Salmu.
45.
Ka ulahingen te me kabuhalan ni Kura para te pangulu te mangngulahing. Ulahingen te peggeyinawa ne eg-ulahingen iling te peg-ulahing te “Me Liryu.” Napenu ka pusung ku te meupiya ne guhuren, wey igpangguhud ku seini te Hari. Egpekeiling e ka be‑be ku te igsulat te etew, ne amana ne egkateu ne egsulat. 
Mahal ne Hari, sikeykew ka amana ne mateles ne lukes te langun, wey meupiya layun ka iglalag nu, purisu impanalanginan ka layun te Magbebaye. 
Isiniket nud ka kampilan nu, bahani ne Hari. Maresen ka wey mabantug ne Hari. 
Te kabantug nu Hari, pakiggira ka ne eg-untud te kudde wey egpanalu, tenged te peglapig nu te kamalehetan, pegkamapariralemen, wey katareng. Egpekeyimu ka te me kein-inuwan tenged te karesen nu. 
Tiyuka nu te mahalang ne pane nu, ka me pusung te me kuntere nu. Egparuma-ruma keykew ka keet-etawan. 
Kene egkataman Manama ka peghari nu, wey eleg ka peggukum nu te langun ne migharian nu. 
Ingkatelesi nu ka maheteng ne himu wey ingkeepes nu ka mareet ne himu. Purisu in-alam ka te Manama ne Manama nu, wey imbehayan te kahalaan ne dakel pad te igbehey rin te me duma nu. 
Meemut ka kumbale nu te peemut ne mira, aluwi, wey kasiya. Egkaaley ka te dahing te me alpa diye te mateles ne baley ne indayan-dayanan te me panayew te me ilipanti. 
Me anak te me Hari ka duma te me malitan ne egkabantug due te keykew, wey migsasindeg due te igkakawanan nu ka rayna ne migsaluub te bulawan puun te Upir. 
Pammineg ka beyi, ayad-ayad ka pammineg te iglalag ku. Lingawi nud ka keet-etawan nu wey ka me karumaan nu, 
su naalihan ka Hari te katelesan nu. Tahud ka kandin tenged su ahalen nu sikandin. 
Egdasahan ka te mahinged te Tiru, minsan ka me meyaman egdasahan ka nikandan, eyew eg-upianan nu sikandan wey eglapihan. 
Mateles naan de iya ka prinsisa ne eg-asaween te Hari, wey miglilinayun te indayan-dayanan te bulawan. 
Migsaluub sikandin te mabbatek ne me linayun wey eg-uyanen diye te Hari. Migsinsinundul kandin ka me mengebay ne me duma rin. 
Mahalew-galew sikandan wey egkahale-gale, te sasangan ne eglasud te palasyu te Hari. 
Mahal ne Hari, egsubal eghari ka keykew ne me kabuhalan te me kaap-apuan dan ne mighari dengan. Igpepangulu nu sikandan te langun ne inged te kalibutan. 
Igpasuman-suman ku ka ngaran nu te langun ne me kabuhalan, sikan naa ka egdayanen ka te minsan hendei ne me nasud te ware egtamanan.