Salmu.
25.
Ka ulahingen ni Dabid. He Magbebaye, igbehey ku ka umul ku keykew. 
Egsalig a keykew Manama ku. Kena a balahara ne egkeyilawan, wey egkatalu te me kuntere ku. 
Kene egkeyilawan seeye se egtahad keykew, iyan de seeye se eglilimbung keykew. 
Magbebaye, panulua a te igkeupii nu ne eggimuwen ku, wey ipanulud a te dalan ne eleg ne egbayaan ku. 
Ipeikul a te kamalehetan wey panulua a, su sikeykew ka Manama ku wey talagluwas ku. Te langun ne timpu, sikeykew re ka eg-im-imanen ku. 
Sumsumana nu Magbebaye ka dakel ne hid‑u nu, wey tantanuri nu ka geyinawa nu ne kene egkabalbalawan puun pad dengan. 
Lingawi nud ka me sale ku te bate e pad, wey kene nud sumsumana ka pegsupak ku dengan. Tantanuri a nikeykew Magbebaye su ka geyinawa nu kene egkabalbalawan, wey meupiya ka ne Manama. 
Meupiya ka wey matareng ka Magbebaye. Sikan naa ka egpanuluen nu ka me makasesale, ne eg-ikul te igkeupii nu ne meupiya ne peg-ugpe. 
Impanulu nu ka mapariralemen ke nekey ka eleg, wey impanengneng nu kandan ka igkeupii nu ne eggimuwen. 
Impapitew nu ka geyinawa nu ne kene egkabalbalawan diye te langun ne inggimu nu, wey egkasalihan ka te seeye se migtuman te kasabutan wey me suhu nu. 
He Magbebaye, pasayluwa a tenged te ngaran nu, minsan ke dakel ka sale ku Manama. 
Ka etew ne egtahud keykew Magbebaye, egpanuluen nu Manama te dalan ne eleg ne egbayaan. 
Egmatubung sikandin te peg-ugpe din, wey egpabulus ne eg-ugpe te tane dan ka me kabuhalan din. 
Eg-alukuyen nu Magbebaye seeye se egtahud keykew, wey igpanengneng nu kandin ka kasabutan nu kandin. 
Sikeykew re layun ka egleng-ahen ku Magbebaye, su sikeykew re ka egpekeekad te paa ku ne egsahad te baled. 
Balikid ka wey ikeyid‑u a, su nakasabsabeka ad wey imbaybayaran a. 
Subla ne dakel ka igkabantali te pusung ku, sikan naa ka bulihi a ne egkaawe ka igkalaggew ku. 
Pitawa nu ka kalasayan ku wey igkabaybayari ku, wey pasayluwa a te langun ne sale ku. 
Pitawa nu ka masulug ne me etew ne egkuntere keddi, ne amana sikandan ne egkabelu-belu keddiey. 
Pangabangi a ubag wey luwasa a nikeykew! Kena a peyilawi su mig-aput a keykew! 
Pangabangi a perem su mig-ugpa a ne maheteng wey meupiya, wey migsalig e pad man‑e keykew. 
Luwasa nu ka Israil Magbebaye ne Manama, te langun ne igkabaybayari ran.