Salmu.
43.
Pamaleheti nu Manama ne ware sale ku, wey pangabangi a puun te me etew ne kene egpalintutuu keykew. Luwasa a te me etew ne limbungen wey talagdereet. 
Su sikeykew ka Manama ne eg-aputan ku. Mania te in-engkeran ad nikeykew? Mania te eg-antus e pad te pegbayad-bayad te me kuntere ku? 
Layahi a te layag nu wey panulua a te keykew ne kamalehetan. Uyane e red nikeykew diye te matulus ne ugpaan nu diye te bubungan. 
Ne eggendiya a te altar nu Manama ne tutunganan te igpanubad, egbayaan ku sikeykew se migbehey keddi te kahalaan. Egdayanen ku sikeykew Manama ku, pinaahi te pegpangelit te alpa he Manama ku. 
Mania te egkalanga a wey egkabantalan? Egpallateng a keykew Manama wey egdayanen ku sikeykew man‑e, su sikeykew ka talagluwas ku wey sikeykew ka Manama ku.