Salmu.
29.
Ka ulahingen ni Dabid. Dayana niyu ka Magbebaye, sikaniyu se nangugpe te langit. Dayana niyu ka Manama te katelesan wey karesen din. 
Dayana niyu ka mabantug ne ngaran te Magbebaye. Simbaa niyu ka Manama te mateles ne katulusan din. 
Egpekeiling te lehes te dakel ne weyig ka laheng te Magbebaye, wey egpekeiling te dagsang te luhung ka katelesan te Manama. Egderaheneg ka Magbebaye iling te dakel ne weyig. 
Maresen ka laheng te Magbebaye, wey subla ne mateles ka laheng din. 
Egkahepu te laheng te Magbebaye ka sidar ne kayu. Egbagbahen te Manama ka me sidar te Libanun. 
Egwelwelen din ka Libanun wey ka Siryun, iling te nati te baka wey te leew ne baka ne egletu-letu. 
Eggaapuy ka laheng te Magbebaye ne Manama, wey egpekeiling te kilat ne eggeteb wey eglayag. 
Egkawelwel te laheng te Magbebaye ka katalunan; egwelwelen te Manama ka katalunan te Kadis. 
Ka laheng te Magbebaye, egpakawelwel te me uk ne kayu, wey egpakapaawang te puwalas. Egpanguleyi ka langun ne diye te timplu rin, “Maresen ka Manama!” 
Egmandu ka Magbebaye diye te maralem ne weyig. Eghari sikandin te ware egtamanan. 
Egbehayan perem te Magbebaye ka keet-etawan din te kanekal. Egpanalanginan din ka keet-etawan din te meupiya ne peg-ugpe.