Salmu.
44.
Ka ulahingen te me kabuhalan ni Kura para te pangulu te mangngulahing. He Manama, narineg ney ka immangguhud te kabuybuyahan ney, ka nangimu nu dengan te naluhey e ne timpu. 
Indeldel nu ka keet-etawan te me nasud, wey impasubalan nu te me kabuybuyahan ney ka ugpaan dan. Imbaybayaran nu ka keet-etawan te me nasud, piru impamatubung nu ka me kabuybuyahan ney. 
Ware dan nakuwa ka tane te pegpahiggireey, wey ware sikandan migpanalu tenged te kanekal ran. Su sikeykew ka migbulig kandan tenged su inggeyinawaan nu sikandan, wey ka karesen wey geem nu wey ka hid‑u nu ka egpuunan ne migpanalu sikandan. 
Sikeykew ka Hari ku Manama, ne migpepanalu te me kabuhalan ni Hakub. 
Sikeykew ka egpuunan ne egkatalu ney ka me kuntere ney, wey te ngaran nu egpandi-diekan ney re ka eg-ehet kanami. 
Wara a migsalig-salig te pane ku, wey kena a egpanalu te kampilan ku. 
Su sikeykew ka migpepanalu kanami te me kuntere ney, wey impeyilawan nu ka seeye se eg-ehet kanami. 
Egpeggasal key layun keykew Manama, wey egpasalamatan ney ka ngaran nu te ware egtamanan. 
Piru kuntee, in-engkeran key e nikeykew wey impeyilawan e. Ware nud dumeyi ka me sundalu ney ne egpakiggira te kuntere. 
Impalibed key nikeykew diye te me kuntere ney, wey impangahew ran e ka me kasangkapan ney. 
Impahilang key e nikeykew iling te me karniru, wey impegsuwey-suwey key e nikeykew te minsan hendei ne me nasud. 
Imbelegye nu ka keet-etawan nu te bratu re, wey ware nud iya patimuli minsan deisek de. 
Imparali-dian key nikeykew te me sumbaley ney, wey inlemetan key te nakalingut kanami ne me etew. 
Egpasalupetan key nikeykew te me etew, wey egmanlengey-lengey e sikandan ka egsumpalit kanami. 
Layun e naan de egkeyilew, wey mekeyilew-hilew naan de iya ne egpapitew te me etew, 
su egpatamtamanan a te egpeyilew, wey egtampele te me etew ne egkuntere keddiey wey egsuli. 
Neula-ula ney seini langun minsan ware ney sikeykew lingawi, wey ware key migsuwey te kasabutan nu. 
Ware key mig-inniyug keykew, wey ware key migsuwey te egpabayaan nu kanami. 
Piru imbalahad key nikeykew diye te ugpaan te mabbulut ne me mahintalunan, wey imbunbunan key nikeykew diye te lungag ne amana ne marusilem. 
Ke inlingawan ney e perem sikeykew Manama, wey migpamakey key e te duma ne diyus-diyus, 
kene nu naa egkanengnengan seini Manama? Egpakanengneng ka te suman-suman te etew. 
Ne puun te pegpalintutuu ney keykew, layun key egpakasalerep te karereetan. Egpekeiling key te me karniru ne eggilangen. 
Himata kad! Mania te egliplipereng ka, he Magbebaye? Weil kad Manama. Kene key balahara te ware egtamanan. 
Mania te eggeles ka kanami? Kene nu kalingawi ka pegbayad-bayad wey pegleig-leig kanami. 
Su nakabahed key e te tane, wey kene key e egpekeenew. 
Enew kad wey bulihi key e. Luwasa key e tenged su ka geyinawa nu kanami kene egkabalbalawan.