Salmu.
34.
Ka ulahingen ni Dabid te migpabubuneg sikandin diye te tangkaan ni Abimilik, eyew egdeldelen sikandin ni Abimilik, wey egpakaawe e sikandin. Egdayanen ku ka Magbebaye te langun ne timpu, wey kena a egpeeneng-eneng ka egsaye kandin. 
Egdayanen ku ka Magbebaye tenged te keupiya rin. Egpammineg perem wey egkahale ka langun ne egkaleig-leig. 
Ambag kew keddi ka egdayan te Magbebaye, wey eg-amin-amin ki egsaye te Manama. 
Mig-ampu a te Magbebaye wey intabak a nikandin, wey in-awe din ka langun ne kaaldek ku. 
Egkahale seeye se egparani te Magbebaye, wey kenad iya sikandan egkeyilawan. 
Mig-umew te Magbebaye ka egkaayu-ayu wey intabak din sikandin, wey inluwas din sikandin te langun ne igkalasey rin. 
Egbantayan te panalihan te Magbebaye seeye se egtahud kandin, wey egluwasen din sikandin te igkalasey rin. 
El-elehi niyu wey egkakita niyu ne meupiya iya ka Magbebaye. Keupianan te etew ne eg-aput diye te kandin. 
Kaaldeki niyu ka Magbebaye, sikaniyu se keet-etawan din. Su ka egkaaldek kandin, kene egkaaminan te minsan nekey. 
Egkaaminan ka me liyun te egkakeen wey egmanggutasan, piru seeye se eg-aput te Magbebaye kene egkaaminan te minsan nekey ne meupiya. 
Hendini kew mengeanak wey pammineg kew keddi. Egpanuluen ku sikaniyu ne egtahud te Magbebaye. 
Hentew kaniyu ka egkeupian ne egmalayat se umul, wey egkeupian ne egkaluhey pad te inged wey due keupianan? 
Pakaddiyu kew te mareet ne guhuren, wey kene kew man‑e lilimbung. 
Pakaddiyu kew te mareet ne eggimuwen, wey meupiya ka himuwa niyu. Pakannekal kew ne due keupianan te peg-ugpe niyu, wey kene niyu samuka ka duma niyu. 
Egtantanuran te Magbebaye ka matareng, wey egpamminehen din ka pegpangananey ran. 
Piru eg-ehetan te Magbebaye seeye se mareet se hinimuwan, wey egguleen din sikandan langun eyew egkalingawan e te me etew kayi te kalibutan. 
Ke egpangananey te Magbebaye ka me matareng, egpamminehen din sikandan wey egpangabangan te langun ne igkalasey ran. 
Marani ka Magbebaye te seeye se nasakitan se pusung, wey egluwasen din seeye se naawaan e te peglaum. 
Masulug ka igkabaybayari te etew ne matareng, piru egpangabangan sikandin te Magbebaye te langun ne igkalasey rin. 
Egbantayan sikandin te Magbebaye, wey warad iya tul‑an din ne egkahepu. 
Iyan ded egpekeyimatey te seeye se me etew ne mareet se hinimuwan ka maddeet ne hinimuwan dan, wey egdusaan te Magbebaye seeye se eg-ehet te me matareng. 
Egpangabangan te Magbebaye ka me suluhuanen din. Kene din egdusaan seeye se eg-aput kandin.