Salmu.
31.
Ka ulahingen ni Dabid para te pangulu te mangngulahing. Duen a te keykew eg-aput, he Magbebaye, wey Manama, kene nu tuhuti ne egpeyilawan a te minsan hentew. Luwasa a su matareng ke ma. 
Pammineha a wey dagdahawi a te egluwas. Pangabangi a ne iling te sikeykew ka batu ne andilunganan. Pangabangi a nikeykew iling te sikeykew ka malig‑en ne aputanan. 
Su egpekeiling ka te batu ne andilunganan ku wey malig‑en ne aputanan ku. Panulua a te igbaye wey kitkita a, eyew ka meupiya ne bansa nu kene egkareetan. 
Impaawa a nikeykew puun te insahilut keddi, su sikeykew ma ka aputanan ku. 
Igbehey ku diye te keykew ne me belad ka panisingan ku. Luwasa a, he Magbebaye, ka Manama ne egkasalihan. 
Igkeepes ku seeye se egsimba te me diyus-diyus ne ware karuan, su egsalig a mule keykew Magbebaye ne Manama. 
Amana a egkahale-gale tenged te geyinawa nu ne kene egkabalbalawan, su nakita nu ka kalasayan ku, wey nanengnengan nu ka igkabantali ku. 
Wara a ibehey nikeykew diye te me kuntere ku. Impasasindeg a nikeykew diye te maluag ne tane. 
Ikeyid‑u a nikeykew, he Magbebaye, su egkabaybayaran a seini. Masakit e ka mata ku te pegsinehew, wey migmahuye e ka lawa ku wey ka geyinawa ku. 
Su layun naan de kalaggew ka egkeula-ula ku, wey pila ne leg‑un ka pegdeg-uy ku. Migmahuye ad tenged te peg-antus ku, wey migmahuye e ka me tul‑an ku. 
Imbaley-baley ad te langun ne kuntere ku, wey egkabelu-belu keddi ka me sumbaley ku. Egkaaldek e keddi ka me alukuy ku, wey egpariyu e keddiey. 
Inlingawan ad e nikandan iling te namatey e, wey warad e karuan ku iling te napese ne kuren. 
Egkarineg-dineg ku ka me kuntere ku ne egmana-naasey, wey igkangilam e re due te minsan hendei, su eglelalisan a nikandan te egdereet, wey migplanu sikandan ne eggimatey keddiey. 
Piru migsalig a keykew, he Magbebaye, wey migkahi a te sikeykew ka Manama ku. 
Due te keykew ne me belad ke nekey ka eggingumaan ku. Luwasa a puun te me kuntere ku wey te egbayad-bayad keddiey. 
Ipapitew nu ka keupiya nu keddi te suluhuanen nu, wey luwasa a su ka geyinawa nu kene egkabalbalawan. 
He Magbebaye, kene nu tuhuti ne egpeyilawan a te minsan hentew su migpangumew a keykew. Peyilawi nu ka me etew ne mareet se hinimuwan wey ipanulud nud diye te inged te me minatey, eyew egpeeneng-eneng e sikandan diye te lebeng. 
Himuwa nu ne ummew ka me ubaten, ne eggelebek egleig-leig te me matareng, wey egpaambug wey egdeeg-deeg kandan. 
Amana ka iya ne meupiya, ne igpapitew nu seini diye te egtahud keykew. Egkarawat degma seini te seeye se mig-aput keykew, wey egkakita seini te langun ne etew. 
Inggeles nu sikandan diye te malig‑en ne inged ne diye ka, eyew egkaluwas sikandan te mareet ne planu te me etew. Impeugpe nu sikandan diye te ugpaan nu, eyew kene sikandan egkatampele te me etew. 
Egdayanen ka Magbebaye, su kein-inuwan amana ka geyinawa nu ne kene egkabalbalawan ne impapitew nu keddiey, te timpu ne diya a te siyudad ne inlusuran te me kuntere ney. 
Nabantalan a amana wey kahiyen ku ne in-engkeran ad e nikeykew. Piru narineg nu ka laheng ku te egpeyid‑u-hid‑u keykew, wey te pegpangananey ku keykew. 
Geyinawei niyu ka Magbebaye, sikaniyu se keet-etawan din. Inggeles te Magbebaye ka me matinumanen, piru egpatamtamanan te egdusa ka subla ne hambuhen. 
Pakannekal kew se migpallateng te Magbebaye. Kene kew egmahuye wey kene kew egkapeleyi.