Salmu.
33.
Gale-gale kew diye te Magbebaye ne Manama, sikaniyu se me matareng. Eleg de iya ne egdayan kew kandin. 
Pasalamat kew te Magbebaye, wey pangelit kew te alpa. Pangepad kew ne egbalesen te kuglung ne sapulu ka kelitanan. 
Ulahing kew kandin te iyam ne ulahingen. Ay-ayari niyu te egpangelit ka kuglung, wey panguleyi kew te kahale. 
Su malehet ka lalag te Magbebaye, wey egkasalihan ka langun ne nangimu te Manama. 
Inggeyinawaan din ka katareng wey ka eleg ne peggukum, wey napenu ka kalibutan te geyinawa rin ne kene egkabalbalawan. 
Pinaahi re te lalag te Magbebaye, neyimu e ka langit: ka aldew, bulan, wey me bituen. 
Insubung din ka weyig te dahat, ne hendue te intahu te limuranan te weyig. 
Eleg ne egtahuren ka Magbebaye te langun ne kayi te inged, wey egbantuhen sikandin te langun ne etew. 
Su inlalag din de ne neyimu e ka inged, migmandu sikandin wey neyimu e ka langun. 
Egbalabahan te Magbebaye ka implanu te me nasud, kene din egtuhutan ne eglampus sikandan te planu ran. 
Kene egkataman ka planu te Magbebaye, wey egpabulus te ware egtamanan ka puhawang din. 
Keupianan te nasud ne iyan Manama ka Magbebaye. Keupianan te me etew ne in-alam te Manama ne keet-etawan din. 
Egpamantew ka Magbebaye puun te langit, wey egkakita rin ka langun ne etew te kalibutan. 
Puun te inged ne mig-ugpaan te Magbebaye, imbantayan din ka langun ne nangugpe te kalibutan. 
Sikandin ka migbehey te suman-suman te langun ne etew, wey egkakita rin ka langun ne egpangimuwen dan. 
Ka Hari, kene egkaluwas minsan masulug ka me sundalu rin, wey kene egkaluwas ka bahani minsan manekal sikandin. 
Ka kudde, kene egpakabulig ne egpakapanalu te gira, wey kene egpakaluwas ka kanekal ran. 
Egtantanuran te Magbebaye seeye se egtahud kandin, wey seeye se egpallateng te geyinawa rin ne kene egkabalbalawan, 
ne iyan egluwas kandan puun te kamatayen, wey eg-uyag kandan te timpu te bitil. 
Egpallateng ki te Magbebaye, su ka Manama ka talagbulig ta wey talagpangabang ta. 
Egkahale-gale ki diye te kandin, su migsalig ki te matulus ne ngaran din. 
Egkaneem-neem ney perem ka geyinawa nu ne kene egkabalbalawan Magbebaye, tenged su duen key re te keykew egpallateng layun.