
Sikeykew ka migbehey keddi te kabagget ne egdayan keykew diye te kasuluhan, wey egtumanen ku ka insaad ku keykew diye te tangkaan te seeye se migtahud keykew. 
Egpakakeen ka egkengaayu-ayu wey egkabulung-bulung. Egdayan keykew seeye se migpangananey keykew Magbebaye. Meupiya perem ne egmatubung kew se keet-etawan te peg-ugpe niyu. 
Egpakasuman-suman keykew Magbebaye ka langun ne me etew te kalibutan, wey eglibed sikandan langun diye te keykew. Eglangkeb diye te tangkaan nu ka langun ne taltalaanak kayi te kalibutan. 
Su sikeykew Magbebaye ka Hari te langun, wey talagmandu ka te me nasud. 
Ka langun ne meyaman, egsahakeen wey egsimba keykew. Minsan seeye se mahaan e egpatey, wey seeye se migpatey e, eglangkeb diye te tangkaan nu. 
Egpamakey keykew ka egsinundul ne me kabuhalan din, wey egpanugtulan meyitenged keykew, he Magbebaye ka me kabuhalan dan keureme. 
He Magbebaye, egpangguhuran dan keureme ka ware pad neetew meyitenged te pegluwas nu te keet-etawan nu, wey mismu iya ne sikeykew ka miggimu rue.